¹ Ru̧hua̧mä̧ Jerusalennnä ka̧huä̧tö̧ttö̧'i̧nä̧, Judasttö ja̧ttö̧'i̧nä̧, Böosotörö ä̧tȩpi̧nö̧ ji̧na̧ yo̧mȩtȩ pättia pä'ö. ² Jerusalen ttö̧ja̧'i̧nä̧, Judas ttö̧ja̧'i̧nä̧ o'catoinäcu̧ Tu̧ru̧hua̧ Dios ojusodera'a huä̧mi̧pi̧nö̧, ja̧u̧cu̧mä̧ 'chi̧nä̧tö̧, Sacerdote'inä; Dios i̧huȩnȩ jiäcuähuä ttö̧ja̧'i̧nä̧, ppo̧'ä̧tö̧ttö̧ kä̧mä̧dö̧ ttä̧mu̧ra̧'a̧ cä'ädö ka̧cui̧nä̧tö̧ ru̧hua̧mä̧ Dios ojusodettö cuyärö oba po̧cui̧ pi̧nö̧, ja̧u̧ttö̧ 'ca'epi ttö̧ja̧ ttö'cattö Dios päinö huȩnȩ ucuocuinö. ³ Ja̧u̧nö̧ o'comenä chi'ecuä'ca ppeye kä̧mä̧dö̧ Dios ä'cattö järeächiönä ucuocuinö, iso päinä päcuinö ta̧'a̧nö̧ jȩtä̧cuo̧ttö̧jä̧, huȩyu̧cui̧'i̧nö̧mä̧ tami iso'qui o'cahuiyönä, ta̧mu̧cuädö o'ca juiyönä, jȩtä̧cuo̧tö̧jä̧ cuyärö obanä huȩyu̧cui̧'i̧nö̧mä̧. O'ca toinä ttö̧ja̧mä̧ iso päinä jȩtä̧cuo̧tö̧jä̧ päinätö̧. ⁴ Ja̧u̧nö̧ o'comenä sacerdote ttu̧ru̧hua̧ hueipä Hilciasrö, todärenä päiönä hueähuä ttö̧ja̧ Sacerdote'inä, Dios ojusode apate ä'ca tta̧hua̧ rä̧cuä̧huä̧ ttö̧ja̧rö̧'i̧nä̧ hue'inö, Tu̧ru̧hua̧ ojusodenä ka̧cu̧, ttö̧ä̧nä̧hua̧ Baalrö'inä, Aserarö'inä, o'ca juiyönä mo̧ro̧jä̧ jähuä esetö jȩttä̧jö̧ jahuämä, Cedrón mejecara'attö ku tticuaja hueinö; jua'amä Jerusalen umittö ji̧na̧'a̧, cuoö icuäsa a̧ya̧ri̧sa̧tä̧ ä̧pi̧nä̧tö̧ Betelra'amä. ⁵ Judasttö, acuomenä ruhuotö, sacerdote jö̧nä̧ tätähuä o'ca esetö ku icu iyähuä jȩtta̧ pä'ö huettinäurumä rä'opö icuinäu̧, juätömä Juda ötahuiyättö'inä, Jerusalenttö'inä ku icu iyähuä iyächinätö ttö̧ä̧nä̧hua̧tö̧ Baalrö 'inä, ka̧hua̧rö̧'i̧nä̧, yodo ka̧hua̧rö̧'i̧nä̧ Zodiacorö'inä o'ca juiyönä mo̧ro̧jä̧ jahuärö'inä. ⁶ ja̧hua̧ta̧'a̧nö̧ ru̧hua̧mä̧ Aseru a̧'cua̧ juiyä'inä, Dios ojusodettö rä'opö 'tticua pä'ö hueinö Cedro meje'cara'acu jua'amä Jerusalen umi ji̧na̧'a̧ juoruttö ku icuinätö̧, a̧ya̧ri̧sa̧ päiome jubö, ja̧u̧nö̧ o'comenä ötahuiyä ttö̧ja̧ tti̧tti̧mö̧ huattomecu do'opö icuinätö̧. ⁷ Korome ttö̧ä̧nä̧hua̧ ju̧ Aserarö; nä̧tö̧ o̧ta̧ tö'töpö tti̧yä̧ i̧jo̧mȩ'i̧nä̧, Dios ojusodettö ttirecuo pocucu jȩtta̧ 'chä̧i̧jö̧ o̧ca̧hui̧yä̧'i̧nä̧ näcö icuinätö̧. ⁸ Josiamä o'catoinä sacertode huotörö Judas jäyänä ka̧cuä̧ i̧jä̧tö̧rö̧ i'cächinödo, o'ca juiyönä sacerdote huotö