¹ Ja̧'hua̧nö̧ ja̧'a̧, TU̧RU̧HUA̧ i̧huȩnȩ törö rä̧mi̧pi̧na̧'a̧ pa̧'a̧nö̧: ² "Ttö̧ja̧sa̧ i̧tti̧, Tironä ruhuo hue'örö ji'ähui 'TU̧RU̧HUA̧ TTÖ̧Ä̧NA̧HUÄ̧MÄ̧ pa̧'a̧nö̧ pä'ö: ¡Cuami'iso'quinä ttötä ja̧'a̧ pähuätä ku̧nä̧rö̧jä̧! Ucumä pä'ä'ijö̧jä̧: "¡Ttötäsä cuä̧nä̧hua̧tu̧cu̧mä̧! ¡Ttötä ja̧'a̧ chö̧'ä̧mä̧dä̧cua̧mä̧ dä'ähuotöttö kä'copäte'ö jo̧mȩ!" Ttö̧ja̧sa̧ cua'attö̧ ucumä ttö̧ä̧nä̧hua̧mä̧'cö̧jä̧, ttö̧ä̧nä̧hua̧ 'cua̧rö̧nä̧ jȩpö̧jä̧ cua̧mi̧'iso'quittötä; ³ ¡Ucumä amucuädöjä Daielttö'inä abonänö juohua̧sa̧ pä'ö, ji̧yȩtȩ'i̧nä̧ yä̧huä̧'i̧nä̧ cuamucuädömä jui̧'a̧jä̧! ⁴ Ucumä juiyo cu̧'hu̧o̧ju̧ jȩcu̧'u̧tä̧ hua̧jä̧, ja̧'hua̧nä̧ ja̧'a̧ttö̧ ku̧nä̧ri̧nö̧jä̧ oro'inä ja̧'hua̧ta̧'a̧nö̧ pärätä'inä ucu micuäujuei hua'adöcutomemä! ⁵ Rö̧'ä̧nä̧ cu̧huo̧jua̧'a̧ttö̧ ja̧'hua̧ta̧'nö̧ huo̧ju̧nä̧ pärou jȩcu̧'a̧'ttö̧, yabocutä rö'ächinöjä cuiäre micuäu jueittömä, ja̧'hua̧nö̧ ja̧'a̧ttö̧, cuami'iso'quinämä huo̧jua̧sä̧ pähuätä hua̧jä̧ pi̧jä̧ttö̧ järe cu̧ju̧nä̧rö̧mȩttö̧tä̧. ⁶ Ja̧'hua̧nö̧ ja̧'a̧ TU̧RU̧HUA̧ Diosmä pä'ö: Täcö huo̧juä̧tö̧ 'cua̧rö̧nä̧ jȩpä̧tö̧ cu̧ru̧hua̧tu̧cu̧ u̧huo̧juȩtä̧u̧ . ⁷ Ja̧'hua̧nö̧ ja̧'a̧ttö̧ jȩchä̧cua̧sä̧ korotö korojä̧ ttö̧ja̧ ttichönä ucuru, ttö̧ja̧ suropätö rö̧ä̧u̧nä̧, ttucuorodä 'chottähuäcuotö ucucu tturohuöhua pä'ö, cu'adihuä'inä ja̧'hua̧ta̧'a̧nö̧ cu̧huo̧juö̧'i̧nä̧ ja̧'hua̧nö̧ ja̧'a̧nä̧ cui̧cui̧pä̧cua̧jä̧ cu'adihuä rȩjȩnä̧tä̧. ⁸ Ja̧'hua̧nö̧ ja̧'a̧ttö̧ kä'ö tticuäcuajä̧ jubure rejunä, ja̧'hua̧ta̧'a̧nö̧ jä̧u̧a̧'a̧ juruhuäi 'koru juocuächaja dä'ähuoto kä'cottö. ⁹ ¿Ja̧'hua̧nö̧ ja̧'a̧nä̧ yabocutä ttu̧ä̧nä̧hua̧sä̧cu̧ päcuäcua̧jä̧, ji̧yȩnö̧ cuaboiyotö ttä'ca jo̧mȩ ku̧jo̧mȩnä̧? ¡Jahuätö ttumöttö̧ tocuepä̧cua̧jä̧ ja̧'hua̧nö̧ jo̧ca̧'a̧ ucumä ubotä cuä̧cua̧jä̧! 