¹ Me rijarikana ko vanene mbe ri mokati kenu, ami uina ngu mbi ri o munene otja ene no hatoi jo maihamisiro ua Kristu, nu uina o munarupa mo ujere mbu mau je ku raisiua. ² Rireje ovarise vo rupanda rua Mukuru ndu ri kehi jenu, ama mu ungura otjo vatarere vo kombanda - ae heri kutja muso kutjita, nunguari mena ro kutja muno ndero otja Mukuru tja tja vanga kutja mu ungure, ae he ri oku tjitira o tjisuta tjo ndova nunguari no ndero. ³ Amu tjiti otjo vahona vo ninikizire ku imba mbu mua peua. Nunguari riree otjihorera ko rupanda. ⁴ Nu o Tjiuru-tjo-Varise tji tja raisiua, mamu je ku jakura o tjikrone tjo ujere mbu ha zengi. ⁵ Mo muano o tjingeuo, ene imbo mitandona kareje kehi ja imba o vanene. Amuhe, rizarekeje no merisusuparisiro nu ue kehi jo vakuenu. Orondu Mukuru u pirukira o veritongamise, nunguari u jandja o tjari ku imba mbe risusuparisa. ⁶ Nunguari risusuparisee kehi jeke e namasa ra Mukuru, kutja eje e mu jere o ruveze tji rua jenene. ⁷ Umbee o merikendero uenu ajehe muje, orondu eje una konatja na ene. ⁸ Kareje no upore, nu tjevereje. Orondu o o munauvi u rianga mui tjimuna o ngejama ndji mai vandara, ama ipaha ngu ma njanjaura. ⁹ Mu pirukiree. Karee no masa mo ngamburiro jenu. Mamu tjiua kutja ovakambure ovakuenu mo uje veri kehi jo maihamisiro o tjingeuo. ¹⁰ Nu tji muazu no ku ihamua katiti orure, Mukuru uo tjari atjihe, ngue mu isanena ko ujere uaaruhe mu Kristu, me mu puisa, ne mu sembamisa, ne mu zeuparisa, no ku mu zikamisa. ¹¹ Ku je nga rire o masa ua aruhe nga aruhe. Amen. ¹² Mbi toora Silvanus otjo mukambure o mutakame, nu mba tjangera ene o mambo o masupi muje. Me mu rongo noku hatoira ku ene kutja itji tjimba tjanga o tjari tjiri tja Mukuru. Kuramee mutjo. ¹³ O mukaendu nguri ko Babilon, ngua toororua pueena ene, ue mu minike. Markus uina, o muatje uandje omuzandu, ue mu minike. ¹⁴ Minikasaneje no ruhupito o rujapuke ruo rusuvero. O hange nga i kare pueena ene amuhe mbu mu ri mu Kristu.