¹ Lani ń pendi, O Diedo den maadi yeni Moyiisi, ki yedi, ² Maadi yeni Israyeli nitaanli, ki yedi ba, 'I ya pundi O Diedo ń ba puni yi ya diema nni, ki ba kua, ³ li buali ki yin bobni bu paabu, ki padi O Diedo po, li ba fidi ki ya tie padjuukaana, bii, yanbuama padli, bii, yua bua kuani o ñɔnianu padli, bii taanyenma padli lanyaaka jaanma po ya padli, i ba padi i nee yeni ti yanbidi, ki juu, ki puni O Diedo ya nuulmanu n ba mangi o pali. ⁴ Yin ba puni O Diedo ya paabu baa tie ki padyanga, li padjuukaali po, yeni mi jiema, mani n tie mi yoma kilo bona taa, yaama n nugi yeni mi kpama, liiryenli yeni bɔgdima. ⁵ I go ba pugni ku daamɔngu, liiryenli yeni bɔgdima, pabiga po kuli, li ñincabli po. ⁶ Li ya tie ke bu paabu yeni tie patonli, yin ba bobni ya jiema baa tie mi yoma kilo bona luoba, yaama n nugi yeni mi kpama liira lie. ⁷ Li ñincabli pomo, ku daamɔngu baa tie liira lie. Li padli ba puni O Diedo ya nuulmanu n ba mangi o pali. ⁸ Li ya tie ke li paabu tie naatonli, ke i bobni li, padjuukaali po, bii, ki bua kuani ñɔnianu, lanyaaka, taanyenma ya padli O Diedo po, ⁹ Lanwani ii, ya jiema n ba pugni li naatonli po, baa tie, mi yoma kilo bona yian, yaama n nugi yeni mi kpama liira taa. ¹⁰ Li ñincabli po mo baa pia ku daamɔngu, liira taa, Li padjuukaali ba puni O Diedo ya nuulmanu n ba mangi o pali. ¹¹ Yin ba bobni maama salga po n yeni, li ya tie naatonli, patonli, ŋuabuali, pabiga bii ŋuabiga. ¹² Yin bobni ya paabu, ki ba padi kuli, ba ŋɔdi lan waani yi ya sanbila ne i. ¹³ Yaaba n tie Israyeli dogtieba kuli ba cɔlni lanya sanbila i, salga yidma po, li ya tie ya padjuukali n ba puni O Diedo ya nuulmanu n ba mangi o pali. ¹⁴ Li ya tie ke nilamo kua i siiga, bii ya nilamo n ye i siiga, ke li waagi, li buali ke wan bobni bu paabu, li padjuukaali po, ki puni O Diedo ya nuulmanu n ba mangi o pali. O mo ba cɔlni yin tiendi maama i. ¹⁵ Ti yikodi baa tie yenma i, bi dogtieba po yeni ya nilanba n ye yeni yi kuli po, li baa tie ya yikodi n bili i kuli po, ke nifiima ń tuu nifiima kuli, baa cɔlni ya yogu ń tuu ya yogu kuli. Yi ye maama yeni, ya nilanba n tie sanpenda, ki cani yi mo ba ŋɔdi lanya yema i. Yin tiendi maama, O Diedo nintuali, bani mo baa tiendi yeni i. ¹⁶ Yiko yenli yeni ñɔbonyenli n baa ye ipo yeni ya nilanba n kaa i siiga nni po.'" ¹⁷ O Diedo go den maadi yeni Moyiisi, ki yedi, ¹⁸ "Maadi yeni Israyeli nitaanli, ki yedi ba, 'I ya pundi min caa yeni yi ya diema nni, ¹⁹ I ya ba di yin koni li diema nni, ki baa ya jiema, i ba bobni bu paabu, ki waani O Diedo, ki puni o. ²⁰ I ya ba leni i kpaandi, bii i jali nni jiepaandi, yin ba cindi ki buuni ya yoma yeni, yin pua lalaagu, ki puni O Diedo. Yin ba puni i paabu maama n yeni. ²¹ Li buali ke nifiima ń tuu nifiima kuli ba ñani i kpaandi yonkpiama waamu, ki buuni, ki pua lalaagu, ki puni O Diedo i jiepaandi paabu. ²² U yogtianu, i ba fidi ki tieni ti tuonbiadi, ke laa tie i yanbuama, li ya tie ke yii fidi ki cɔlni min bili yi