¹ Naamanmä ru̧hua̧ Aram umuhuäya̧ pi̧nö̧, ja̧u̧mö̧ so̧ro̧da̧u̧ Ttu̧ru̧hua̧ ji̧na̧'a̧, U̧ru̧hua̧ to̧ä̧ro̧mȩ ä'cattömä juiyo ucuo i̧sa̧ juȩi̧pa̧ ji̧na̧'a̧, ru̧hua̧ Aram adiunä ö̧ji̧pö̧nä̧, ja̧u̧ jacuänä Tu̧ru̧hua̧ ppädina'attö̧. Ja̧u̧mä̧ juiyo juruhua ucuo i̧sa̧ ji̧na̧'a̧, ja̧hua̧nö̧ ja̧'a̧nä̧ öttahuiyä lepra märichei ku̧nä̧ri̧nö̧. ² Arameo ttö̧ja̧ rohuäu tti̧cha̧'a̧ttö̧ juä̧jä̧ Israel rȩjȩttö̧ yajute isajuru ȩmi̧nä̧tö̧. Jahuäju isajumä, Naaman iracuarö ppä'ädärö ki̧nä̧ju̧. ³ Isajumä kuruhuajuru pä'inäju̧: ¡Ttö pähuäröja̧cu̧sä̧ chu̧ru̧hua̧mä̧ Samariattö Dios pä'ö huȩnȩ jiäcuähuä i̧sa̧cu̧ ö̧ja̧huȩ! Ja̧hua̧nö̧ jö̧ttö̧mä̧ ja̧u̧mä̧ chu̧ru̧hua̧rö̧ umäricheittö öipönä ppado'anöhua̧. ⁴ Ja̧hua̧nö̧ ja̧'a̧, Naaman, u̧ru̧hua̧ ä'ca jo̧mȩ 'chä̧hui̧ö̧ jiähuinö Israel ttö̧ja̧ päjäji huȩnȩ. ⁵ Ja̧hua̧nö̧ ja̧'a̧ Aramttö ru̧hua̧mä̧ pä'inö: Jitätä täi ttötä cuyärö isojänä hu̧yu̧tu̧ chi̧huȩnȩ hueö icusä, ru̧hua̧ Israel ttö̧ja̧ ttu̧ru̧hua̧rö̧mä̧, Naamannä pärätä diez talenton jo̧mȩnä̧ ȩmo̧po̧'ö̧ 'chi̧nö̧ 6milnö oro o̧bi̧'i̧nä̧, dieznö o̧ta̧ pörocuähuä'inä. ⁶ Ja̧u̧mä̧ U̧ru̧hua̧ huȩyu̧tu̧ hueojä ȩmi̧pö̧ 'chinö Israel ttu̧ru̧hua̧ru̧ iya pä'ö; juhuojänämä pa̧'a̧nö̧ pä'inö:"Jitämä pojä cuäyätö isojä rȩbȩhui̧o̧mȩnä̧mä̧; chu̧mu̧huä̧ya̧ Naamarö huedaja'amä tocuäcua̧jä̧ ja̧u̧ru̧mä̧ öttahuiyä lepra märicheittö ö̧'i̧pö̧nä̧ ppä'ädiyittö" ⁷ Israelttö ru̧hua̧ ucuocu cä'ädömä, ö̧'ca̧tä̧hua̧ta̧ sȩro̧cu̧'icu ra̧hua̧rö̧ pa̧'a̧nö̧ pä'inö: "¿ttösä tä̧ji̧ Diosmä, cuä'ö icu'inä, tta̧cua̧rö̧'i̧nä̧ chiya pä'ö aditö chicuiyarö pä'ö jäepäcusä tä̧ji̧? pidemä ttöcu urohuähua pä'ötä usu. ⁸ Pa̧'a̧nö̧ jä̧ji̧, Eliseo, Dios u̧mu̧huä̧ya̧mä̧, ä̧ju̧cui̧nö̧ Israelttö ru̧hua̧ ö̧'ca̧tä̧cua̧tä̧ sȩro̧cu̧ icuäjimä, ja̧u̧mä̧ Israel ru̧hua̧rö̧ i̧huȩnȩ hue'inö pa̧'a̧nö̧ pä'ö: ¿Ta̧'a̧nö̧ pä'ö cu̧'ca̧tä̧hua̧ta̧ sȩro̧cu̧ cuicuättö? ja̧u̧ru̧mä̧ ttö chö̧ja̧'a̧cu̧ icha hueirö ja̧u̧nu̧tä̧ u̧huo̧juä̧chi̧ä̧cua̧ Israelnämä Dios pä'ö huȩnȩ jiäcuähuä i̧sa̧ kö̧ pä'ömä. ⁹ Ja̧hua̧nö̧ ja̧'a̧ Naamanmä ä̧ji̧mö̧ ca̧hua̧yu̧tö̧nä̧'i̧nä̧, öcäruquiyänä'inä rȩbȩhui̧pi̧nö̧, ja̧u̧mä̧ Eliseo ojusode apate ä'ca pä̧tȩcuä̧nö̧ kä̧mä̧di̧nö̧. ¹⁰ Eliseomä u̧mu̧huä̧ya̧rö̧ hue'inö pa̧'a̧nö̧ pä'ö: "Jordan ajera'attö ttö̧mö̧ ko̧ro̧mö̧ttö̧ todärenö jo̧mȩnä̧ pötächiö nä'cäu icuäji, cuidepämä adihuächiäcua'a; suroju'inä juiyönätä̧. ¹¹ Naamanmä a̧'cua̧tta̧'ȩcui̧pö̧ tö'ipächö känö pä̧'i̧nö̧: to̧pi̧huä̧ ttö̧mä̧ amucuädäjisä chö̧jo̧mȩcu̧, i̧chi̧ä̧cua̧ a̧'cua̧ra̧'a̧ pä'ö, chä'ca jo̧mȩ kä̧mä̧dö̧ u̧mu̧ cä'epö Ö̧nä̧hua̧rö̧ Diosrö jä'epö u̧mu̧nä̧ mȩ'ö̧, lepra siepö i̧cuä̧cua̧, jö̧nä̧. ¹² ¿Abana'inä, Farfa'inä, Damascottö ajehuiyämä, o'cahuiyönä Israel rȩjȩ ajehuiyättö'inä abonänömä adihuocu tä̧ji̧? ¿Ja̧u̧ otottö chi'ö juiyö'anö ja̧'a̧ tä̧ji̧, chadihuächi'a pä'ö? ja̧hua̧nö̧ pä'ipö a̧cua̧ suraja'anä̧tä̧ ppä̧'a̧chä̧chi̧nö̧. ¹³ Ja̧u̧nu̧ o'comenä Naaman u̧nu̧huä̧yotö tö'cönänä 'chä̧hui̧ö̧ ttucuocuinäcu; "Ta̧mo̧nä̧ tä'ö, Dios i̧huȩnȩ ji̧cuä̧huä̧ i̧sa̧, ji̧yȩtȩ jȩcui̧ya̧dö̧ jö̧ hue'ejittömä ¿jȩcui̧ya̧nö̧ hua̧ji̧a̧? ¿Ti̧yȩ yabo ja̧hua̧nö̧ jo̧'cu̧'a̧ ajiyanätä pötächi'i näcocu icui päcujä. ¹⁴ Ja̧hua̧nö̧ ja̧'a̧ ttö̧mö̧ to̧mo̧rȩttö̧ todäre jo̧mȩnä̧ Jordan ajettö pötächi'inö, Dios u̧mu̧huä̧ya̧ huejiya'anötä̧ esetö jȩpi̧nö̧. Idepämä pa'ajita'anö adihuächi'ina'a, ya̧tȩ ji̧'qui̧chä̧hua̧ idepä a̧'cua̧ru̧nä̧tä̧ ja̧hua̧nö̧tä̧ adihuächinö. ¹⁵ Naamanmä Dios umuhuä̧ya̧ ö̧ja̧'a̧cu̧tä̧ ppa̧'a̧chi̧nö̧, chutä'inä ja̧u̧cu̧tä̧ ka̧cuä̧tö̧'i̧nä̧, rȩbȩhuä̧hui̧pö̧mä̧ ä'ca jo̧mȩ ka̧mä̧di̧nö̧. Ja̧u̧mä̧ pä'inö: "Jitämä täcö huo̧juä̧sä̧ ka̧ra̧ Dios anöhua̧mä̧ toa'a pi̧jä̧nä̧mä̧, Israel ttö̧ja̧nä̧tä̧ kö̧. Ja̧hua̧nö̧ ja̧'a̧ttö̧ jä'epösä ttö cu̧mu̧huä̧ya̧ chi̧yä̧mä̧ 'chucuäda pä'ö". ¹⁶ Ja̧hua̧nö̧ ja̧'a̧ Eliseo ädätinö: "Chu̧ru̧hua̧mä̧ kö̧ ja̧u̧tä̧ ja̧'a̧ chesetäcumä, ttömä ji̧yȩtȩ'i̧nä̧ ȩmo̧cö̧sä̧. Naamanmä Eliseorö huȩä̧ri̧nö̧ iäre iyähuä ȩmi̧ya̧rö̧ö̧ pä'ö ja̧hua̧nö̧ ja̧'a̧nä̧ ȩmo̧cö̧sä̧ pä'inö. ¹⁷ Ja̧'huanö ja̧'a̧ pä'inö Naaman: Jahuanö j'a̧'atö, jäepusä ucuro Israel rȩma̧ttö chepäpe ta̧jö̧ Mulanä̧, porö yabocumä, ttö cä̧mu̧huä̧ya̧mä iyiyä̧cua̧ kuähuä ofrenda'i̧nä̧ ka̧ra̧ diorömä̧ , Israel ttöänähua̧ Diosrötä. ¹⁸ ttö cö̧mu̧huä̧ya̧ jiyȩtetä cunöchiä pä'ö jä'epusa churu̧hua̧ ttö chu̧ru̧hua̧ i̧'chomenä̧ Rimon ojusadena