¹ Pe uYesu ahanda ukumanyisya muviholanio. Ahati, ''pali woka umuntu avyaye umugunda wamampensya, nuluvaga ahazenga, ninchelenje iya kufinyila mumo amampensya ahabana. Ningazya ahazenga ahavaleshela avahalima mampensya. pe ashula. ² Ilelo lwe hafisile ahavalilizyo, pe ahamutuma umu vomvi uwa kuvala kumusendela zimo insanga zya mampensya kuvahalima. ³ Avene vahamulema, vahamuhoma, vahamushimbizya lwe vatamupiye nashimo. ⁴ Pe uwene ahapyanizya kuvatumila umuvomvi uwunji, uwene vahamuvulazya mwitwe havili vahamusamulania. ⁵ Ahatuma uwamwavo, uno we vahamugoga. Vahavomba zinizi kuvamwavo avinji, kuhoma vamu, nukugoga vamu ⁶ Ashili ali nawo umuntu woka uwakumutuma, umwana umuganiwa. We ali wavumalilo kuvatumila. Ahati, 'Valimushindiha umwana wane umulumendo.' ⁷ ''Avene avahilima amampensya vahayanga uno ukuva mwavo, 'wapavupyano. Nzaji, tumugoje wenewo, uvupyano vuli vwitu. ⁸ 'Vahamulema, vahamugoga, vahamusumba kunzi kumugunda wa mampensya. ⁹ Pe lelo alivomba shoni umwenesho wa mugunda wamampensya? Aliyinza avananganie avahalima vamampensya nukuvapa umugunda wa mampensya ava mwavo. ¹⁰ Apene pakalata mutavelenzire? Ivwe lye vahalihana avazenzi lye liyipezile ukuva panguto. ¹¹ Ishi shafumile kwa Mwene,na shisukumizyo kuminso gitu.''' ¹² Lye zyajenda zinizi vava Yuda vahasiva ukumulema uYesu pamulandu vahazyagania ukuti akuvayanga mushiholanio. Ilelovahogopa impuga. Vahamuleha ahajenda. ¹³ Pe vahatuma vamo ava Falisayi na vantu va Helodi ukuti vamuteje mumazwi. ¹⁴ Lwe vinzile, vahayanga kukwakwe, ''Manyisi, tumanyile utakusajila insivo zya muntu, havili utakusala izya Mulungu. Shingava hinza umusonka musonko kwa Kesali pamo ha? Tungasonka mamo ha?'' ¹⁵ Uwene uYesu amanyile insivo zyavo ahavavuzya, ''Shoni she mukunjela? Nampi idinali yoka ukuti inenye.'' ¹⁶ Pe vahamuletela woka uYesu.ahayanga navo, ''Shiholine nuwenu havili yisimvilwe shoni?'' Vahayanga ukuti, ''Ya Kesali.'' ¹⁷ Uyesu ahati, ''Ivwa Kesali mumupe uKesali, nivya MUlungu kwa Mulungu.'' Vahamusukumila. ¹⁸ Ava Sadusayi, vevahatinji ukuzyuha nakumo,vahinza kukwakwe. vahamuvuzilizya, vahati, ¹⁹ ''manyisi, u Mose ahatusimbila iswe, 'inga umunine wa muntu afuye alesile umushi wakwa, atapafile umwana nawumo, pe pakuti umunine apyaneje umushi, amupapilaje avana umunine,' ^{20 23} Pali ava namuntu 7; uwakwanda asenzite umwantanda ahafwa, atalesile imbeyu nayimo. Wope uwa vuvili ahamusenda umwantanda wula nukufwa, atalesile imbeyu nayimo, numwantanda wope sheshila. ²¹ Vonti 7 vatahaleha imbeyu. pavumalilo, wope umwantanda ahafwa. ²² Pakuzyuha, inga vazyuha havili, aliva mushi wawenu? She vonti 7 avana muntu vali nawo ngati mushi wavo.'' ²⁴ Uyesu ahati, ''Ishi tesheshifukwa mukupuvila, pamulandu wakuti mutamanyile amasimbo nage maha gab