1
Kã jezi save ki fariseus tãte ki li te ka batxize pi boku djisip ki Jã
2
( kõsa jezi pa te ka batxize, selmã so djisip-iela),
3
lese Judeia i hutõnẽ pu Galileia.
4
A te oblije li te pase pu Samaria.
5
Ẽbe, vini la un pei dji Samaria, un kote ki ie te aple Sicar, phos obo late ki jacó te bai pu so pitxit José.
6
Te gãiẽ laba un pi dji Jacó. Jezi te fatxige dji voiaz, i li asi obo pi. A te bodji lo midji.
7
Un fam samaritana vini plẽ djilo, i Jezi dji pu li: ''Bãmo bue djilo'';
8
pase so djisip-iela te ale la pei axte mãje.
9
Ẽbe, fam-la samarita dji pu li: ''Kumã, u sa judeu, ka dumãde dji mo, ki mo sa un fam samaritana, djilo pu u bue?''; pase judeus i samaritanos ie pa te ka dako.
10
Jezi hepon: 'Si u kõnet phuesãs dji Bõdje, i ki mun a ki ka dji: 'Bai mo dji bue', u mem ki ke dumãdel, i li te ke bai u djilo dji lavi''.
11
I fam-la hepon li: ''Sẽie, u pa gãiẽ un sio, i pi-la li biẽ fõ; kote u ke tihe sa djilo dji lavi?
12
Pa lakos u pi gho dji ki no papa Jacó, ki bai no pi-la dji kote li mem mem bue djilo ke so pitxit i so bef-iela?''.
13
Jezi hepon: ''Sa ki bue dji sa djilo-la ke gãiẽ suef ãko;
14
mẽ sa ki bue dji sa djilo ki mo bai, pa ke jẽ gãiẽ suef. Pu mio, djilo ki mo ke bai u li ke tõnẽ un fonte dji djilo ki ke jite pu lavi etehnel''.
15
I fam-la dji pu li ''Sẽie, bai mo dji sa djilo, pu mo pa gãiẽ suef ãko, i pu mo pa vini isi txihe''.
16
Jezi dji pu li: ''Ale, aple u om i tõnẽ isi''.
17
I fam-la hepon li: ''Mo pa gãiẽ om''. Jezi, ẽbe, dji pu li: ''Hepon biẽ: 'Mo pa gãiẽ om',
18
pase mo te gãiẽ sẽk, sa ki gãiẽ ato apa u pa! La u koze lavehite-la''.
19
I fam-la djil: ''Sẽiẽ, mo ka ue ki u sa un profeta.
20
No papa-iela te ka adohe lasu sa mõtãi, mẽ zot dji ki Jerusalém a kote-la ki gãiẽ dji adohe''.
21
Jezi hepon-li: ''Fam, khe lasu mo, ki ke hive tã-la ki nẽ lasu sa mõtãi-la, i nẽ la jerusalem, zot ke adohe papa.
22
Zot ka adohe sa ki zot pa kõnte, no ka adohe sa ki no kõnet, pase sauvasiõ ka vini dji judeus.
23
Ẽbe ka hive lo-la, i deha hive, ki sa-iela ki ka adohe dji lavehite ke adohe papa la lesphui i la lavehite, paske a sa kalite adohasiõ ki papa ka sase.
24
Bõdje a lesphui, i sa-iela ki adohel gãiẽ dji adohel la lesphui i la lavehite''.
25
I fam-la dji pu li: Mo save ki Messias ka vin, Sa ki kaple 'Jezi khi'. Kã li ke vini, li ke esplike tut pu no''.
26
Jezi dji pu li: ''Mo sa, sa ki ka pale ke u''.
27
I la sa mumã-la so djisip-iela hive ie hete xaghẽ paske li te ka kose ke un fam; mẽ, pies un dji ie dumãde: ''Akisa u ka sase?'' ou '' Pukisa u ka kose ke li?''.
28
Ẽbe fam-la lese so ja, i tõnẽ pu pei-la, i dji pu mun-iela:
29
''Vini, i ue om-la ki hakõte mo tut bagaj-iela ki mo fe. Apa sa la ki a Jezi Khi?''.
30
Ie lese pei-la i vini juk kote li.
31
Ixtã sa, djisip-iela te ka dumãde: ''Rabi, mãje''.
32
Mẽ li dji pu ie: ''Gãiẽ un mãje pu mãje ki zot pa kõnet.''
33
djisip-iela te ka dumãde un pu uot: ''Khe ki a un mun ki pote mãje pu li mãje?''.
34
Jezi dji pu ie: ''Mo mãje a fe võlõte dji sa ki voie mo, i kõplete so thavai''.
35
Zot pa ka dji: 'Ka mãtxe tuju kat mua pu thie-la?'. Mo ka dji pu zot: leve zot uei e ue plãtasiõ, pase ie deha pahe pu thie-la!
36
Sa ki ka thie ka husuve so peimã i ka hamase fui pu lavi etehnel, pu hete kõtã ãsam ke sa ki ka sõmẽ i thie.
37
Kõsa djitat-la a avue: 'Un ka sõmẽ i uot ka thie'.
38
Mo voie zot pu thie kote pa gẽ thavai; i uot te ka thavai, e zot te ãthe la thavai dji ie''.
39
Boku dji samaritanos dji sa pei-la te ka khe lasu li palakos dji tẽmuẽ djisa fam-la: ''Li hakõte mo tut ki mo te fe''.
40
Ẽbe, kã samaritanos vini juk kote li, ie tele tho boku li te hete ke ie, i li hete laba de ju.
41
I pi boku mun khe palakos dji so pahol.
42
Ie te ka dji pu fam-la: ''No khe, nõ pakakos dji u pahol, pase no mem mem kute, i ato no save a sala ke sove tãla''.
43
Aphue dji sa ju-iela, li ale pu Galileia ;
44
pase phop jezi te dji ki un profeta pa gãiẽ kõtatmã la so phop late.
45
Kã li hive la Galileia, galileu-iela husuvel. Ie te ue tut bagaj-iela ke li te fe la Jerusalém la fet-la, pase ie te ale osi la fet-la dji Pak.
46
Li huvini ãko pu Caná dji Galileia, kote li te thãsfõmẽ djilo la vẽ. Te gãiẽ jis oficial dji hue, i so pitxit te malad la Cafarnaum.
47
kã li tãde ki Jezi te lese Judeia i hutõnẽ pu Galileia, li ale juk kote Jezi dumãde suple pu li te desan i djiehi so pitxit ki te obo lamo.
48
Jezi, ẽbe, dji pu li: ''Si zot pa ue sin i mihak, zot pa ka khe''.
49
I oficial hepon: ''Sẽie, desan ke mo ãvã mo pitxit muhi''.
50
Jezi dji pu li: ''Ale, u pitxit ka viv''. I om-la khe la so pahol ki Jezi te dji pu li, i ale.
51
Ixtã li te ka desan, so djisip-iela kõthe li, ka dji ki so pitxit te vivã.
52
Ẽbe li dumãde ie a kitã li hete mĩo; i ie hepon: ''Aie nãnuit, la setzem lo, lafiev lesel''.
53
I papa-la hekõnet ki sa ate lo-la ki jezi te dji: ''U pitxit ka viv''; ẽbe li i tut so la fãmi ie khe.
54
Sa ate dezem mihak ki jezi fe kã li vini dji Judeia pu Galileia.