ucuo teä'öi̧cho̧mȩna̧ , ttö̧ chimöna choädö chutäcutä jarȩyu̧ pädiä̧cuasa̧, churu̧hua̧ cumua̧ya̧rö̧mä piyȩ jȩö̧ttötä cunöchi'a pä'ösa. ¹⁹ Eliseo pä'inö ya̧u̧ru̧: " Yecuecuocata ta'i" Jahua'anö ja̧'atö̧ Naaman ihui'inö ²⁰ Ja̧u̧ma̧ otome jo̧ca̧'a̧tä̧ 'cha̧hui̧'i̧nö pi̧no̧ Dios hue'ä̧huä̧ Eliseo u̧mu̧ä̧ya̧ Giezi, chutä a̧möna pä'äcuinö : Ttö churu̧hua̧ jaropiäji mipponä iyahuä arameo i̧sa̧ Naaman, churu̧hua̧ 'cuäppunä kö̧, o'canä jochä̧ cua̧sä iyättö pä'ö ²¹ Jahua'anö ja̧'atö Giezi Naaman O'canä chinö . Naaman o'cacu ijärachomȩna̧ topinö ya̧tȩ jopö icha'a, jahuano jiyäca ocarucätto meyehuächö 'chähui'inö teähurö pä'ö, jäepinäcu: ¿Ji̧yȩte surojö 'cuäopaäa täji ? ²² Giezi pä'inö "Adiuna̧tä ja̧'a̧", ttöro ichätö Efrain de'ätö ta̧ju̧ muäyotö profeta ttitimö̧, micuä juyöna, cuiyä pä'o ya̧'a̧te päräte plata ttö jahuanö ja̧'a̧ to̧ta̧rȩ puja̧ta̧. ²³ Naaman mä ädätinö riänä eseusä ta'are talentos jȩmȩnä̧ chiyacö pä'ömä . Naaman Gieziö huȩä̧ri̧nö̧ ja̧hua̧ta̧nö̧ ta'are talentos plata jähuä nö'quinö tojäre dötäyösojänä , Pö̧jä̧ta̧ to̧da̧rȩ'i̧nä päröcuacö iyinö ,ja̧hua̧ta̧nö̧ ömöhuäyottö ta̧ju̧ru̧ sȩtädö iyinö, juätumä dotäyö ojä epinätä̧tö Giezi ippeyämenä ²⁴ Giezi täcu möä'ca sabnebä jo̧mȩ rä̧bȩhui̧nö̧ ja̧u̧mä̧ dotayö 'ojä ȩmi̧nö Ö̧mö̧nä̧ ,Ja̧hua̧ta̧no̧ daju icuinö isodenä; ja̧u̧mä̧ ttumuhu äyotörö Oto hue'icuinö̧ juätumä̧ i̧huinä̧tö̧ ²⁵ Giezi täcu doächi'inö ja̧hua̧ta̧nö̧ Ö̧rö̧hua̧ ä'cajo̧mȩ kä̧mä̧di̧nö̧ Eliseo pä'inö ja̧u̧ru̧ : ¿ Giezi, tottu cuichaja̧'a̧ttö̧? ja̧u̧mä̧ ädätinö " cu̧mö̧huä̧ya̧mä̧ " c'ho̧cu peji ji̧nȩtȩ pä'o'inä?" ²⁶ Giezi rö pä'inö Eliseo mä̧ "¿c'ha̧cua̧rö̧hua̧mä̧ Ucucumä c'cho̧ca̧ja̧ tä̧ji̧, ubo ppä̧'a̧chȩi̧nö̧mä öäre carucänä U̧'o̧cui'acö pä'ö? ¿piye pä̧nämä̧ pärätä'inä ttiganä a̧ pätä pä'ö ja̧'a̧ti̧ , ja̧hua̧ta̧nö̧ Olivo'inä viña ä ku̧nä̧ huä̧'inä̧ Ohuejatö̧'inä pa̧cäyö̧'inä̧ ja̧hua̧ta̧nö ttömöhuäyoturu'inä? ²⁷ ja̧hua̧nö̧ ja̧'a̧ttö̧ , Naaman ömärichei lepramä Ucura kä̧mä̧da ja̧hua̧ta̧nö̧ cuahuäröhaä 'cotörö'inä 'cuäopanätä̧ Ja̧hua̧nö̧ ja̧'a̧ Giezimä i̧hui̧'i̧nö a'camettömä̧, lepra ko̧nä̧rö̧tä̧ diyahua̧ppȩ teä̧ppȩ 'ka̧cua̧rö̧nä̧tä̧