¹ Li nitaanli den buudi li ñiagu boncianla. ² Israyeli yaaba kuli den bulni, ki gagi yeni Moyiisi yeni Haarɔn. Ku nilgu kuli den taani ki yedi ba, "Ti bi sugni ke tin kpe Ejipti diema nni, lanyaaka mi fanpienma ne nni! ³ Be n cedi ke O Diedo cua yeni ti ya diema ne nni, ke ban kpa ti yeni ki jugsiega? Ti denpuoba yeni ti bila ba tua bi yonbi i. Ti ya bi lebdi ki guani Ejipti po, laa bi tu uu?" ⁴ Bi den juogi bi siiga nni, ki yedi, "Tin gandi mani nitiano, wan tua ti gobdika, tin lebdi ki guani Ejipti diema po." ⁵ Lanwani ii, Moyiisi yeni Haarɔn den baa ki labni Israyeli nitaanli nintuali. ⁶ Yaaba n den gedi ki kpaagi, ki gɔndi mi diema yeni siiga, Nuni bijua Josuwe yeni Jefunehi bijua Kalebi den padi bi tialakaadi. ⁷ Bi den maadi yeni Israyeli nitaanli, ki yedi, "Tin gedi ki lindi, ki gɔndi ya diema ne, tie ya diema n ŋani hali boncianla. ⁸ O Diedo pali ya mani tipo, o ba ciani ti li diema nni, ki puni u fidu, tin diedi ma. Mi naaŋanma yeni ti siadi puubi li diema nni i. ⁹ Ama, yin da fiini mi yiema O Diedo po, yin go da jie li diema nni niba. Ti ba paadi ba, ki di ba faala nani mi jiema yeni i. Bi buli ba sani ki yaadi ki ŋa ba, kelima O Diedo wani ye yeni tinba. Yin da jie ba." ¹⁰ Ama, li nitaanli kuli den jagi ke ban lugdi ba a tana ki kpa ba. Lanyognu i, ke O Diedo kpiagdi den dɔgdi u kadkaanu gbandieli polu, Israyeli nitaanli kuli nintuali. ¹¹ O Diedo den yedi Moyiisi, "Ya nitaanli ne ba fali nni hali yeni ulaa yognu i? Li ya dagdi n paaciamu po, min tieni bi siiga nni ya yaalidgu tuona mɔno bi ba luo npo ti dudugdi hali yeni ulaa yognu i? ¹² N ba pua ba yeni u yianbiadu, ki bolni ba, ki ñani ba n fadila siiga, ki fiini a ya buocelu yu n yabi ki go pia u paalu ki cie ba." ¹³ Moyiisi den yedi O Diedo, "A ya tieni yeni, Ejipti diema nni yaaba ba gbadi li maama, kelima, a fie ba, ki faabi ba bi nui nni i, yeni a paaciamu. ¹⁴ Bi ba togdi mi diema nni niba. Bi nan gbadi ke Fini O Diedo ye a nitaanli siiga, kelima a dɔgdi a yuli bikani, ki maadi yeni ba, ke bi bani a nunga. A tawalidi n pibni ba. A cuoni yeni ba, ku muñiigu tawalgu nni, u yensiinu, ku ñiagu mo yeni u mu tawalgu nni. ¹⁵ Diidi, a ya kpaa ya niba ne, nani niyendo yeni, bi nilanba yaaba n gbadi a kpiagdi po, baa yieni, ki tua, ¹⁶ 'O Diedo kan den fidi ki gedi yeni o niba, wan den poli, ki niani ba ya diema nni i, lanyapo i, ke o kpaa ba mi kpanpienma nni.' ¹⁷ N mia ŋa sugli ke ŋan cedi a paaciamu ń dɔgdi, kelima, a den yedi, ¹⁸ 'Mini O Diedo pali ki fii tonma, ama, n pia li ŋanbli boncianla, yaaba n tiegi npo. N di sugli mi tudma yeni ti tuonbiadi po. Ama N kan saa i mɔni, yua tugi tagli po, ki tugindi a bila yuli po, bi danba tuonbiadi hali mi nifiitaama bii mi nifiinaama yuli po'. ¹⁹ A ŋanbcianli po, n mia ŋa sugli, li nitaanli ne tuonbiaciandi po, kelima, a buacianma yeni a kpiagdi po, a dini sugli a nitaanli tuonbiadi po hali ban den ye Ejipti diema nni, hali yeni mɔlane." ²⁰ O Diedo de yedi, "N tuo a miabu, ki dini sugli bi tuonbiadi po, ²¹ ama, Mini O Diedo, nani min fo yeni, li buali ke n kpiagdi ń yadi ki tinga po kuli i, ²² Bani ya nitaanli n la n kpiagdi yeni n paaciamu po, min tieni ya yaalidgu tuona Ejipti diema nni, yeni mi fanpienma nni, Yeni lani kuli, bi go dá li bigdi nni kiledi taalma piiga n yeni, kaa cengi n