¹ TÖ̧Ä̧NÄ̧HUA̧ Dios Ttörö hue'äji, ² ja̧'hua̧nö̧ ja̧'a̧ pä'äji: Ucu, ttö̧ja̧sa̧ i̧tti̧ ucuocui Ttö chiminä ja̧'hua̧ta̧'a̧nö̧ pä'i: pi̧yȩ pä'ötó TÖ̧Ä̧NÄ̧HUA̧ Diosmä huopätucui jitä mo̧ro̧mä̧. ³ Täcö tö'cöhuächa'a ¡TÖ̧Ä̧NÄ̧HUA̧ u̧mpro̧ tö'cöhuächa'ato! ¡Ja̧u̧nu̧ mo̧ro̧mä̧ yo̧ä̧cua̧'a̧, ja̧u̧nö̧ mo̧ro̧mä̧ surojäcua'a pi̧jä̧nä̧ ötahuiyänä ka̧cuä̧tö̧rö̧! ⁴ Curä ichäcua'a Egiptonä. Ja̧u̧nu̧ pä̧nä̧ recuätörö cuä'äu tticuomenä, Ja̧'hua̧ta̧'a̧nö̧ ttu̧nä̧u̧cuo̧mȩnä̧ ttiäre rö̧ä̧nä̧ micuäu, ja̧'hua̧nö̧ ja̧'a̧nä̧ si'epö tticuomenä Egipto kada'ca jähuä'inä juiyönä, Etiopiamä tti̧ä̧huä̧cua̧'a̧. ⁵ Curättömä ja̧'hua̧ta̧'a̧nö̧ rö̧ä̧nä̧ ma̧ttä̧cuo̧tö̧ curä su̧ro̧da̧u̧ Etipia ja̧'hua̧ta̧'a̧nö̧ Libiattö'inä, Lidiattö'inä, o'cajuiyönä Arabia, Cubttö'inä ja̧'hua̧ta̧'a̧nö̧ koro ötahuiyä, ja̧'hua̧nö̧ ja̧'a̧nä̧'i̧nä̧ koro ötahuiyä esecuätucu. ⁶ TU̧RU̧HUA̧MÄ päö: Egiptorö ppä'ädärä̧tö̧mä mo̧ttä̧chä̧cuo̧tö̧, ja̧'hua̧ta̧'a̧nö̧ ujututä ja̧'a̧ jurucuätömä pättö'inä juiyucuächacua'a. Migdolttö kämä̧dö̧ Sevene beipomejobu su̧ru̧dau̧mä curä o'chuttu totteäcuotö, pa'anötä̧ pä'ö TU̧RU̧HUA̧MÄ. ⁷ Jahuätömä surähuötä ttöjä̧cuo̧tö̧ jä̧cuä̧jä̧ rȩjȩ jaropiäcuähuäjänämä, ja̧'hua̧nö̧ ja̧'a̧ttö̧ ttötahuiyä rö̧ä̧ö̧mä̧ koro ötahuiyättö'inä abonä̧nö̧ suräjäcua'a. ⁸ Jahuätömä ttu̧huo̧juä̧chi̧ä̧cuo̧tö̧ TTÖRÖMÄ pidetä ja̧'a̧ päö TU̧RU̧HUA̧MÄ Egipto ocuränä̧ ku chicuomȩnä̧, ja̧'hua̧nö̧ jö̧ ta'anö o'catoi'önä̧ ppä'ädäri̧nä̧tö̧ pinä̧tö̧'nä totteäcuotö. ⁹ Ja̧u̧nu̧ mo̧ro̧mä huȩnȩ ȩcuä̧ ttö̧ja̧ 'i̧nä rättopäcuotö huoi'canä TTÖTÄ chä'canä jueönä̧ Etiopíanä ko̧cuä̧tö̧ yettecuä'chapäö, ja̧'hua̧nö̧ ja̧'anä̧'i̧nä Egipto ro̧ȩcuä̧ mo̧ro̧mä ubaratä kä̧jä̧cua̧'a̧ jahuätönä̧mä. ¡Topätucui! ja̧u̧ mo̧ro̧mä ichäcua'a. ¹⁰ TTÖ̧A̧NA̧HUA̧ Di̧osmä pä'äji: Egipto ttö̧ja̧ recuättörö chi̧'cä̧chä̧cua̧sä̧ Babilonia Ru̧hua̧ Nabucodonosor u̧mönämä. ¹¹ Ja̧u̧i̧nä u̧muhuäyottö sur o̧do̧u̧i̧nä̧ recuätto ttö̧ja̧ chettecu ichähuä'ä, juäja̧ rȩjȩnämä siepihuäcuätä rȩbȩhuäcua̧'a̧, Jahuätömä chotähuäcuotö ttucurä'cho Egiptorö ttörohuä pä'ö Jua̧'ä̧ja̧ rȩjȩttö tto̧ja̧ rehuätö 'coruhuotäcuächuottö. ¹² Ttomä chuäro̧hua̧cha̧cuä̧sä̧ de'a aje jome juo̧nätä, Ja̧hua̧nö̧tä juhua̧ja̧ rȩjȩmä mihuä pä'ö suropätö ttömunätä iyu chi̧huä̧cuäjä̧. jȩchä̧cuä̧sä̧ jua̧ja̧ rȩjȩmä 'coro̧ja̧ttö̧ ichäcuähuottö jun Ttö TTÖ̧A̧NA̧HUA̧MÄ ucuohuinösä̧. ¹³ Ttö Cu̧ru̧hua̧ Dios, pä'ösä: si'epö chi̧cuä̧cua̧sä̧ yapare ttö̧ä̧nä̧huo̧tö̧rö̧ ja̧'hua̧ta̧'a̧nö̧ be'epu icu yapare ttö̧ä̧nä̧huo̧tö̧ tätähuä'ca Menfis ttö̧ja̧ Egipto pä'äjita'anö̧mä̧ ru̧hua̧ hue'örömä tottäcuotö. ¹⁴ Sidepäcua̧sä̧ i̧sa̧ppȩ jö̧nä̧ kä̧hua̧ ieruhua'acunä EgIptonä ocurä cuounä jȩchä̧cua̧sä̧ Soanä ja̧'hua̧ta̧'a̧nö̧ chu̧tä̧bo̧tä̧cua̧sä̧ Tebasrö ¹⁵ Chi̧jȩpä̧cua̧sä̧ chö̧'ä̧i̧ Sinä, Egipto ttujuru ko̧mnȩ ja̧'hua̧ta̧'a̧nö̧ sidepäcua̧sä̧ ttumöjähuä rö̧ä̧nä̧ micuäu tebasnä. ¹⁶ Chu̧ju̧nä̧cua̧sä̧ ocurä Egiptonä, ja̧'hua̧nö̧ ja̧'a̧nä̧ Sin'inä borettäcuotö ubarattö oju 'tä̧ttȩpä̧cuo̧tö̧ ttoecuäbä kä'co Tebasnä ja̧'hua̧ta̧'a̧nö̧ Menfis ja̧'hua̧nö̧ ja̧'a̧ttö̧ mo̧ro̧ tturohuähuäcuotö. ¹⁷ Möäyotö On ötahuiyänä ja̧'hua̧ta̧'a̧nö̧ pibeset ötahuiyä ttö̧ja̧'i̧nä̧ tottäcuotö curä'chu pätecu sa̧huȩcuä'chu, ja̧'hua̧ta̧'a̧nö̧ nä̧tö̧mä̧ ttȩmi̧pä̧cuo̧tö̧ cärenä ttötatö pä'ö. ¹⁸ Tafnes, Ttö ja̧u̧nu̧ mo̧ro̧ yo̧i̧ä̧'a̧cua̧'a̧ ttö i̧so̧'quȩ ucuo ttuhuähuo̧'quȩ Egipto ttö̧ja̧ 'te'ädö tticuäcua̧jä̧, ja̧'hua̧ta̧'a̧nö̧ ucuo tettähuä'ijö'inä ttujurunä ja̧u̧mä̧ beipächäcua'a, ja̧'hua̧nö̧ päi'omenä ajiya isoppa jättäjäya'a rä̧mä̧di̧na̧'a̧, ja̧'hua̧ta̧'a̧nö̧ tti̧tti̧mö̧ nä̧tö̧mä̧ tti̧'chä̧cuotö cärenä rutähuometä. ¹⁹ Ttömä jȩchä̧cua̧sä̧ ro̧ȩcuä̧ Egipto rȩjȩnä̧, ttu̧huo̧juä̧cua̧'a̧nö̧ isopäi'önä TÖ̧Ä̧NÄ̧HUA̧ ja̧'a̧ pä'ö. ²⁰ Ja̧'hua̧nö̧ ja̧'a̧ a̧'ȩ oncenä 'cuäopina'a, ä̧cuo̧mȩnä̧ kä̧hua̧nä̧, koromöttö todäre mo̧ro̧ kähuatönä, TÖ̧Ä̧NÄ̧HUA̧ i̧huȩnȩ rä̧mi̧pi̧na̧'a̧ ttörö pa̧'a̧nö̧ pä'ö. ²¹ Pi̧jä̧ ttö̧ja̧sa̧ i̧tti̧ ttötä ji̧na̧'a̧ Faraónrö öjo 'te'ädö icuinömä Egiptottö ucuo ru̧hua̧rö̧, ¡Topi! jinä ihue'ca 'teähui'omenä pö̧jä̧ta̧ nö'cähuoca'a, ja̧'hua̧nö̧ jo̧ca̧'a̧ jö̧ttö̧'i̧nä̧ jo̧mȩnö̧ huahuächäcuometä päi'önä'inä pö̧jä̧ta̧ nö'cähuoca'a, ja̧'hua̧nö̧ ja̧'a̧ pä'äjita'anö jareönämä curä'chu 'chuhuäda pä'ömä jui̧yu̧ppa̧. ²² Ja̧'hua̧nö̧ ja̧'a̧ttö̧ TU̧RU̧HUA̧MÄ̧ pä'ö, 'Ä̧ju̧cuä̧tu̧cui̧, ttömä Faraorö̧mä, Egipto ru̧hua̧rö̧mä̧ kö'cocösä. ttötä öjó 'tȩdä̧dä̧cua̧, öjó juruhuojó'inä ja̧hua̧ta̧'a̧nö̧ 'teädäcuohuojo'inä, ja̧'hua̧nö̧tä̧ TTÖTÄ jȩchä̧cua̧ ucurä'chu'inä u̧mu̧ttö̧ mo̧ä̧chö̧nä̧. ²³ Ja̧'hua̧nö̧ ja̧'a̧ttö̧ ttötä pperetö chicuäcuotö Egipto ra̧'a̧ ttidepiyu pönä ja̧hua̧nö̧tä̧ 'cä̧'chö̧ chicuäcuotö pi̧jä̧ttö̧mä̧. ²⁴ TTÖTÄ ujuru'unä jȩchä̧cua̧sä̧ Babilonia ru̧hua̧rö̧mä̧ ja̧'hua̧ta̧'a̧nö̧ u̧mu̧nä̧ ttötä chucurä'chu cha̧bȩtä̧cua̧ ja̧'hua̧nö̧ jȩpö̧tä̧ si'epö chi̧cuä̧cua̧sä̧ Faraón hueomettö̧. Ja̧u̧mä̧ a̧ja̧huä̧cua̧ Babilonia ru̧hua̧ ä'cäjo̧mȩttö̧ 'corujuo'ächö huotta'a jä̧'i̧nö̧'a̧nö̧. ²⁵ TTÖTÄ ja̧cua̧'a̧ Babilonia ru̧hua̧ ujuru chi̧yä̧cua̧mä̧, Ja̧'hua̧n ja̧'a̧nä̧ Faraón öjomä cuepöjuiyönätä ijiyuhuä̧cua̧. Ja̧u̧nu̧tä̧ ttu̧huo̧juä̧chi̧'ä̧cuo̧tö̧ TTÖTÄ ja̧'a̧ TU̧RU̧HUA̧MÄ̧, Babilonia ru̧hua̧ u̧mu̧nä̧ chucurä'chu chabetomenä; Ja'huä'chunä ö̧ro̧huä̧huä̧cua̧ Egipto ttö̧ja̧rö̧. ²⁶ Ja̧'hua̧nö̧ ja̧'a̧ttö̧ ttötä pperetö chicuäcuotö Egipto ra̧'a̧ ttidepiyu pönä ja̧hua̧nö̧tä̧ 'cä̧'chö̧ chicuäcuotö pi̧jä̧ttö̧mä̧. Ja̧u̧nu̧tä̧ ttu̧huo̧juä̧chi̧'ä̧cuo̧tö̧ TTÖTÄ ja̧'a̧ TU̧RU̧HUA̧MÄ̧."'