'corujuocuächä̧cua̧jä̧ korojä̧ttö̧ ichäcuähuotö ttumöttö̧. Ja̧'hua̧nö̧ esetocotö! ¹⁰ 'Coru juottächö'anö. Ttö CU̧RU̧HUA̧ Diosmä ucuocuäjisä, ttömä chi̧huȩnȩ i̧yäjisä. ^{11 13} CHU̧RU̧HUA̧ ichi'ö ucuocuinö pä'äjita'anö pä'inö: Pi̧jä̧ ttö̧ja̧sa̧ i̧tti̧ rä̧mi̧pä̧ra̧'a̧ ji̧yȩtȩ tta̧'cua̧tta̧nö̧ 'cuä̧o̧pä̧cuȩ ucuo ru̧hua̧ bäreö ötahuiyä Tirottö. TU̧RU̧HUA̧ Dios pa̧'a̧nö̧ pä'ö: Ja̧u̧ jacuämä jueönä jä̧cuȩ, huo̧juȩcu̧nä̧ Ttö̧jö̧nä̧ öadihuämä beipächäcua'a. ¹² Ucu ki̧nö̧jä̧ yo̧mȩtȩ aditö ku̧nä̧huo̧mȩ Edén TÖ̧Ä̧NÄ̧HUA̧ Dios i'ättanä ido'qui rö̧ä̧nä̧ micuäu ido'quittö tto'ecuinö̧jä̧: Rubi'inä, Topaz'inä,esmeralda'inä Crisolito'inä, onix'inä, Jaspe'inä, Safiro'inä, Turquesa'inä ja̧'hua̧ta̧'a̧nö̧ bȩri̧lo̧'i̧nä̧. ¹⁴ Ttötä ji̧na̧'a̧ de'a Diosttö ro̧mȩ ku̧ni̧nö̧mä̧ quȩru̧bí̧n ji̧nö̧'a̧nö̧ Ttötä ji̧na̧'a̧ a̧dȩja da'epinömä ucuru, ucu'inä juenetä̧ ki̧nö̧jä̧ inädöttö du'ome kä'co juȩnȩtä̧ cue'ächinö̧jä̧. ¹⁵ Ucumä ucutä jahuätä ca̧ca̧cui̧nö̧jä̧ ucutä cumäniyä ji̧yȩnö̧ mo̧ro̧tä̧ kä̧mä̧dö̧ ucutä ji̧na̧'a̧ uhuäbe'inömä ro̧ȩcua̧ ro̧ttȩpö̧ juiya pä'ö po̧cui̧pi̧nä̧tö̧ ucuttötä. ¹⁶ Cuiäre cumö jähuä micuä pä'ö cuiyä'ijömä surojuoächinö̧jä̧ ra̧huä̧rä̧'chö̧ ja̧'hua̧ta̧'a̧nö̧ Diosttö'inä jäyä jȩä̧cuä̧huä̧ hua̧jä̧ ja̧'hua̧nö̧ ja̧'a̧ttö̧ chä'ca jo̧mȩttö̧ rä'epö chicuinä̧cu̧jä̧; rä'epö chicuinäcu̧jä̧ Dios de'iyuttu ja̧'hua̧ta̧'a̧nö̧ jurunä ku̧ju̧nä̧ ucuru ppädinömä juorö siri'co 'cä̧tȩ jo̧mȩttö̧'i̧nä̧ rä'epö chicuinä̧cu̧jä̧. ¹⁷ Ucu cuaditähuätä ucuo te'ähuinöjä̧; ucu cusärö kä̧dȩpö̧ surojuepinäcu̧jä̧ cu̧huo̧ju̧mä̧ , Ttötä kä'ö chicuinäcu̧jä̧ rȩjȩra̧'a̧ dä'ä ttucua pä'ö ruhuotö ttä'ca jo̧mȩttö̧. ¹⁸ Diosttö jäyä jȩä̧cuä̧huä̧ rö̧ä̧nä̧ jȩpi̧nö̧jä̧ ja̧'hua̧ta̧'a̧nö̧ rö̧ä̧nä̧ surojuo'ächinöjä̧ cuiäre cu̧cuä̧ mitö iyähuänä, juhua'atäcu ucuotäcuähuä juiyönä jȩpi̧nö̧jä̧ ro̧o̧mȩ. Ja̧'hua̧nö̧ ja̧'a̧ttö̧ jȩpi̧nö̧sä̧ uhuäbe'ö ucu cu̧'cä̧tȩ jo̧mȩ ocuränä cuo'ö cuicua pä'ö o'catoi'önä tottacu pä'ö jitä rȩjȩ cuoa'a i̧sa̧ppȩtä̧ cua'a. ¹⁹ O'catoi'önä pi̧jä̧ ötahuiyä ttö̧ja̧ ucuru huo̧juä̧tö̧ yettäcuotö ucuru topö. Pärohuächinö̧jä̧ ucumä