¹ Ishi lelo kutali umulandu kuvala ve vali mwa Yesu Chilisiti. ² She ululajilo lwa mupepo wa vulanzi mwa Yesu Chilisiti luvasatuye kufuma kululajilo lwa vutalamalandu nu vufwe. ³ Lye she uluhomelezyo lwapositwe ukuvomba pamulandu lwali luyeyevazu kujendela kumuvili, uMulungu ahavomba. Uwene ahamutuma umwana wakwe mushiholanio shamuvili umutalamalandu ukuva shavwila sha vutalamalandu, havili uwene ahavumalila uvutalamalandu kumuvili. ⁴ Uwene ahavomba zinizi ukuti vye vikwanzikwa munkomelezyo vingafishila kuliswe, iswe twe tukujenda shisita kulandata izya muvili, nkandi ukulandata umupepo. ⁵ Vala ve vakwihala ukulandata izya muvili vavisile insivo zyavo pa vintu ivya muvili, nkandi vala ve vakutendama ukulandata izya mupepo vavisile insivo zyavo pavintu ivya mupepo. ⁶ She insivo ye yili kumuvili vufwe, nkandi insivo ye yili kumupepo vulanzi havili mutende. ⁷ Insivo ye yili kumuvili vulugu pantanzi pa Mulungu, she iyene yitakuyisya ku nkomelezyo zya Mulungu, havili yitahondeye nukuvomba vunuvwo. ⁸ Vala ve vali kumuvili vatangamushela uMulungu. ⁹ Havili lelo, imwe mutali kumuvili nkandi muli mumupepo, inga nalyoli umupepo wa Mulungu wukutendama mulimwe. Nkandi inga wumo atali nawo umupepo wa Chilisiti, uwene te wakwe. ¹⁰ Inga uChilisiti ali mwimwe, umuvili mufwe nulushindiho kuvutalamalandu, nkandi umupepo mupuma nulushindiho kuvugolosu. ¹¹ Inga umupepo wa wuyo we ahamuzyusya uYesu kufuma kuvufwe akutendama mulimwe, uwene we ahamuzyusya uChilisiti kufuma kuvufwe alivapa uvulanzi havili ku mavili ginyu amafwe ukujendela mumupepo wakwe, we akutendama mulimwe. ¹² Ishi lelo, vamwitu, twe vankongole, nkandi tekwekumuvili ukutendama ukulingana na kumuvili. ¹³ She inga imwe mukutendama ukuyanana na kumuvili, imwe mulikupipi kufwa, nkandi inga kujendela Mumupepo imwe mukuviha kuvufwe imbombo zya muvili, imwe mulitendama. ¹⁴ She avinji ve vakulongoziwa nu mupepo wa Mulungu, iva vana va Mulungu. ¹⁵ Imwe mutahaposhele umupepo wa vuzya ukuti mutendame mulyoga havili; nkandi imwe muhaposhele umupepo uwakuvapela ukuva vana, we iswe tukwita ukuti "Abba, Tata!" ¹⁶ Umupepo paweka wukutusimishizya poka numupepo witu ukuti iswe twe vana va Mulungu. ¹⁷ Inga iswe twe vana, pe twe vapavupwano, avapwano va Mulungu. Havili iswe tulemeline pavupwano nu Chilisiti, inga mwemumo iswe tukuyimba poka nawo ukuti nitwe tushindikwe poka nawo. ¹⁸ She ine nkusiva ukuti amayimba ga havalilizyo iha gatahondeye nukuholania poka nuvushindamu vwe vuli vumbukwa kuliswe. ¹⁹ Pakuti ishipeliwa shikulindilila nulusuvilo ukuvoneshela kwa vana va Mulungu. ²⁰ She ivipelwa vihapanjiwa kuvya mwalwe, te umwa kwanza kwavo, nkandi mulandu wa wuyo we ahashigomba shenesho, mulusuvilo ²¹ ukuti ishipelwa ishenesho shilisatulwa kuvuzya vwa kuvola, pe ishene shilitwalwa kuvwavushe vwa vushindamu vwa vana va Mulungu. ²² She itwe tumanyile ukuti ishipelwa shonti shikuvuvula nukuvomba poka muvuvavu phaka nishi. ²³ Te peka panapo, nkandi niswe vwelele, twe tuli nishihomwa shakwanda sha mupepo, vuvula isha mukasikasi, lye iswe tukulindilizya ukusalwa kwitu, uvuposhi vwa mavili gitu. ²⁴ She nulusuvilo lunulu itwe tuhapokwa. Ishi ulusuvilo lwe lukuvoneha telusuvulo. She we akusuvila kushe uwene angashenya? ²⁵ Nkandi inga iswe tukusuvila kushe iswe tutakushenya, iswe tukushilindilila ishene nukuyisya. ²⁶ Mwidala linili, umupepo wope wukutwavwa muvuyeyevazu vwitu. She itwe tutamanyile she iswe tungaputa, nkandi umupepo umwenesho wukutuputila iswe poka nukuvuvula kwe kukwanzikwa. ²⁷ Wula we akusimishizya amoyo akumanya insivo zya mupepo, mulandu uwene akuputa muvuyo vwa vantu va Mulungu avafinjile ukuyana nukwanza kwa Mulungu. ²⁸ Itwe tumanyile ukuti vala ve vamukuzite uMulungu, uwene akuvomba vyonti ivintu kuvwinza, F7 kuvala ve vakwitwa ukuyanana kumbombo zyakwe. ²⁹ Mulandu vala ve uweve avamanyile nzila uwene havili ahavasevela nzila ukuti vaholane mushati sha mwana wakwe, ukuti uwene ave wuhatote pakasi pa vamwavo avinji. ³⁰ Vala ve uwene ahavasevela nzila, iva uwene sona ahavita. Vala ve uwene ahavita, avene uwene havili ahavazelufya. Vala ve uwene ahavazelufya, avene uwene havili ahavapa uvushindamu. ³¹ Shoni, lelo, she iswe tungayanga ukuyana nivintu vinivi? Inga uMulungu witu, wunanu we angava mulugu witu? ³² Wula we atahasajila ukutupa umwana wakwe wuyo loli uwene ahamutwala muvuyo vwiswe twenti, uwene angapotwa vulivuli ukutupa iswe vyonti ivintu pavwelele? ³³ Wunanu we angaleta amalandu ukuvushila avasevwa va Mulungu? UMulungu weka we akuzelufya. ³⁴ Wunanu we we akulonga? UYesu Chilisiti wewe we ahatufwila-ukushila apo, we ahazyuha- we ali kunyove ya kundilo iya Mulungu, havili wewuyo we akutuputila iswe. ³⁵ Wunanu we alitulesania iswe ukufuma kulugano lwa Chilisiti? Intamyo, pamu uvupotwe, pamu amayimba, pamu inzala, pamu izwalo, pamu ukuvwimilwa, pamu upanga? ³⁶ Inza she lisimvilwe, "Mulandu waho iswe twenti tukufwa isiku lyonti. Iswe tukusendwa ngati ng'onzi zye zyavala kuvolwa." ³⁷ Muvyonti ivintu vinivi iswe tulusizye umupoti ukujendela muwula we atukuzite iswe. ³⁸ She ine nkusimishizya ukuti kali vufwe, nape uvulanzi, nape vevahavizya, nape vulamulili vwansi, pope muvintu vye vilipo, pope muvintu vye vikwinza, pope kumaha, ³⁹ nape vutali, nape vwivizu, nape vintu ivinji ivipelwa, vye vingakwanisya ukutulesania iswe ukufuma kulugano lwa Mulungu, lwe luli mwa Yesu Chilisiti uMwene witu.