¹ Ja̧hua̧nö̧ ja̧'a̧ttö̧ ji̧mutȩnö̧ a̧'ȩ jo̧me päi'omenä̧ kä̧hua̧ttö̧ ji̧mutȩnö̧ mo̧ro̧ ja̧'a̧ chojuisodenä̧ chö̧'ä̧mä̧do̧menä̧ Juda ötahuiyä ttö̧ja̧ ruhuotö jö̧nä̧ ka̧cuä̧tö̧ pȩja̧minä̧tö̧ chä'cajo̧me, ja̧hua̧nö̧ päi'omenä̧ TU̧RU̧HUA̧ TTÖ̧Ä̧NÄ̧HUA̧ u̧mu̧nä̧tä̧ ma'ä̧minö̧sä̧ huorötä. ² Ja̧hua̧nö̧ päi'omenä i̧jȩcuä̧cha̧'a̧ topinö̧sä̧, ttö̧ja̧'i̧sa̧ a̧'u̧cuä̧ a̧'cua̧rö̧nä̧ i̧jȩcuä̧cha̧'a̧. Äcättö dȩa̧'a̧cu̧mä ocurä jä̧'i̧nö̧'a̧nö̧ huinö̧. Äcättö huä̧mecu̧mä̧ särupinö̧, cuoräu säru'u jä̧'i̧nö̧'a̧nö̧. ³ Ja̧u̧nu o'ca'a ja̧u̧mä̧ ttu̧mu tettäda'a ja̧'i̧nö̧'a̧nö̧ teäda'attö chuhuo'chettö 'chuhuädincu̧sä̧; A̧'cua̧ru̧hua̧mä̧ rȩjȩttö̧ mo̧ro̧jä̧ra̧'a̧cu̧, CHÖ̧Ä̧NÄ̧HUA̧ a̧'cua̧ ihueyenä̧tä̧ ȩpi̧ncu̧sä̧ Jrerusalenra̧'a̧cu, kua̧ räopa'cu kate do'ächäcuähuatecu, pinjä̧ttö̧ ttö̧ä̧nä̧cua'ca rö̧ä̧nä̧ ä'cuoyäu ä̧rä̧miö̧ ki̧nö̧. ⁴ Juhuorö kä̧mä̧dö̧ TÖ̧Ä̧NÄ̧HUÄ̧ ujurucu juȩnȩtä̧ ki̧nö̧, ja̧hua̧nö̧tä̧ ji̧na̧'a̧ ya̧nä̧ jähuä muä'quiyura̧'attö̧ tochinö̧mä̧. ⁵ Ja̧u̧nu̧ o'ca'a päinä̧cu̧sä̧: "Ttö̧ja̧sa̧ i̧tti̧, cu̧huo̧jua̧'a̧cu̧ kärächi'ö topi." Ja̧'hua̧nö̧ ja̧'a̧ttö̧ chu̧huo̧jua̧'a̧cu̧ kärächi'ö topäjisä, juhua'atäcu chu̧huo̧jua̧'a̧cu̧ isotörö ku icu iyähuära̧'a̧cu̧ 'chä̧cuä̧huate äpate ko̧mȩnä̧ doächäcuähuome ka̧'a̧ ä'cuoyäcuähuä tätähuä'ca ki̧na̧'a̧. ⁶ Ja̧'hua̧nö̧ ja̧'a̧ Ja̧u̧mä̧ päinäcu̧sä̧: "Ttö̧ja̧sa̧ i̧tti̧, jahuätö jȩttö̧ to'cö'anö̧ ja̧'a̧? Pi̧yȩ ja̧'a̧ su̧ro̧tä̧cuä̧huä̧ rö̧ä̧u̧ Israel ttö̧ja̧ jȩttö̧mä̧ chö̧jo̧dettö rädopächa pä'ö. Ja̧'hua̧nö̧ ja̧'a̧nä̧ kärächi'ö to'cuttömä yabonänö