ya ñɔbona, ki waani Moyiisi yeni. ²³ Hali min cili ya daali, ki bilgi Moyiisi ya ñɔbona, ke o wangi i nifiima kuli, ki ban tuoni dinne nifiiima ne. ²⁴ Li ya tie ke tudmaba tieni, ke li nitaanli naa bani, lanwani ii, li buali ke li nitaanli ń bobni paabu, naatonpanli, li padjuukaali po, lan puni O Diedo ya nuulmanu n ba mangi o pali. Mi jiema yeni ku daamɔngu ba pugni ki padyanga po, nani li padli fuuna ń bili maama, ke li ŋuabuali mo ye, lan padi ti tuonbiadi sugli miabu po. ²⁵ Salga yidkaciamo ba mia ti tuonbiadi sugli Israyeli nitaanli kuli po. Bi ba baa sugli kelima li tuonbiadi tie tudma i. Bi bobni bi paabu ki cua yeni bu, ki padi padjuukaali O Diedo po. Bi cua yeni bi paabu, ki mia sugli bi tudma po. ²⁶ Yeni ke Israyeli yaaba nitaanli kuli ba baa sugli, ki taani yeni ya nilanba n kaa bi siiga nni kuli, kelima, li nitaanli kuli tieni li tuonbiadi, ke li naa tie bi yanbuama ka. ²⁷ Nilo ya tieni tuonbiadi, ke laa tie o yanbuama, o ba bobni paabu, ki bu tie ŋualo, yua n pia binyenli, ki padi ti tuonbiadi po. ²⁸ Salga yidkaciamo ba mia O Diedo sugli, wan tieni ya tuonbiadi, kaa bani yeni po. Li nilo ba baa sugli, li ya tie ke salga yidka padi ki mia sugli. ²⁹ Li yikodi baa tie yenma i, yua tieni tuonbiadi, kaa bani kuli po. Yikodi yendi i, bi dogtieba po yeni ya nilanba n kua Israyeli yaaba siiga nni. ³⁰ Ama, li ya tie ke nilo jagi ki tieni tuonbiadi, li nilo ń tie dogtielo yo oo, nilamo yo oo, o sugi O Diedo i. Li buali ke ban ñani lanya nilo Israyeli yaaba siiga. ³¹ Li buali ke ban ñani li nilo li nitaanli siiga, kelima o kandi O Diedo ñɔbonli po, ki miidi O Diedo ñɔmaama. O tuonbiadi yeni o tagli kuli ba guani ki do o yuli po i.'" ³² Israyeli yaaba ń dá den ye mi fanpienma nni, bi den cuo o ja, ke o kpaagi ti daadi Saba daali (mi fuodma daali). ³³ Yaaba n den cuo o yeni, den cua yeni o Moyiisi, Haarɔn yeni li nitaanli kuli kani. ³⁴ Bi den guu o bonŋanla, kelima O Diedo daa den bili ban ba tieni o maama.̵ ³⁵ Lanwani ii, O Diedo den yedi, "Li buali ke ban kpa li nilo. Li nitaanli kuli ń taani ki lugdi o a tana, ki kpa o, ti jondi niinpo." ³⁶ Lanwani ii, li nitaanli kuli den taa o, ki ñani o ti jondi niinpo, ki ban lugdi o a tana ki kpa o, nani O Diedo ń bili Moyiisi maama. ³⁷ O Diedo go den Maadi Moyiisi, ki yedi, ³⁸ "Maadi yeni Israyeli puolŋuani, ki puogi ba ke ban tieni bi tialakaadi kuni po, ya baabi n cuani, ke ban loli baabcɔnli kuli kani, ya gaalu mɔni ki tuudi. Nifiima ń tuu nifiima kuli ń cɔlni li ñɔbonli. ³⁹ Li baabcɔna baa tie bipo, yaali n tiadi ba O Diedo ñɔmaama po, ban fidi ki ya cɔlni ma, bi pali yeni bi nuni ń nua yaali ń da ti tulni ba, ban kuani bi yula nni mi conconma, ki buli O Diedo bi nunga. ⁴⁰ Yin tieni yeni, ki ya tiani yognu kuli, ki cɔlni O Diedo ñɔmaama, ki ya ye yognu kuli ya gagdiŋanma n dagdi yeni O Diedo, i Tienu po, ⁴¹ Mini ntie O Diedo,i Tienu, yua n ñani yi Ejipti diema nni, ki bua wan ya tie i Tienu. Mini n tie O Diedo, i Tienu."