¹ Pomwe idapita nsiku ya sabudu, Maliya Magadala, Mariya mayi wache wa Yakobe na Salome adagula bzakununkhira nkyenda nabzo kukamu dzoza thupi la Yesu. ² Machibese nsiku yakuyamba ya sumana, adayenda kuthenje dzuwa likuchoka kumene. ³ Iwo akhasewezana wingo namwanzache, ''Mbani amkati gwinyira mwala ule pa msuwo wa thenje?'' ⁴ Pomwe adadza kwiza maso, adawona kuti mwala ule ngwakugwinya kale, poti ukhali ukulu kwenekwene. ⁵ Pomwe adapita mthenje mwana mng'ono adabvala mkanjo uchena , adakhala pambali kuboko ladidi, ndipo iwo adadabwa naye. ⁶ Iye adalewa kunaiwo, '' Nampodi kudabwa. Mukufuna Yesu, waku Nazaleti, amene adapanikiwa. Iye wamuka! Iye kulibe kokuno .Nyang'anani mbuto yomwe mukhadamuika iye. ⁷ Tsono ndokoni, kawauzeni anyakupfunzira wache na Petulo, ''Iye amkutsogolerani imwe ku Galilereya. Kumweko mumkamuona iye, ninga momwe adakuuzini imwe.'' ⁸ Iwo adachoka akuthanga mthenjemo ; iwo akhatemera nakudabwa. Iwo alibe kulewa chinthu chili chense thangwe iwo akhana mantha. ⁹ Machibese ya nsiku yakuyamba yasumana, iye atamuka kale, adawoneka kakuyamba kwa Mariya magadala, omwe iye adamu chosera bziwanda bzinomwe. ¹⁰ Iye adayenda kukauuza wale omwe akhanawo , wale omwe akhalira mwansisi. ¹¹ Pomwe iwo adabva kuti iye anamoyo nakuti iye amuona, alibe kumukhulupira. ¹² Bzitamala bzobzi adawoneka pomwe moda winango kwa awiri wa iwo omwe akhafamba mdzikomo. ¹³ Iwo adabwerera achikawauza anzache, tsono iwo alibe kuwa khulupirira. ¹⁴ Pambuyo pache Yesu adaonekera pomwe khumi na m'bodzi pomwe iwo akhadya pa meza, iye adawatsimula thangwe lakusaya chikhulupiriro, nakulambisisa kwao kukhulupirira iwo pomwe adamuona pakumuka iye. ¹⁵ Iye adawauza, ''Ndokoni kudziko mukalalikire mafala ya Mulungu kwa wense. ¹⁶ Iye omwe adzakhulupirira nakubatiziwa omwewo adzapulumuka, na wale omwe amkakhulupirira lini adzabonera. ¹⁷ Bzizindikilo ibzi bzidza watewera iwo wakukhulupirira; Mudzina langu adzachosa bziwanda. Iwo adzasewera malilime. ¹⁸ Iwo adzaphata nyoka na manja, adzamwa bzinhtu bzakupha, koma adzafa lini nabzo. Adzasanjika boko nyakudwala, ndipo adzachila'' ¹⁹ Pomwe Mbuya Yesu adamaliza kusewera nawo, adatengiwa kuyenda kudzaulu achikakhala ku boko lamadidi la Mulungu. ²⁰ Anyakupfunzira wache adayenda achilalikila palipense, pomwe Mbuya akhaphata nawo pabodzi basa akhatsimikizira mafala na bzizindikiro bzomwe iwo akhachita.