Mulungu? ²⁵ Shenga vazyusile kuvufwe, vatakusenda, vatakusendwa,she avene vakuva fwe vahavizya va kumwanya. ²⁶ ZYe zikulingania izya vufwe nukuzyuha, mutavelenzilemwakalata wa Mose, zye zikulingania izya shivwati, she uMulungu ayanzile nawo ahati, ''Ine ne Mulungu Wa Abulahamu ne Mulungu wa Yisaka ne Mulungu wa Yakovo?' ²⁷ Te wuMulungu wavafwe, wavapuma. Mwapuvwa vulo.'' ²⁸ Ahinza umusimbi woka ahivwa vye vahayanjizyaniaga; Ahenya she uYesu akuvamula ahinza. Ahamuvuzilizya, ''Luhomelezyo vuli lwe luposite zyonti?'' ²⁹ Uyesu ahamwamula, ''Lwe luposite izyamwavo lweluno, 'Tezelezya, Yisilayili, Umwene uMulungu witu, Umwene ali woka. ³⁰ Uhondeye kumugana u Mwene uMulungu waho nu moyo waho wonti, numuzimu waho wonti, ninsivo zyaho zyonti, namaha gaho gonti.' ³¹ Uluhomelezyo zya vuvili lweluno, 'Umuganaje umupalamani waho inzashe uyiganile weka,' Lutaliko uluhomeleshezyo ulupiti kushila zinizi.'' ³² Umusimbi ahati, ''Shinza, Manyisi! She wayanga uvwanalyoli ukuti uMulungu ali woka, havili ataliko nawumo kushila wuyo. ³³ Ukumugana wuyo nu moyo waho wonti nukuzyagania khaho konti namaha gaho gonti, nukumugana umupalamani waho inza she uyiganile weka yishuzile imputile inyoshe nimputile izinji.'' ³⁴ Lye Uyesu ayenya ukuti ayamula ahinza, ahayanga nawo ahati, ''Utali ukutali nishinamwene sha Mulungu.'' Lwe pashila apo, nawumo uwunji we ahajendelela kumuvuzilizya uYesu amavuzyo. ³⁵ Lye uYesu akumanyisyamwitempeli pabalaza, ahati, ''Shoni she ava simbi vakuti u Chilisiti mwana wa Davidi? ³⁶ U Davidi wuyo, mumupepo umufinjile, ahati, 'Umwene ahati kwa mwana wane, ''Yihala kunyove yane indyela mpaka pe ndiviha avalugu vaho muntende muvinama vyahoi.''' ³⁷ U Davidi wuyo akumwita ukuti 'Mwene' Shingava vuli uChilisiti ave mwana wa Davidi?'' Impuga impiti yahovosile lwe vakumutejelezya. ³⁸ Muvumanyisi vwakwe uYesu ahati, ''Musheve navasimbi, ve vaganile ukujenda ninkanzu intali nukulamukwa mumavuzilo ge vakukazizya, ³⁹ Vakuva nivitengo vyapamwanya musinagogi na malo gakushindikwa mwe vakuseshela. ⁴⁰ Vakufyula ninyumba zya vafyilwe, nukuputa imputo intali ukuti avantu vavenye. avantu vanava valilongwa nkani.'' ⁴¹ Uyesu ahihala kupipi ni bokosi lya kutajila ivya vwila mwitempeli; Ahenyelezyaga avantu she vakutajila indalama mwibokosi. Ava dumbwe avinji vahaviha indalama inyinji. ⁴² Pe ahinza umufwilwe wumo umupina ahaviha utundalama tuvili, twetukukwila u pene woka. ⁴³ Ahavita ava sundikwa vakwe ahayanga navo, ''Nalyoli nkuyanga nimwe, umufyilwe uno umupina aviha ukupota vonti vwe ve vasanguye mwibokosi lya vwa vwila. ⁴⁴ She vonti v anava lwe vakutajila mumo vahasendaga mwe vivatangaliye. nkandi umufwile uno, kufuma muvu pina vwakwe, aviha indalama zyakwe zyonti zye amile nazyo pa vulanzi vwakwe.''