ku icu ttiyaijö o'co jȩpö̧ icuinö. Gebattö kä̧mä̧dö̧, Beerseba jubö ja̧hua̧ta̧'a̧nö̧ jerusalen huȩ'ä̧hua̧ ru̧hua̧ Josue apate ä'ca ku icu iyähuä jȩttä̧i̧yö̧ o̧'ca̧'i̧nä̧ jȩpö̧ icuinö, ja̧u̧mä̧ ka̧cui̧na̧'a̧ apate ö'ohue ja'anä. ⁹ Sacerdote huotö Diosrö esetecotö ttiäre iyähuä iyäjisä törömä jerusalenttö ttiäre iyäcuä ku icu jȩttä̧'i̧yö̧ o'canä ttädita pä'ömä huȩo̧co̧u̧ pi̧nä̧tö̧. Juätömä pan ppö̧ä̧mö̧ juiyönä cuäcuähuä tti̧jä̧hua̧tö̧cu̧ cuinätö̧. ¹⁰ Ja̧hua̧ta̧'a̧nö̧ Josiamä Tofet pä'ö micuo̧'ca̧ Ben Hinom möä'ca kada'ca pämärächiome ki̧na̧'a̧, juoröttö tti̧tti̧mö̧ u̧mä̧tö̧rö̧'i̧nä̧, nä̧tö̧rö̧'i̧nä̧ ocuränä ku icu iyäijome ji̧na̧'a̧ ttö̧ä̧nä̧hua̧ Moloc'rö. ¹¹ Ja̧u̧mä̧ a̧mi̧pi̧nö̧ ca̧hua̧yö̧tö̧rö̧, Judasttö ruhuotö kä̧hua̧rö̧ ttiyinäu̧rö̧'i̧nä̧, juätömä Dios ojusode apate ä'ca i̧sa̧rö̧nä̧ ka̧cui̧nä̧tö̧, Ennöco Nata Melec ä'ö o̧'ca̧hui̧yä̧ tö'cö ji̧na̧'a̧, ja̧u̧mä̧ ru̧hua̧ ö̧jodenä adicuä i̧sa̧ ji̧na̧'a̧. Josiamä ku icuinö caruquiyä ka̧hua̧rö̧ ttiyanö o'ca'inä. ¹² Ja̧hua̧ta̧'a̧nö̧ ru̧hua̧mä̧ Acaz ö̧jo̧'ca̧ huä̧mȩ ka̧cu̧ o'ca'inä jȩpö̧ icuinö, Judasttö ruhuotö ttaditinö o'ca ji̧na̧'a̧, Manases aditinö o'ca'inä, Dios ojusode apate ariyä'inä. Josiamä ppo̧u̧cu̧ pö̧nä̧ diri'icu, Cidrón pämärächio pppmä do'opö icuinö. ¹³ Ja̧hua̧ta̧'a̧nö̧ ru̧hua̧mä̧ Jerusalen huȩnȩ ka̧cu̧ o'ca'inä jȩpö̧ icuinö, dea'acu Salomon suronä jȩi̧na̧'a̧cu̧ttö̧, Israel ttö̧ja̧ ttu̧ru̧hua̧, ttö̧ä̧nä̧hua̧ Astoret'rö aditönö Sidonio ttö̧ä̧nä̧hua̧rö̧m Quemos'inä, Moab ttö̧ä̧nä̧hua̧ ji̧a̧'a̧ Milconmä Amon ttö̧ja̧ ttö̧ä̧nä̧hua̧ ji̧na̧'a̧. ¹⁴ Tätähuä o'cahuiyö'inä, diosa Asera ka̧'cua̧juiyä'inä jȩpö̧ icuinö, juȩnȩmä̧ huainätö̧ ttihue'quiyö osottö a̧tto̧pö̧ icuinö. ¹⁵ Josiasmä ja̧hua̧ta̧'a̧nö̧ Betelnä tätähuä o'ca ka̧cu̧'i̧nä̧ jȩpö̧ icuinö, Jeroboamä Nabat i̧tti̧ ji̧na̧'a̧, Israel ttö̧ja̧ suronä jȩttö̧nä̧ jȩpi̧nö̧ ji̧na̧'a̧, tätähuä o'ca aditö iyö ja̧u̧'i̧nä̧ jȩpö̧ icuinö ku icu iyähuä o'ca'inä Asera ka̧cuä̧ji̧yä̧'i̧nä̧ i̧sa̧ppä̧ päiönätä̧ jȩpö̧ ku icuinö. ¹⁶ Pä'äjita'anö ppa̧'a̧chi̧ö̧ Josiamä juȩnȩ to̧pä̧rö̧ ki̧nö̧, juoröttö hua̧'a̧rȩsa̧ amucuädinö, ja̧u̧nu̧ o'comenä umuhuäyotörö ttihue'quiyö