koro su̧ro̧pa̧tä̧ 'cuäopönätä̧ pi̧jä̧ttö̧mä̧ to'epächinö̧jä̧. ²⁰ Ja̧u̧nu̧ o'ca'a, TU̧RU̧HUA̧ i̧huȩnȩ törö rä̧mi̧pi̧na̧'a̧ pa̧'a̧nö̧: ²¹ "Ttöja̧sa̧ i̧tti̧, Sidón ötahuiyära'a topäjí ji'ähuäji ja'huätörö ttö pädö. ²² Päcuajá: TU̧RU̧HUA̧ TÖ̧Ä̧NA̧HUÄ̧MÄ̧ pa̧'a̧nö̧ pä'ö: ¡Ä̧ju̧cuä̧tu̧cui̧! ¡TTÖmä kö'co'cösä ucu jȩcu̧'u̧mä̧, Sidón! Ja̧'hua̧nö̧ ja̧'a̧ttö̧ chujuru chi̧jȩpä̧cua̧sä̧ ucu cuä'cajo̧mȩttö̧ ucuru 'cuäoäa'a toputä cu̧mu̧huäyotömä ttu̧huo̧juä̧chi̧'ä̧cuo̧tö̧ TTÖTÄ ja̧'a̧ CU̧RU̧HUA̧TU̧CU̧MÄ̧, TTÖ ucuru ro̧dȩpo̧mȩnä̧. Surojömä kö'co'cö pä'ö cu̧huo̧juä̧chi̧'ä̧cua̧jä̧. ²³ Ucuru märichei juru'u rä̧bȩu̧nä̧ huȩdä̧cua̧sä̧ ja̧'hua̧ta̧'a̧nö̧ cu̧mä̧nä̧nä̧'i̧nä̧ ttucuojatä huerächönä, ja'huättö 'corujuo'ächättömä cuä'cajo̧mȩtä̧ ma̧ttä̧cua̧jä̧. Ja̧'hua̧ta̧'a̧nö̧ ucuru koromettö̧ koromettö̧'i̧nä̧ rohuäu ttichomenätä̧ cu̧huo̧juä̧chi̧'ä̧cua̧jä̧ ja̧u̧tä̧ ja̧'a̧ CHU̧RU̧HUA̧MÄ̧ pä'ö. ²⁴ Ja̧'hua̧nö̧ jo̧mȩnä̧tä̧ i̧sa̧ri̧ so̧'a̧ri̧ ka̧'a̧ jä̧'i̧nö̧'a̧nö̧mä̧ juiyäcua'a Israel ttö̧ja̧rö̧mä̧ o'catoi'önärö̧ ju̧huȩnȩ ka̧cuä̧tö̧ ttörö kö'cocotö pä'ijätömä. ¡ Ja̧u̧nu̧tä̧ ttu̧huo̧juä̧cuo̧tö̧ iso päi'önätä̧ TU̧RU̧HUA̧ TTÖ̧Ä̧NÄ̧HUA̧ ja̧'a̧ pä'ö! ²⁵ Ttö CU̧RU̧HUA̧ Dios pä'ösä: chö̧ca̧ca̧tä̧cua̧sä̧ Israel ötahuiyä ttö̧ja̧rö̧ koro ötahuiyä 'cä̧tȩttö̧ ttipperecuächinomettö̧ ja̧'hua̧ta̧'a̧nö̧ chi̧jȩpä̧cua̧sä̧ chöädihuä ro̧mȩ o'catoi'önä pi̧jä̧ ttö̧ja̧ tottönä. Israel ttö̧ja̧mä̧ jitötä tti̧rȩjä̧nä̧ ttu̧ja̧cuä̧cuo̧tö̧ rȩjȩ Jacobrö chi̧yi̧nä̧jä̧, chu̧mö̧huä̧ya̧rö̧. ²⁶ Juhuene pä'äjita'anö ttö̧ja̧cuä̧cuo̧tö̧ mȩo̧pä̧rä̧cuä̧huo̧co̧mȩ adihuometä Ja̧'hua̧nö̧ ja̧'a̧ttö̧ odehuiyä ttaditäcuotö ja̧'hua̧nö̧ ja̧'a̧nä̧ ttu̧ju̧nä̧rä̧cuo̧tö̧. Uva pätta Ttötä pädäcua̧mä̧ o'catoi'önä ppeyäunä ka̧cuä̧tö̧ suronä pä'ätörömä chahuaruhuärö ötahuiyä Israel ttö̧ja̧rö̧, ja̧'hua̧nö̧ ja̧'a̧ttö̧ o'catoi'önä ttu̧huo̧juä̧cuo̧tö̧ Ttötä ja̧'a̧ TU̧RU̧HUA̧ Dios pä'ömä Israej ttö̧ja̧mä̧.