maama. ²³ Lanwani ii, N yedi ke bi ka la min poli ki niani bi yaajanba ya diema. Bani yaaba n fali nni kuli yeni, bá niyendo kan pundi mi diema nni. ²⁴ Lan ñani n naaciemo Kalebi, kelima, o ya yatiali ye libá. O cɔlni n maama, kaa pɔdi bá waamu; N ba cedi wan pundi min sɔni o ke o gedi ki gɔndi ya diema nni. O ya puolŋuani n ba diedi wan tɔgni ki gɔndi ya tinfanma. ²⁵ (Mɔlane, Amaleki yaaba yeni Kanana yaaba n kua likani jualɔngu nni. Saala, yin kogni, ki ban tɔgni mi fanpienma nni ki taa ku mɔgmɔngu sanu, ki gedi." ²⁶ O Diedo den maadi yeni Moyiisi yeni Haarɔn, ki yedi, ²⁷ "N ba cabi u naa nibuolu, ban ya bulni ki gagi yeni nni hali ulaa yognu i? N gbadi Israyeli nitaanli, ń bulni ki maadi npo ya maama. ²⁸ Yin yedi ba, ya maama ne, 'Mini O Diedo yua n fo,' 'Nani yin maadi, ke n gbadi yeni, min ba tieni yi yaali n ne: ²⁹ Yinba yaaba n bulni ki gagi yeni nni ne, yinba, ban cɔdi yaaba, ke bi pundi bina piilie, bii ki maani yeni, i ba baa ki kpe mi fanpienma ne nni i. ³⁰ I kan pundi min den niani ya diema ke man tua i kuakaanu yeni, lan ñani Jefunehi bijua Kalebi yeni Nuni bijua Josuwe. ³¹ Ama, yin yedi ke i biali yaaba n ba tua i yibalinba yonbi yeni, N ba gedi yeni bani i, mi diema nni. Bani n ba di yin yie ya diema yeni, manu! ³² Ama yinba wani, i ba kpe ki ya bili mi fanpienma nnui ne i. ³³ I bila n ba tua yankpaamɔnba mi fanpienma nni ne, ki tieni bina piina. Bani n ba tugi i yenyiema tagli , ki guudi hali i kuuma nandi bedma mi fanpienma nni ne. ³⁴ Nani yin tieni ya dana, ki gedi ki gɔndi mi diema yeni, dana piina (40) yeni, i go ba tugi i yula po i yenyiema tagli hali bina piina i (40) ; I ba paa dayenli kuli po binyenli i, yeni i ba bandi min tuadi n yibalinba maama. ³⁵ Mini O Diedo, Mini n maadi li maama. Li ki pia tama, n ba sɔndi ya nibuolbiado n taani ki yie n maama ne, yeni i. N ba ñani ba n buolu yaaba siiga, bikuli ba kpe nekanba i.'" ³⁶ Lanwani ii, Moyiisi ń den sɔni ya jaba ke bi gedi ki gɔndi mi diema yeni, ki guani, kaa togdi mi maama lan buali maama yeni, u yianbiadpuodkou n den kpa ba O Diedo nintuali. ³⁷ Bani n den ñani mi diema po, ki guani ki kpeni, ki maadi ti maabiidi mi diama po yeni, bani n den cedi ke li nitaanli den yie Moyiisi po. ³⁸ Yaaba n den gedi ki ban gɔndi mi diema yeni siiga, Nuni bijua Josuwe yeni Jefunehi bijua Kalebi baba n den sieni, ki pia miali. ³⁹ Moyiisi ń den togdi Israyeli nitaanli kuli li maama, bi den buudi i kumoe, ki figindi. ⁴⁰ Bi den yagdi ki fii, ki doni li juali po, ki yedi, "Diidi, ti cua ne, ki bua waani a, ke ti ba gedi O Diedo ń den niani ti ke o ba puni ti naankani, kelima ti tieniti tuonbiadi." ⁴¹ Ama, Moyiisi den yedi, "Be n cedi ke i kandi O Diedo ñɔmaama po? I cenli kan ya ŋani ipo. ⁴² Da gedi mani, kelima O Diedo ki yegi yeni yi, ki ba todi yi, i yibalinba ń da paadi yi, ki kpa yi. ⁴³ Amaleki yaaba yeni Kanana yaaba ye lipo, ki ba kpa yi yeni bi jugsiemu, kelima, yinba n buli O Diedo i nunga. Lanwani ii, o kan ya ye yeni yi." ⁴⁴ Ama bi den li yie, ki paani bi pala, ke bi ba do a juana diema nni; bá ke Moyiisi yeni O Diedo ñɔmaatana kpagu den ki ñani ti jondi nni. ⁴⁵ Lanwani ii, Amaleki yaaba den jiidi, yeni Kanana jakɔnda, yaaba n kua li juana nni. Bi den tuogi Israyeli yaaba, ki kɔni ki paadi ba, ki kpaa bikuli Horima dugu nni.