su̧ro̧tä̧cuä̧huä̧ jähuä to̧'cuä̧cua̧jä̧." ⁷ Ja̧'hua̧nö̧ ja̧'a̧ umi isarä äpatecu i'cächinä̧cu̧sä̧, i'cächäcu topinösä̧ ju̧huȩnȩ ttoecuäbänä isäju ka̧'a̧. ⁸ Ja̧u̧mä̧ päinäcu̧sä̧: "Ttö̧ja̧sa̧ i̧tti̧, jahuäbä ttoecuäbä sa'i. Ja̧'hua̧nö̧ päcu sa'inösä ttoecuäbä, ja̧'hua̧nö̧ ja̧'a̧ ju̧huȩnȩmä̧ äpate ki̧na̧'a̧. ⁹ Ja̧'hua̧nö̧ ja̧'a̧ Ja̧u̧mä̧ päinäcu̧sä̧: "Topäji juorö jahuätö surojö su̧ro̧tä̧cu̧phuä̧ jȩttö̧." ¹⁰ Ja̧'hua̧nö̧ ja̧'a̧ttö̧ jacuojö do'ächinösä̧ ja̧hua̧ta̧'a̧nö̧ topinösä̧ ju̧huȩnȩmä̧ ka̧cui̧na̧'a̧ isotö rȩjȩnä̧ do'ähuätö'inä ja̧'hua̧ta̧'a̧nö̧ isotö ttö̧jä̧pi̧yä̧ pa̧ja̧cuä̧nö̧ ku̧nä̧rä̧tö̧ tta̧'u̧cuä̧ adicuina'a, ji̧yȩcu̧pönä yapare ttö̧ä̧nä̧hua̧ ya̧cu̧nä̧ ttojuisode räbänä 'co̧'ö̧ aditinätödo ju̧huȩnȩ ka̧cuä̧tö̧mä̧. ¹¹ Setentanö ttä̧mö̧ huȩnȩ 'quiecuä ttö̧ja̧ ka̧cui̧nä̧tö̧ Israel ttö̧ja̧ ttoju odehuiyänä, ja̧'hua̧ta̧'a̧nö̧ Jaazanías Satán i̧tti̧ ju̧huȩnȩtä̧ ttö̧'cä̧tȩnä̧ ki̧nö̧. Jahuätömä to̧pä̧rö̧ ka̧cui̧nä̧tö̧ yapare ttö̧ä̧nä̧huo̧tö̧ päi'önä 'co̧'ö̧ adicuotö ttä'ca jo̧mȩ ka̧cui̧nä̧tö̧, ja̧'hua̧ta̧'a̧nö̧ u̧mä̧tö̧ tä̧mö̧ ya̧cu̧pönä, tu̧mö̧nä̧ 'chu̧'ä̧ri̧nä̧tö̧ adiu a̧mȩu̧nä̧ 'chopö juäi, ja̧u̧mä̧ a̧dö̧nä̧ 'chopönä 'chopina'a cäecuina'a mo̧ro̧jä̧ra̧'a̧cu̧ ajiya isoppa ra̧'a̧cu̧. ¹² Ja̧u̧mä̧ pä'inö: "Pi̧jä̧ ttö̧ja̧sa̧ i̧tti̧, topöjä̧ tä̧mö̧ huȩnȩ 'quiecuä ttö̧ja̧ jȩtta̧'a̧ Israel ttö̧ja̧ ttoju isode yo̧i̧'ö̧nä̧ jȩtta̧'a̧mä̧? Ya̧cu̧pö̧nä̧ jȩpä̧tö̧ pa̧ja̧cuä̧nö̧ päi'önä yo̧i̧'ö̧nä̧ yapare ttö̧ä̧nä̧huo̧tö̧rö̧, ja̧'hua̧nö̧ ja̧'a̧ jahuätömä pä'inätö̧: ¡TU̧RU̧HUA̧MÄ̧ topocö