¹ Pomwe adayamba kupfunzisa m'phepete mwa nyanza, thimu lizinji la wanthu lidagwezekana kuzungulira iye. Iye adapita m'mwadiya, achikhala pansi m'mwadiyamo. Thimu lense la wanthu lidakhala mphepete mwa nyanza. ² Iye adapfunzisa bzizinji m'dzifanizilo, ndipo mubzakupfunzisa bzache, ichi ndicho adalewa. ³ ''Bverani! Mulimi adayenda kukafesa mbewu zache. ⁴ Pomwe iye adafesa, mbewu zinango zidagwera munjira, ndipo mbalame zidabwera zichijonkhona. ⁵ Mbewu zinango zidagwera pathanthwe, pomwe pakhalibe mataka mazinji. Zidakulumiza kuwuma thangwe mbewuzo zikhalibe kuzika mizu. ⁶ Pomwe dzuwa lidagaka, mbewuzo zidafota thangwe zikhalibe mizu. Mbewu zinango zidagwera paminga. ⁷ Pomwe mingazo zidakula zidatazisa kukula, ndipo zilibe kubala bzipatso ⁸ Mbewu zinango zidagwera pa nthaka yabwino zidamera, zidakula zichibeleka bzipatso, zinango bzakuwanda makhumi matatu, zinango makhumi matanthatu ndipo dzana libodzi.'' ⁹ Iye adalewa, ''Omwe anamakutu yakubva, abve.'' ¹⁰ Pomwe Yesu akhali yekha, iwo omwe akhali pafupi na iye pabodzi na anyakupfunzira wache khumi na awiri adabvunza iye bza chifaniziro chile. ¹¹ Iye adalewa kuna iwo, ''Kuti, chinsinsi chamulungu chaperekedwa kunayimwe. Koma kwa omwe alikunja bzinthu bzense bzidalewiwa m'bzifanizilo, ¹² Natelepoyo pomwe kuwomwe anzawona koma neye kuwona chinthu ndipo kubva anzabva koma neye kubvesesa kuti pinango angachungunike mulungu achiwakhululukira iwo.'' ¹³ Pamwepo Yesu adawauza kuti, ''Kodi mukubvesabe lini fanizoli? Tsono munzazindikira tani fanizo linango lililense?'' ¹⁴ Nyakufesa ambafesa mafala. ¹⁵ Wanthu winango alingati mbewu zakugwera munjira, ndipo mafala yakafesedwa. Akatondo kuyabva satana ambabwera mkuchosa mafala yomwe yafesedwayo mwa iwo. ¹⁶ Ndipo mbeu zakufesiwa paminyala ndio omwe ambabva mafala ndipo panthawi yomweyo ambayatambira nakukondwa. ¹⁷ Ndipo yambamera lini mizu pa iwo, naterepoyo yambakhala lini kanthawi. Mabvuto kapena masautso yakafika thangwe la mafala yamulungu, ambagwa kamkulumize. ¹⁸ Ndipo winango alininga mbewu zakufesedwa pakati pa minga. ¹⁹ Koma bzakusamalira bza dziko lino chinyengo chachuma na bzakubinga bza bzinthu bzinango bzimbabwera m'kukhotcha mafala, ndipo bzimbachitisa kuti asaye kubala bzipatso. ²⁰ Ndipo iwo wakufesiwa pa ndovolo ndiwo wale omwe ambabva mafala ya mulungu, achiyatambira ndipo ambabala bzipatso makumi matatu winango makumi matanthatu winango dzana libodzi kuthumizira popo. ²¹ Yesu adati kwa iwo, ''Kodi mumbatenga nyale kuyenda nayo mnyumba mkuyika m'dengu kapena pansi pa kama? Mumbabwera nayo muchitula pa chakuyikira chache. ²² Pakuti chilichense chakubisika chinzachosiwa padecha, ndipo chilichense chachinsinsi chinzachosiwa padecha. ²³ Penu winango anamakutu yakubva wabva!'' ²⁴ Iye adalewa kwa iwo, '' kumbukirani bzomwe mudabvunza, pakuti muyezo omwe mumphatisa basa ngomweyo unzaphatisiliwa basa kuyezela imwe ndipo anzathumiziliwa kwa imwe. ²⁵ Thangwe omwe iye alinabzo anzapasiwa bzinango, ndipo uyo alibe ne chomwe aniyesa kuti alinacho chinzatengiwa.'' ²⁶ Iye adalewa pomwe , ''Ufumu bwa mulungu buli ngati munthu womwe adafesa mbewu zache pansi. ²⁷ Iye akhagona na kumuka usiku na masikati, ndipo mbewu zingamera zikhakula, iye anidziwa lini momwe zinichitira. ²⁸ Mataka yanibala bzibalo bzache bzokha: Chakutoma ni mmera, chachiwiri ni ngalengale, pamwepo maso yakukhuma mungalengale. ²⁹ Pomwe mbewu zile zakhuma, iye mwakamangu anitumiza chikwakwa thangwe kukolola kwafika.'' ³⁰ Pomwe adalewa, ''Tinidza ndendemeza na chani ufumu bwa Mulungu, pinango tinzandendemeza na chani pabzifanizo bzache? ³¹ Ili ningati mbewu ya lobo, yomwe, pomwe yafesiwa, njing'ono kwa mbewu zense padziko la pansi lino. ³² Koma, pomwe inibzaliwa, imbakula ndipo ichibala kuposa mbewu zense za m'minda, ndipo imbakonza mitawi ikulu ikulu yakuti mbalame za m'dzawulu zimbakonza bzitsa bzawo m'mithunzi mwache.'' ³³ Na mandendemezo ningati limweli iye adalewa mafala kuna iwo, ningati momwe iwo adakwanisa kubvesesa, ³⁴ ndipo iye alibe kusewera nawo pakusaya m'dendemezo. Soma pomwe iye akhali yekha, iye adafotokoza chilichense kuna anyakupfunzira wache. ³⁵ Pansiku imweyo, maulo yatakwana, adati kwa iwo, ''Mbatiye ng'ambu inango ire.'' ³⁶ Naterepoyo adasiya thimu lire, achitenga Yesu momwe akhaliri mu mwadiya. Pakhana pomwe mi mwadiya inango ikhaendambo ng'ambu imweyo. ³⁷ Pomwe akhali pakati pa nyanzapo padayambika chonzi chakunyanya, ndipo madzi yakhakhaphwikira kupita mu mwadiyamo mwakuti kusala pankiti kudzala. ³⁸ Koma Yesu akhali mtulo, atatsamira nsago wache. Adamumusa, achiti, ''m'phunzisi, mulibe nabzo basa kuti timfuna kufa ife? ³⁹ Iye adalamuka, achitsimula chonzicho achiti kwa nyanzayo, ''Mtendere! Khala chete!'' Ndipo chonzicho chidalekeza, zyai pakhana bata la mphabvu ⁴⁰ Ndipo adati kwa iwo, ''Thangweranyi muna mantha? mukalibe chikhulupiliro basi?'' ⁴¹ Adadzalidwa na mantha makulu achilewa kwa wina na mwayache, ''Uyu tsono m'bani, thangwe onani neye chonzi pomwe chikumbamubvera?''