¹ Te gãiē un fariseu ki so nõ a te Nicodemos, un xef dji Judeus. ² Li vini kote jezi nãnuit i li dji: "Rabi", no save ki u sa un met ki vini dji bõdje, pase pies mun pa puve fe sa sinal-iela, sã bõdje pa ke li". ³ Jezi hepon: "La lavehite, la lavehite mo Ka dji u: si un om pa huvet ãko, li pa puve ue lahosiel dji bõdje". ⁴ Nicodemos dji pu li: "Kumã un om puve hufet si li vie? Li puve ãthe un dezam fue la van dji so mãmã i hufet ãko?". ⁵ Jezi hepon: "La lavehite, la lavehite, mo ka dji u: ki mun ki pa fet dji djilo i dji djisphui pa puve ãthe la lahosiel dji bõdje. ⁶ Sa ki a fet dji laxe a laxe, i sa ki a fet dji lesphui a lesphui. ⁷ Pa hete susphan dji mo dji u: 'Nesesite dji zot hufet ãko'. ⁸ Vã-la ka sufle kote li le, i ka kute so thē, mē pa save dji kote li ka vini i nē kote li ka a le. i kõsa a tut sa ki fet dji lesphui". ⁹ Nicodemos hepon li ka dji: "Kumã puve sa sala?". ¹⁰ Jezi hepon li: "U ki sa met laba la Israel, pa ka kõphan sa bagaj-iela? ¹¹ La lavehite, la lavehite, mo kadji u: No ka koze dji sa ki no save, i testxifike dji sa ki no ue; i kõsa mem zot pa ka aseite no tēmuē. ¹² Si mo pale pu zot bagaj zafe late i zot pa khe, kumã zot ke khe si mo hakõte zafe bagaj dji lahosiel? ¹³ Pies mun pa jãmē mõte la lahosiel, si nõ sa ki desan dji lahosiel, pitxit dji om. ¹⁴ Kõsa kumã Moisés leve siapã-la la deserto, pitxit dji om li gãiē dji leve, ¹⁵ pu tut sa-iela ki Ka khue lasu li gãiē lavi etehnel. ¹⁶ Pukisa bõdje kõtã dji tã-la dji un mãiē ki bai so pitxit unigênito, pu tut sa ki ka khe lasu li pa muhi, mē gãiē lavi etehnel. ¹⁷ Pase Bõdje pa voie so pitxit lasu tã-la pu kõdãnẽ mun-iela, mẽ ki tã-la puve sove palakos dji li. ¹⁸ Sa ki ka khe lasu li pa ke sa kõdãnẽ. Mẽ sa ki pa ka khe li deja kõdãnẽ, pase pa khe la nõ dji Unigênito Pitxit dji Bõdje. ¹⁹ Sa la a julgamento: ki lime vini lasu tã, i om-iela hete plis kõtã dji suku dji ki lime, pase ie thavai te boku mal. ²⁰ Pase tut sa ki ka fe dji mal hai lime i pa ka vin pu lime, pu so thavai pa pahet. ²¹ Mẽ, mun ki ka viv lavehite-la ka vini pu lime, ãvi dji ue biẽ kle ki thavai ie fe la Bõdje. ²² Aphue dji sa, Jezi i so djisip-iela ie ale pu hejiõ dji judeia, kote li pase un tã ke ie, i laba te ka batxize. ²³ Jã osi te ka batxize la Enom, phox obo Salim, pase laba te gãiẽ boku djilo, i mun-iela te ka vini jis kote li i li te ka batxize-ie, ²⁴ Pase Jã pa te ãko ale phui la phuisiõ. ²⁵ I fet un djiskusiõ ke un dji djisip-iela dji Jã i un judeu ãle cerimônia dji purificação. ²⁶ Ie ale jis kote Jã i ie dji pu li: ''Rabi, akisa ki te ke u la out bo dji Jordão, lasu ki mun u te ka bai tẽmuẽ, i li ka batxize i tut ka ale kote li''. ²⁷ Jã hepon: ''Pies mun pa puve husuve ãiẽ, si li pa bai dji lahosiel. ²⁸ Zot mem a tẽmuẽ dji sa ki mo dji: ' Mo pasa jezi khi', mẽ li dji: mo vini djivã dji li'. ²⁹ Noiva li sa dji noivo, mẽ kamahad-la dji noivo, ki la i ka kute, ka hete boku kõtã palakos vue dji noivo. I kõsa mo kõtatmã li kõplet. ³⁰ I buẽze ki li ka khã i mo ka hete pitxi. ³¹ Sa ki ka vin dji ãle li ãle dji tut; sa ki ka vin dji late a dji late; i ka pale dji bagaj dji late. Sa ki ka vin dji lahosiel li ãle dji tut. ³² Li ka pale dji sa ki li tãde i ue, mẽ pies mun pa ka aseite so tẽmuẽ. ³³ Mẽ sa ki ka aseite so temuẽ ka dji ki Bõdje a lavehite. ³⁴ Mẽ sa ki voie dji Bõdje ka pale dji pahol Bõdje. Pase so lesphui ka bai sã medjid. ³⁵ Papa kõta so pitxit i hãde tut bagaj-iela la so lãmẽ. ³⁶ Sa ki khe lasu pitxit ka gãiẽ lavi etehnel, mẽ sa ki pa kute pitxit pa ke gãiẽ lavi, mẽ lasu li ka hete ãhaj dji Bõdje.