¹ Laa bonla n den pendi, o bado Asuelusi den duoni Hamedata bijua Hamana. O den pugini o ti kpiagidi, ki duoni o bali ke o cie ya koanbala n ye o diema nni. ² O bado cancantieba, yaaba n den taagi o bado cancanli po kuli den gbaandi ki kpiagidi Hamana kelima o bado n den ñani o ñoabonli ki bili yeni. Ama Malidoke wani den yie ke o kan gbaani ki kpiagi Hamana. ³ Lanwani o bado cancantieba, yaaba n den taagi o diegu cancanli po den buali Malidoke: Be yaa po ke a miidi o bado maama ? ⁴ Bi den lindi ki buali o laa buali ke waa cengi ba, kelima o den yedi ke o tie Jufi. Lanwani bi den waani Hamana. ⁵ Hamana moko den laa ke Malidoke yiedi kaa gbaandi ki kpiagidi o. O pali den beni boncianla. ⁶ Bi den waani o Malidike n tie ya buolu yua. O den sua ke o ya kpa Malidoke bebe waa ñani yianu. Lanwani o den bua ki bolini Malidoke buolu, lani n tie ya Jufinba n den ye o bado Asuelusi diema nni kuli. ⁷ O bado Asuelusi bali piiga n binlieli binli o hmakpialo ban yi yua Nisa ya nii nni, Hamana den teni ke bi toani tiatia. Bi den toani tiatia yeni ki baa la ban baa taa ya hmaalo leni ya daali ki bolini Jufinba. ⁸ Lani yaa puoli Hamana den yedi o bado Asuelusi: U nibuolu ye ki yayadi a diema kuli nni kaa taa leni ya nibuoli n sieni. Bi pia ya balimaama n ki ta leni ya nibuoli n sieni, baa kubi fini o bado bali maama mo. Bi yaa cedi ba suo li kan ya hani a po. ⁹ Fini o bado ya sua ke li dagidi, han ñani a ñoabonli ki diani ki bili ke ban bolini ba. Lani, n baa ta halinjufa yua ya kpiagu n pundi kilo tudakobi taa ki teni yaaba n kubi iligi hantaadi ban tieni a halimano nni. ¹⁰ O bado den pidi o ñoabili ki teni Agogi buolu yua Hamedata bijua Hamana Jufinba yibalo. Ki yedi: ¹¹ Ya kubi aligi, n puni a u nibuolu yeni, han tieni u han bua maama. ¹² O hmkpialo piiga n dantaali daali bi den yini o bado tidianla ke bi diani Hamana n yedi ba yaala kuli. Bi den diani ki soani mi diema kuli nni bi yudancianba leni bi badibaanba leni nibuolu kuli yudanba kani. Bi den diani ki soani diebiga kuli po nani ban dangi maama leni ya nibuolu n ye ki nii nni n maadi ya mabuolu. Bi den diani nani o bado wani oba n diani yeni, ki ta o bado ñoagobima ki tieni o maalima. ¹³ Bi den teni a tila yeni a tonda ke bi gedini a o bado diema nni kuli ki tenteni. A tila yeni nii nni li den bili ke ban kpa ki bolini Jufinba kuli, bi nipanba leni a nikpela, a bila leni bi puoba ki go fagi bi piama. Ban bolini bikuli danyenli, piiga n cilie ban yi yua Adadi ya piiga n dantaali daali. ¹⁴ A tila den pia o bado ñoabonli ban baa kpaani yaali o diema kuli nni, ki go waani bi niba ban bogini li daali yeni po. ¹⁵ Ban den teni a tila ya tonda den jaligi ki fii ki gedi nani o bado n puogi ba maama. Bi den kpaani li ñoabonli yeni u dociamu Suse nni moko. Lani o bado leni Hamana den kaa ki ñu ke Suse yaaba wani yaa gbani kuli wudi.