osa ttö'ca'ca̧ta̧ pä'ö hueinö, ja̧u̧mä̧ ku iyähuomettö ku icu, soroju jȩpjnö̧, pi̧yȩmä̧ 'cuäopina'a Dios i̧huȩnȩ jiäcuähuä i̧sa̧ jiähuinö'a̧nö̧tä̧. ¹⁷ Ja̧u̧ päinö ¿Däje ttaditinö tochättö ttömä? ötahuiyä ttö̧ja̧mä̧ pättinäcu̧, juäsa hua'aresamä Dios uhuhuäyotö Judara'attö ichinä̧tö̧ huattome pi̧yȩ ku icu Betelttö jȩcuä̧ji̧mä̧ ä'canä̧tä̧ jiähuinätö̧. ¹⁸ Ja̧hua̧nö̧ jä̧cu̧ Josiamä pä'inö, ja̧u̧nu̧mä̧ ttu̧huȩcuä̧nä̧tä̧ topätucui, ya̧tȩ'i̧nä̧ mȩa̧ pä'ö jo̧ca̧'a̧ ttihue'quiyumä, ja̧hua̧nö̧ ja̧'a̧ ttö ötahuiyä ttö̧ja̧mä̧ ttu̧huȩcuä̧nä̧tä̧ topinätö̧ Samariattö ichinätö̧ Dios pä'ö huȩnȩ jiäcuähuä ttö̧ja̧ ttihue'quiyu'inä. ¹⁹ Samaria ötahuiyä huä̧mȩ o'cajuiyönä ka̧cu̧ odemä, Israelttö ruhuotö ttaditinö ji̧na̧'a̧, ttaditomenämä Dios ö'ä'inä öju̧nä̧ Jȩpi̧nä̧tö̧. ²⁰ O'catoinä Sacerdote huoturumä cuä'ö icuinö ja̧hua̧ta̧'a̧nö̧ ttö̧ja̧ ttihue'quiyu'inä ttuhuämenä huanö ku icuinö, ja̧u̧nu̧ o'comenämä Jerusalenra'attö ppa̧'a̧chi̧nö̧. ²¹ Ja̧u̧nu̧ o'comenä ru̧hua̧mä̧ o'catoinä ötahuiyä ttö̧ja̧rö̧ hueinö, jitämä pascua pä'cäri jȩpö̧ cu̧ru̧hua̧tu̧cu̧ Dios esehuätucui, piba cuyärubanä huȩyu̧cui̧'i̧na̧'a̧ttö̧. ²² Pi̧yȩ pascua pä'cärimä Israelttö jueces huettinö mo̧ro̧ttö̧ kä̧mä̧dö̧ ja̧hua̧ta̧'a̧nö̧ Israelttö ruhuotö'inä, Judasttö ruhuotö'inä jȩtto̧cö̧ ji̧nö̧ ji̧na̧'a̧. ²³ Ja̧hua̧nö̧ ja̧'a̧nä̧ pi̧yȩ pascua pä'cärimä ttu̧ru̧hua̧rö̧ ucuotö jȩä̧cuä̧huä̧ jȩpi̧nä̧tö̧ Jerusalenttö̧, año diesciochonä ru̧hua̧ Josia hueinö pänä. ²⁴ Ja̧hua̧ta̧'a̧nö̧ Josiamä huainätu̧cu̧, isoppa huotöcu ucuocuätöjä pä'ätörö'inä hueö icuinö, koro a̧'cua̧juiyä tesetäijö'inä, surojö tottömä Jerusalenttö̧'i̧nä̧, Judas rȩjȩttö̧'i̧nä̧ siepö icuinö, hueähuä huȩnȩ pätecuächu'anö jȩpi̧nö̧, Sacerdote Hilcia Dios ojusodettö o̧u̧cui̧nä̧'tänä pä'öta'anä. ²⁵ Ä'canä hueinättö̧mä̧ Josia'anö jue'inätö̧mä̧ to'ina'a, u̧ru̧hua̧rö̧ amiso'qui o'ca juiyönä, a̧cua̧rö̧ o'ca juiyönä, amucuädö o'ca juyönä u̧ru̧hua̧rö̧ repeö Moiserö hueähuä huȩnȩnä̧ hue'inö ta'anö jȩpi̧nö̧, juȩnȩ o'comenämä ru̧hua̧ Josia'anö hua̧mä̧ rä'opocupinö. ²⁶ Ja̧hua̧nö̧ ja̧'a̧nä̧'i̧nä̧ ri̧ä̧nä̧ ö'äimä diya däcuähuocö pinö Judá ttö̧ja̧cu̧mä, Manasés