¹ Uwene ahanda ukuvasambilizya havili muluvazu ulwa sumbi, pe impuga impiti yihamuzyungulila wuyo. Pe uwene ahadomoshela mwi voti lye lyali pa sumbi, pe ahihala mumo. Impuga yonti yali muluvazu ulwa sumbi. ² Uwene avamanyisizye ivintu ivwinji muviholanio, na muvimanyisyo vwakwe, izi zye aziyanzile ku kwavo. ³ ''Yivwa! u Mulimi ahavala ukupesa imbeyu zyakwe. ⁴ Lwe uwene akupesa, imbeyu zimo zihagwila mwidala, pe iviyuni vyinzile nukuzimilula zyenezyo. ⁵ Imbeyu izyamwavo zihagwila pi yalavwe, pe patali itope ilyinji. U mwaluvilo zihumila, pa mulandu apene patali itope ilyinji. ⁶ Loli lwe izuva lifumile, pe imbeyu zihafoha, pa mulandu zitamile nama gululuzi, pe izyene zihumila. ⁷ Imbeyu iyamwavo yihagwila pa mimva. Amakwi aga mimvwa gahakula pe gahazifyolongania, pe izyene zitahahoma insanga. ⁸ Imbeyu izinji zihagwila pi tope ilyinza pe zihamela zihakula havili zihavula nu kuva nyinji zye zyali 30, 60, nukupitilila 100.'' ⁹ Pe uwene ahati, ''Uno we inga ali na makutwi aga kwivwila, leha uwene ayivwe!'' ¹⁰ Lwe u Yesu ali weka, vala ve vali kupipi nawo poka na vala 12 vahamuvuzilizya wuyo ivya viholanio. ¹¹ Uwene ahati ku kwavo, ''Kulimwe vipelilwe ivya ku kwilu ivya shinamwene isha Mulungu. Lole ku vakunzi vyonti vili mu viholanio, kwe kuti lwe inga avene vakwenya, mwemumo vakwenya, loli vatakwenya, ¹² havili kwe kuti lwe avene vakwivwa, mwemumo avene vakwivwa, loli vatakuzimanya, pamo avene vangapinduha pinduha pe u Mulungu angavatetela venevo.'' ¹³ Uwene ahati ku kwavo, ''Buzye imwe mutashimanyile ishiholanio ishi? Pe imwe mulivimanya vuli vuli iviholanio vyonti?'' ¹⁴ Uhapesa ahapesaga izwi. ¹⁵ Aga ge gamo ge gagwiliye munzila, kwe vapesile amazwi . Lwe avene vivwa, umwaluvilo usetano ahinza nukusenda amazwi ge vapesile mu mwavo. ¹⁶ Pe izi zye mbeyu zye vapesile piyalavwe; ava, lwe vivwa izwi, umwaluvilo vakuliposhela nuluseshelo. ¹⁷ Lole vatali ni gululuzi mu mwavo, pe vakujimbilila pahavalilo hansi. Pisinda lwe ukuyimba pamo ukuvwimwa kwanyamuha pa mulandu uwizwi, avene umwaluvilo vakugwa. ¹⁸ Zilipo izyamwavo zye vapesile mu mimva. Ava ve vala ve vakwivwa izwi, ¹⁹ Loli vakusajila ivya munsi nukuhopekwa nishuma nu kunyonywa ivintu ivyinji vye vikwinjila mukasi nukubuda izwi, pe litakuhoma insanga. ²⁰ Zila zye vapesile pitope ilyinza vevala ve vakwivwa izwi, vakwitishizya nukuhoma ishihomwa 30, 60 nape hangava 100 ukupitilizya. ²¹ Uyesu ahayanga navo ahati, ''vuzye mukuvihaga inyali munyumba lwe mukupishiye mushiseje pamo mukubihaga muntende mushitala? Mukwinjilaga nayo nu kwihazya pashisajishilo. ²² Nashimo she shivwamile she shitalimanyikwa, havili nashimo isha ku kwilu she shitaliyinza apa zelu. ²³ Uno we inga ali na makutwi aga kwivwila leha uwene ayivwe!'' ²⁴ Uwene ahayanga navo, ''Tejelezya ku zye imwe mukwivwa, ishipimo she imwe mukuvombela she valivapimila imwe, ni vinji valiyonjezya kulimwe. ²⁵ Mulandu uno we ali navyo, ku kwakwe kulipewa ivyinji, havili uno we atalinavyo, navye ali alinavyo valimufyula.'' ²⁶ Uwene havili ahati, ''Ishinamwene isha Mulungu shiholine nu muntu we akupesa ulusanga lwakwe mwi tope. ²⁷ Uwene akugonaga pa vusiku havili akunyamuha pa musanya, pe ulusanga lukumelaga havili lukukulaga, nashe uwene atakumanyanyaga mwe zikuvelaga. ²⁸ Insi yikufumyaga insanga yiyo yeka: ishavwandilo mulemvwi, pe makutwi, pe insanga zye zigomile zye zikuva mu makutwi. ²⁹ Lwe ishihomwa shatona, uwene umwaluvilo akutuma ishakuvunila, pa mulandu imvuno yifisile.'' ³⁰ Havili uwene ahati, '' Ku shoni she iswe tungaholania ishinamwene isha Mulungu, pamo shiholanio vuli she iswe tungavombela pa kushilingania shenesho? ³¹ Ishene shilingati hasanga ahamuzimwa, he, lwe ahene vahapesile, hansi nkani ku nsanga zyonti izya munsi. ³² Nashe, lwe ahene vahapesile, pe hakukulaga havili hakwinzaga ukuva hapiti nkani ukulusya ivya kumela vyonti mu mugunda, pe ahene hakugombaga insamba impiti, kwe kuti iviyuni ivya ku mwanya vikugomba ivisalanzo vyavo mu hazundila hakwe.'' ³³ Ku viholanio ivyinji ngati ivi uwene ahayanga izwi ku kwavo, lwe avene vakujendelela ukuzimanya, ³⁴ pe uwene atahayangaga ku kwavo shisita iviholanio. Loli lwe uwene ali weka, uwene ahalingania ivintu vyonti ku vasundikwa wakwe. ³⁵ Pi siku lila, lwe ahamazuva hinzile, uwene ahati ku kwavo, ''Leha iswe tulovoshe tuvale uluvazu ulunji.'' ³⁶ Pe avene vahayileha impuga, vahamusenda u Yesu poka vavo, she uwene ali hali, mwi voti. Kula kwali amavoti aganji ge galongozinye poka nawo. ³⁷ Pe inkungu impiti nkani iya muvwalanga yihanyamuha, na mavilingwa ganzite ukwinjila mwi voti kwe kuti ivoti lyapalamiye ukwizula na minzi. ³⁸ U Yesu umwenesho ali ku shigavo isha kwisinda ishi voti, agonile pa shakutunyulila. Pe avene vahamunyamusya, vahati, ''Manyisi, buzye iwe utakupasya ukuti iswe tuli papipi ukufwa?'' ³⁹ Uwene ahanyamuha, ahayipilila inkungu, havili ahati kwa sumbi. ''Pumaga! uve mya!'' Pe inkungu yalesile, havili kwali ukutehama ukupiti nkani. ⁴⁰ Pe uwene ahati ku kwavo, ''Shoni she imwe muli ni lyoga? Buzye mushili mute nu lwitiho?'' ⁴¹ Avene vizuye ni lyoga ipiti nkani havili vahati ku woka nu wamwavo, ''Uno we wuwenu, mulandu naye nkungu vwelele nu sumbi vikumwivwila?''