¹ O Diedo den maadi yeni Moyiisi, ki yedi, ² "Maadi yeni Israyeli nitaanli, ki yedi ba, 'Li ya tie ke nilo (ja bii pua) niani nɔnianu, ki paadi o yuli, ki gagdi O Diedo po, ki tieni obá, U Tienu nilo, ³ Wan fangi o yuli yeni ku daamɔngu yeni mi daapaama. O kan ñu ya ninmilgima n ŋmadi yeni daama, bii daapaama. O kan ñu ku daamɔngu tiidi luana bonñima, o kan ŋmani ku daamɔngu tiidi luanli bii li bonbima. ⁴ Wan niani ya dana kuli ki ba gagdi ki dagdi yeni O Diedo yeni, o kan di ya jiema bii ya bonñima n ñani ku daamɔngu bonluanli kani, ki taa o bonpɔga ki ban tuoni o bonbii. ⁵ O ñɔnianu ń ba waagi ya dana kuli, pengu kan tuuni o yuli po, ke bi ba kuo o, hali yeni o gagdima dana ń ban tii. O ba paadi o yuli, ki gagdi ki dagdi O Diedo po. O ba ŋa o yudi ń kpedi o yuli po, ki ya yabi, ki fagi. ⁶ Wan paadi o yuli, ki gagdi ki dagdi O Diedo po ya dana kuli, o kan nagni kpiemo. ⁷ O kan jɔgni o yuli o naá, o báa, o ninjua bii o ninsalo kuuma po, li ya tie ke bi kpe. Kelima, yuakuli ba la o yufagiditi, ki bandi ke o paadi o yuli ki gagdi O Diedo po. ⁸ Wan paadi o yuli ya dana kuli, o gagdi ki ŋani O Diedo po i. ⁹ Li ya tie ke nilo ludi ki kpe o kani, ki jɔgni o yugagdiŋanma, lanwani ii, li buali ke wan kuo o gagdiŋanbima daali i, lani n tie li daleleeli daali, wan kuo. ¹⁰ Li daaniinli daali, o ba gedi yeni kpaajiemu lie bii kpaajenawuundi lie, salga yidkaciamo kani, u kadkaanu gbandieli bulñɔbu kani. ¹¹ Salga yidkaciamo ba padi kpaajeyenga, ti tuonbiadi sugli po, ki taa ya kpaajiega n sieni kan tua padjuukaali, li padbinbindli po. Yeni, o ba mia sugli yeni wan nagni o kpiemo, ki jɔgni o yuli. O ba ŋuudi ki ŋanbi o yuli li daali i. ¹² O ŋuudiŋanbma daali, o go ba paadi ki gagdi o yuli O Diedo po ya dana n ŋua kuli. O ba cua yeni ya patonga n pia binyenli, i tagli paabu po. Wan den tieni ya dana, ki jɔgni o yuli yeni wani ji ki taa, kelima o den biidi o gagdiŋanma. ¹³ Yua n gagdi o yuli U Tienu po, ke li gagdima dana tii, li bogda ñɔmaama n ne: Bi ba gedi yeni o u kadkaanu gbandieli bulñɔbu kani. ¹⁴ O ba waani O Diedo o paabu. O baa pia binyenli patonga, yaaga n ki pia pɔdi, li padjuukaali po. Ti tuonbiadi sugli po, o baa pia ya pasiaga n pia binyenli, kaa pia pɔdi. O go ba cua yeni ya patonli n ki pia pɔdi, mi taanyenma padli po. ¹⁵ O go baa pia ya kpanu n ki tieni dabinli, baabuogu, yeni ya maasa ke bi tieni mi kpama, yeni ya laalaadi n ki tieni dabinli, ki nan tieni mi kpama. O go ba cua yeni mi yoma yeni mi daama li ñincabli po. ¹⁶ Salga yidkaciamo ba waani bu paabu kuli O Diedo nintuali. O ba padi ti tuonbiadi sugli padli yeni li padjuukaali. ¹⁷ O ba yuandi ki taa kpanu baabuogu yeni li patonli, ki waani O Diedo mi taanyenma padli po. Salga yidkaciamo go ba waani mi yoma yeni mi daama, li ñincabli po. ¹⁸ Bi ba kuo yua n paadi o yuli ki gagdi O Diedo po yeni, u kadkaanu gbandieli bulñɔbu kani, ki waani o paadima, U Tienu po. O ba duoduo o yudi, ki lu ban padi naani mi taanyenma padli yeni ya mu nni. ¹⁹ Salga yidkaciamo ba kpiedi kpanu yenli, ku baabuogu nni, ki taa li patonli nanŋardi, buagu yeni ya lalaadi n ki tieni dabinli. O ba tieni wan taa yaali kuli wan kuo yua, ke o paadi o yuli yeni ya nuu nni. ²⁰ Salga yidkaciamo ba yugdi likuli ki waani O Diedo nintuali, ya biinu n gagdi ki dagdi O Diedo po, ki taani yeni li benli yeni li patontaali, lan tua salga yidka ya biinu. Lani ya pendi, yua n den paadi o yuli yeni, ji ba fidi ki ñu ku daamɔngu. ²¹ Lani n tie Yua n paadi o yuli ki gagdi U Tienu po ñɔnianu bogda ñɔmaama n yeni. Wan niani yaali kuli, li buali ke cɔlni o ñɔnianu, ki da kandi upo, ki ŋɔdi li ñɔbonli ń bili maama yeni li bogda, yua n paadi o yuli O Diedo po.'" ²² O Diedo go den maadi yeni Moyiisi, ki yedi, ²³ "Maadi yeni Haarɔn yeni o bijaba. Yedi ba, 'Yin ba yadi mi yediŋanma Israyeli nitaanli po maama n ne. I ba yedi ba, ²⁴ "O Diedo ń yadi o yediŋanma ipo, ki go sedi ki guudi yi. ²⁵ O Diedo ń yendi o nunga ipo, ki puni yi ŋalbalga. ²⁶ O Diedo ń diidi yi yeni mi niñima, ki puni yi mi yanduanma'" ²⁷ Ban ba waani Israyeli nitaanli n yeli maama n yeni, min fidi ki yadi n yediŋanma bipo."