jä̧cua̧ ujuturumä! TU̧RU̧HUA̧ cadi'inäu̧juä̧ pi̧jä̧ rȩjȩnä̧tä̧. ¹³ Ja̧'hua̧nö̧ ja̧'a̧ Ja̧u̧mä̧ päinäcu̧sä̧: Pä'äjita'anö kärächi'ö ja̧'hua̧ta̧'a̧nö̧ jȩ'cu̧'u̧mä̧ ju̧huȩnȩ abonänö koromä jä̧cua̧'a̧. ¹⁴ Ja̧'hua̧nö̧ ja̧'a̧ TÖ̧Ä̧NÄ̧HUA̧ ö̧jo̧dera̧'a̧ doächäcuähuate chu̧huo̧jua̧'a̧cu̧nä̧ kate ko̧mȩcu̧ Ja̧u̧mä̧ ȩpi̧nä̧cu̧sä̧, ju̧huȩnȩ nä̧tö̧mä̧ ttö̧ä̧nä̧hua̧ Tamuz pättäcuru ajuäu pȩji̧nä̧tö̧. ¹⁵ Ja̧'hua̧nö̧ ji̧yä̧cu̧ Ja̧u̧mä̧ päinä̧cu̧sä̧: ¿Ttö̧ja̧sa̧ i̧tti̧ pi̧yȩ topöjä̧? Kärächi'ö topi su̧ro̧tä̧cuä̧huä̧ttö̧ yabonänä jö̧ ka̧'a̧." ¹⁶ Ja̧u̧mä̧ TÖ̧Ä̧NA̧HUA̧ ojusode jacuä isarära̧'a̧cu̧ i'cächinäcu̧sä̧ ja̧'hua̧ta̧'a̧nö̧ TÖ̧Ä̧NÄ̧HUA̧CU ucuocuäcuähuodera̧'a̧ doächäcuähuomera̧'a̧cu̧, kä'co isaräcu ja̧'hua̧ta̧'a̧nö̧ isotörö ku icu iyähuomecu̧ kä'co päte'ömä veinticinconö jo̧mȩnä̧ huotö u̧mä̧tö̧ TÖ̧Ä̧NÄ̧HUA̧ ö̧jodettömä ttaboja̧'a̧cu̧ jö̧nä̧ ka̧cu̧ ja̧'hua̧ta̧'a̧nö̧ ka̧hua̧ räopa'acu tti'ä jö̧nä̧ to̧pä̧rö̧, jahuätömä kä̧hua̧ ucuo te'äu ucuocuinä̧tö̧. ¹⁷ Ja̧u̧mä̧ päinäcu̧sä̧: "¿Ttö̧ja̧sa̧ i̧tti̧ pi̧yȩ topöjä̧? ¿Porö juda ttö̧ja̧ su̧ro̧tä̧cuä̧huä̧ jȩttö̧mä̧ a̧'u̧cu̧nä̧tä̧mä̧ jo̧cö̧? Jahuätömä pi̧jä̧ o'cajuiyunä jo̧mȩ päi'önä jȩpi̧nä̧tö̧ surojumä ja̧'hua̧nö̧ TTÖ̧Ä̧NÄ̧HUA̧ chö̧ra̧huä̧rö̧nä̧ jȩpö̧ 'cä̧'i̧pä̧chi̧nä̧tö̧, ä̧na̧jui̧yä̧ra̧'a̧cu̧ todehuächi'önä 'cö̧rö̧pö̧. ¹⁸ Ja̧'hua̧nö̧ jȩttö̧ta̧'a̧nö̧ Ttö'inä jȩchä̧cha̧sä̧ jahuätörö; rȩrö̧jö̧nö̧mä̧ topöcö chä̧cua̧sä̧ ja̧'hua̧ta̧'a̧nö̧ surojöttömä rä'epömä chicuocotö ttäcuotö. Ttörö jä̧'ȩpä̧rö̧ rö̧ä̧nä̧ huotta pä'ö'inä ä̧ju̧cuo̧cö̧chä̧cua̧sä̧.