korotö ttöänähuo̧ttörö ucuotö jȩttönä huei na'attö̧. ²⁷ Ja̧hua̧nö ja̧'attö Diosmä painö: ttömä judá ttömä pporächiösä, Israel ttö̧ja̧ttö̧ chöpporiä chi'inö'anö, Jerusalénmä 'quȩ'ȩpö̧ chȩmi̧no̧mȩ ja̧'a̧nä̧, icuipösä, juodettömä päinösä, juȩnȩtä̧ köja̧cua̧sä̧ttö̧mä̧. ²⁸ Josias koro jȩi̧nö̧mä̧, koro'inä o'ca juiyönämä; ¿huȩyö̧cui̧ o̧ca̧'a̧ ji̧na̧'a̧ tä̧ji̧ cronica cuyäru'tänämä Judattö ruhuotö jȩtti̧nö̧mä̧? ²⁹ Josias hueinö pänä Faraon Necao Egipto ru̧hua̧mä̧, Asiria ttö̧ja̧rö̧ ppä'ädö 'chi̧nö̧ Eufrate ajera'attö, jua'attö Josias topäcuähuinö Necaorö ttorahuahuome rö'cottö Necaomä Josiarö cuä'ö icuinö Meguidottö: ³⁰ Jua'a Meguiora'attö Josias umuhuäyotö caru'cänä rutipö ttä̧mi̧pi̧nä̧cu̧ Jerusalén ra'acu, jua'atä rȩ'ä̧dö̧ tticuinäcu, ja̧u̧nö̧ o'comenä; juä̧jä̧ ttö̧ja̧mä̧ Joacazrö ȩmi̧nä̧tö̧, ja̧u̧mä̧ Josias i̧tti̧ ji̧na̧'a̧, unä a̧dȩja̧ huä̧nö̧; ru̧hua̧ ö̧jö̧nä̧ jä'o hueinö o'come hueinö. ³¹ Joacaz 23 a̧'ȩ hua̧ kä̧mä̧di̧nö̧ ruhuo huea pä'ö Jerusalénämä hua̧mȩ tucuätä hueinö ja̧ju̧ ki̧mi̧mä̧ Hamatal pä'ö micuinäju; ja̧ju̧mä̧ Jeremia Libana ttö̧ja̧ i̧sa̧ ittiju ji̧na̧'a̧. ³² Joacazmä Tu̧ru̧hua̧ ä'ca jo̧mȩttö̧ suronä jȩpi̧nö̧, jä̧do̧tö̧ mi̧nä̧ suronä jȩtti̧nö̧'a̧nö̧tä̧. ³³ Faraon Necaomä Hama rȩjȩ Ribla ötahuiyättö cärenä utinäcu, Jerusalén hueö juiya pä'ö, ja̧u̧nä̧ o'comenä cien talento jo̧mȩnä̧'i̧nä̧, yaute talento oro jä'epinäcu imitahua pä'ö. Joacim Judanä hueinö. ³⁴ Ja̧u̧nu̧ o'comenä ru̧hua̧ Necaomä, Josías i̧tti̧ Eliaquinrö, jä'o ru̧hua̧ ö̧ji̧nö̧ o'come ö̧ja̧ pä'ö, ja̧u̧mä̧ i̧mi̧ pärotö icuinäcu, Joacim pä'ö. Ja̧u̧nö̧ o'comenä otó ȩmi̧pi̧nö̧ Egipto ra̧'a̧ jua'attö cuä'ö icuinäcu. ³⁵ Joacimtä mitäcuinö Faraonrömä, pärätä'inä oro'inä. Juä̧jä̧nä̧ ttö̧jö̧ micuä ttimitähua pä'ö jä'epinö o'catoinä juä̧jä̧ ttö̧ja̧rö̧mä̧, pi̧yr pärätämä ttimitähuinö Faraon Necaorö. ³⁶ Joacim 25 a̧'ȩ ku̧nä̧ri̧nö̧ ruhuo huea pä'ö, ö̧ja̧mä̧di̧nö̧mä̧, to̧mu̧rȩttö̧ yaute a̧'ȩ jo̧mȩnä̧ hueinö Jerusalénämä. Ja̧ju̧mä̧ micuinäju Zeduba pä'ö; Ja̧ju̧mä̧ Pedaia Ruma ttö̧ja̧ i̧sa̧ ittiju ji̧na̧'a̧. ³⁷ Joacim'inä Suronä jȩpi̧nö̧ Tu̧ru̧hua̧ ä'ca jo̧mȩttö̧, jä̧do̧tö̧mi̧nä̧ jȩtti̧nö̧'a̧nö̧tä̧.