¹ Asuero ru̧hua̧ jö̧nä̧ hueinö pänä (ja̧u̧ ru̧hua̧ Asueromä̧ India rȩjȩttö̧ kä̧mä̧dö̧ oto Etiopía rȩjȩ jubö 127 rȩji̧yä̧ jo̧mȩnä̧ ruhuome hue'inö), ² Ji̧yȩnö̧ pä̧nä̧ ru̧hua̧ Asueromä̧ isopäi'önä i̧dȩä̧cä̧ ruhuo dȩä̧cä̧nä̧ pä̧mä̧di̧nö̧ ötahuiyä 'quiyönä adicuome Susanä. ³ Huäbocuä a̧'ȩ päi'önä ruhuo huea'a, o'catoi'önä chutäcu tö'cönä aditätucu ja̧'hua̧ta̧'a̧nö̧ u̧mö̧huäyotucu pä'cäri ku̧ni̧nö̧. Persia rȩjȩttö̧ su̧ro̧do̧u̧'i̧nä̧, Media rȩjȩttö̧ ru̧hua̧cu̧ tö'cönänö aditätö'inä ja̧hua̧ta̧'a̧nö̧ ja̧huä̧jä̧nä̧ ruhuo hue'ätö'i̧nä̧ ja̧u̧tä̧ ä'ca jo̧mȩttö̧. ⁴ Uruhuo öadihuä'i̧nä̧, ucuo öadihuä recuo mo̧ro̧ 180nö̧ mo̧ro̧ hueä'iji'i̧nä̧ ijepinö. ⁵ Ja̧u̧nö̧ mo̧ro̧ jo̧mȩ päi'omenä, sietenö̧ mo̧ro̧ jo̧mȩnä̧ pä'cäri ku̧ni̧nö̧. Susa ötahuiyättö ruhuodenä aditätömä o'catoi'önä 'chi̧nä̧tö̧, böottö kä̧mä̧dö̧ ji̧'chi̧cha̧hua̧ jubö cä'ädö. Ja̧u̧ pä'cärimä ki̧na̧'a̧ ruhuode u̧mi̧ isarä cuähuä ka̧cuo̧mȩttö̧. ⁶ U̧mi̧ isarä cuähuä ka̧cuo̧mȩmä̧ a̧'cua̧cui̧'i̧na̧'a̧ pö̧jä̧ta̧ tȩä̧ta̧ttö̧'i̧nä̧, tuhuoppönö jä̧ta̧ttö̧'i̧nä̧, lino pättö appiyättö'inä ja̧'hua̧ta̧'a̧nö̧ tädönä tuhuöttö'i̧nä̧, orottö adicu o̧bö̧'i̧nä̧ jueö isä'ca mármol pättöjueittö adicuä'canä äcu rö̧ni̧nä̧tö̧. Pä̧cuä̧huä̧cä̧'i̧nä̧ orottö'inä̧ plata'inä adicuäcä̧ ki̧na̧'a̧ ja̧'hua̧ta̧'a̧nö̧ kȩdä̧huä̧jä̧mä̧ mármolttö'inä, madreperlatt'inä (nácar pä'ö'inä ottö) ja̧'hua̧ta̧'a̧nö̧ adoquinesttö'inä adicuina̧'a̧. ⁷ Ahuähuämä oro o̧'ta̧nä̧ iyähui'ina̧'a̧. Yo̧'ta̧tȩ pö̧nä̧ ji̧na̧'a̧ ja̧'hua̧ta̧'a̧nö̧ isopäi'önä rö̧i̧na̧'a̧ ru̧hua̧mä̧ adihuä i̧sa̧ jo̧mȩttö̧. ⁸ Vino ttahuömä pähuä huȩnȩ pähuächina̧'a̧cu̧ ahuinätö̧. "Ya̧tȩ'i̧nä̧ ahui pä'ömä hue'ocö pinö." Ru̧hua̧mä̧ hue'ö ku̧ni̧nö̧ o'catoi'önä̧ ruhuodenä aditä'ijätömä, ttä̧tȩpä̧ö̧ yotucunä adiu ttesehuomenä jȩtta̧ pä'ö. ⁹ Ja̧'hua̧ta̧'a̧nö̧ ruhuaju Vasti'inä ru̧hua̧ Asuero ruhuo hueodenä aditätö nä̧tu̧cu̧ päcäri ku̧ni̧nä̧ju̧. ¹⁰ Sietenö mo̧ro̧ päi'omenä ru̧hua̧mä̧ vino ahuomenä esehuächi'önä päi'äcu Mehumanrö'i̧nä̧, Bitzarö'i̧nä̧, Harbonarö'i̧nä̧, Bigtarö'i̧nä̧, Abagtarö'i̧nä̧, Zetarö'i̧nä̧ Carcasrö'i̧nä̧ (sietenö huotö chutäcu tö'cönänö aditö ppä̧'ä̧dä̧rä̧tö̧rö̧,), pä'inö, ¹¹ chä'ca jo̧mȩ ruhuaju Vastirö isopäi'önä cu'uttähuäcu i'cächätucuiju. Ja̧u̧mä̧ ttö̧ja̧rö̧'i̧nä̧ ja̧'hua̧ta̧'a̧nö̧ chutäcu tö'cönänö aditö kuadihuä i̧jȩpa̧ pä'inö, kuadihuämä juiyo adihuinäju̧. ¹² Ja̧'hua̧nö̧ ä̧tȩpa̧'a̧nä̧, ruhuaju Vastimä ru̧hua̧ o'ätucuiju pä'ö huȩä̧jä̧u̧ jittähuäcuamä ötähui'inä̧ju̧. Ja̧'hua̧nö̧ jo̧mȩnä̧ ru̧hua̧mä̧ rö̧ȩnä̧ ra̧huä̧ri̧pinö, jacuänättö̧ ö̧'ä̧i̧mä̧ räo'önä päi'önä. ¹³ Ja̧'hua̧nö̧ jä̧cu̧ ru̧hua̧mä̧ huo̧juä̧tö̧ pä'ö ttu̧huo̧juä̧ö̧rö̧ jä'epö ä̧ju̧cui̧nö̧, mo̧ro̧ jähuä'inä huo̧juä̧tö̧rö̧ (isopäi'önä̧tä̧ ru̧hua̧ o'catoi'önä hueähuä huȩnȩ'i̧nä̧ ro̧ȩcuä̧ huȩnȩ'i̧nä̧ huo̧juä̧tu̧cu̧mä̧ pa̧'a̧nö̧ jȩpi̧nö̧) ¹⁴ Ja̧'hua̧nö̧ ja̧'a̧ ru̧hua̧cu̧ tö'cönänö aditätömä pitö ji̧na̧'a̧ Carsena'i̧nä̧, Setar'i̧nä̧, Admata'i̧nä̧, Tarsis'i̧nä̧, Meres'i̧nä̧, Marsena'i̧nä̧ ja̧'hua̧ta̧'a̧nö̧ Memucán'i̧nä̧, sietenö jo̧mȩnä̧ huotö ruhuotö Persia rȩjȩnä̧'i̧nä̧ ja̧'hua̧ta̧'a̧nö̧ Media rȩjȩnä̧'i̧nä̧. Jahuätömä ja̧u̧cu̧ todeunä aditätömä, uruhuo hueome jacuättömä ttaditähuämä korottö'i̧nä̧ yabonänö jö̧ aditinätö̧. ¹⁵ Hueähuä huȩnȩ huea'acu jȩpö̧mä̧ ¿Ruhuaju Vastirumä tocu jȩttö̧'a̧nö̧ttö̧ ru̧hua̧ Asuero huȩä̧jä̧u̧ jittähuomenä kutähue'äja'amä? ¹⁶ Memucanmä ru̧hua̧cu̧ aditätö'inä ttä'ca jo̧mȩttö̧ pä'inö: " Ruhuaju Vastimä suro ru̧hua̧rö̧tä̧mä̧cö̧ ja̧'hua̧ta̧'a̧nö̧ pi̧jä̧ rȩjȩ ru̧hua̧ uruhuo huȩä̧jä̧nä̧ ka̧cuä̧tö̧rö̧mä̧ o'catoi'önä̧rö̧tä̧ to'ija̧'a̧cu̧ jȩpä̧ju̧. ¹⁷ Isopäi'önä ruhuaju jȩjä̧ji̧ jähuämä nä̧tö̧mä̧ o'catoi'önä̧tä̧ ttu̧huo̧juä̧cuo̧tö̧. Jahuätö nä̧tö̧mä̧ ja̧u̧ jähuänä ttirecuomö̧rö̧mä̧ kö'cocotö ttäcuotö. Jahuätömä pättäcuotö: Ru̧hua̧mä̧ ä'ca jo̧mȩ ki̧'cha̧ pä'ö ä̧tȩpa̧'a̧nä̧, 'cho̧ko̧ju̧ päjäju. ¹⁸ Ja̧u̧ mo̧ro̧ ni̧pä̧chä̧cua̧'a̧ ä'canä, Persiattö'inä Mediattö'inä ucuo nä̧tö̧ ruhuaju jjȩjä̧ji̧ huȩnȩ ä̧ju̧cuä̧tö̧mä̧ ja̧u̧ huȩnȩtä̧ pättäcuotö ru̧hua̧cu̧ tö'cönänö aditätörömä. Rö̧ä̧nä̧ kä̧cua̧'a̧ kö'cöjui'ö ra̧huä̧rä̧cuä̧huä̧mä̧. ¹⁹ Ru̧hua̧ esehuächi'önä jö̧ttö̧mä̧, ucu päcu huȩnȩ huecua pä'äjusä, ja̧'hua̧ta̧'a̧nö̧ Persas ttö̧ja̧ttö̧ Medas ttö̧ja̧ttö̧ hueähuä huȩnȩ huȩyu̧cua̧'a̧cu̧ jä̧cua̧'a̧, ja̧u̧mä̧ si'epömä icuähuoca'a jä̧cua̧'a̧, Vasti'inä ucu cua'ca jo̧mȩmä̧ ichocoju käcuaju. Ru̧hua̧tä̧ karaju ruhuaju jahuäjuttö'inä yabonänö huajurö u̧ju̧nä̧cua̧. ²⁰ Ru̧hua̧ päö huȩnȩ uruhuo hueome o'cajuiyönä jiähuäcuähui'omenä, tti̧rȩcua̧mö̧mä̧ o'catoi'önätä̧ ttirecuomö̧rö̧mä̧ ttucuo ttiyäcuotö, ucuo ku̧nä̧rö̧ttö̧ kä̧mä̧dö̧ ucuo jui̧'ä̧ jubö cä'ädö." ²¹ Ru̧hua̧'i̧nä̧ ja̧'hua̧ta̧'a̧nö̧ ruhuo hue'ätö'inä ja̧'hua̧nö̧ päji̧mä tteseunä ji̧nä̧u̧. ja̧'hua̧nö̧ ja̧'a̧ttö̧ Memucan päjita'anötä̧ jȩpi̧nö̧ ru̧hua̧mä̧. ²² Ja̧u̧mä̧ huȩyu̧cuojämä juä̧jä̧mä̧ jä̧ttä̧yä̧jä̧tä̧ hue'inö, tti̧rȩjä̧ pönä ka̧cuä̧tö̧ tti̧huȩyu̧ta̧'a̧cu̧. Ja̧u̧mä̧ u̧mä̧tö̧ yotucunä̧rö̧mä̧ isode uruhuotö jö̧nä̧ ttö̧ja̧cu̧nä̧ hue'inö. Pi̧yȩ pähuä huȩnȩmä̧ ru̧hua̧ huȩä̧jä̧nä̧ ka̧cuä̧tö̧ ttucuocua'acu huȩyu̧cui̧'i̧na̧'a̧.