¹ Ishi lwe vinza ku Yerusalemu, vamile kupipi ku Betifaji naku Betaniya pigamba lya mampensya, uYesu ahatuma ava sundikwa vavili ² nukuti kuvavo, ''Valaji munkaya ye mulungime nayo. Lwe mukwinjila mumo, muliyaga impunda ye vatahazuva nalumo. Musatule nukwinza nayo kuli ine. ³ we akuvuzya, 'Shoni she mukuvomba zinizi? Muyanje muti, 'Umwene akuyanza inti ayigalusye uku shinishi.''' ⁴ Pe vahajenda nukuyaga impunda yipinyilwe pa shilyango sha kwidala, pe vahasatula. ⁵ Avantu vamo vimiliye pepala pe vahayanga kuvavo, ''Mukuvombela shoni, pe muyisatula impunda?'' ⁶ Pe vahamula she uYesu avalajizizye kuti vayanje, she vahavaleha vajenda. ⁷ Vahatwala impunda kwa Yesu nukutajila amagolole pa mpunda, pe ahazuva papo. ⁸ Avantu avinji vahasumbila amenda gavo mwidala, navanji vahasasya amatundu ge vadivile ku magunda. ⁹ Ve valongoleye nava munsizi vaha pundaga, ''Osana! Wakulotwa uno we akwinza mwizina lya Mwene. ¹⁰ Shilositwe she shikwinza ishinamwene sha tata witu uDavide! Osana kumwanya!'' ¹¹ Ishi uYesu ahinjila mu-yerusalemu nukuvala mwitempeli ahenyelezya vyonti. Lwe ahavalilo hasila, ahajenda ku Betaniya navala 12. ¹² Isiku lya kushela lwe afuma mu-Betaniya ali ninzala. ¹³ Ahenya kufuma kuvutali ikuyu lye lyamile namatundu, pe ahavala kwenya nanti muli ivihomwa, lwe afiha mupipi, atahashaga nashimo mwamile amatundu, mulanduhatali havalilo hamikunyu. ¹⁴ Ahalivuzya, ''Nawumo we alilya havili ishihomwa mumwaho.'' Navasundikwa vakwe vahivwa zinizi. ¹⁵ Vahinza mu Yerusalemu, nukwinjila mwi tempeli nukushimbizya avahakazya nave vakalaga mwi tempeli. Ahabenula ivitala vya mpiya zya ve vahatananiaga pe nivitengovya vahakazya vankunda. ¹⁶ Ahavahanila vonti kunyatula ivintu vye vahakazyaga mwi tempeli. ¹⁷ Ahasambilizya ahati, ''zitasimvilwe, 'Inyumba yane yiliva nyumba yakuputila insi zyonti? She Ishi pe mwagomba kuva nyumba ya viva.'' ¹⁸ Avaputi avapiti nava simbizye aziyanzile, pe vahalondola idala lya kumugojela. She vahamunyilaga mulandu impuga impiti yihazunguha ni visambilizyo vyakwe. ¹⁹ Lwe hamazuva hafisile, vahafuma munkaya. ²⁰ Lwe vakujenda inzanchi, vahenya ikwi lyi kunyu lyumiye kutaliha pansi ni samba zyakwe. ²¹ Upeteri ahakumbusya nukuti, ''Manyisi, yenya! Ikunyu lye walitifile lyumiye.'' ²² Uyesu ahabamula, ''Muvanje nu lwitiho mwa Mulungu. ²³ Nalyoli nkuyanga kkimwe ukuti lwe wumo akulivuzya igamba, 'fumapa uvale mwa sumbi; lwe atakusangania mu moyo wakwe nkandi akusuvila kuti zye ayanzile zili vombwa, izi zye Umulungu alivomba. ²⁴ Nkuvavuzya imwe: Shonti she mukuputa nu kulava, musuvilaje kuti mwaposhela, pe shiliva shinyu. ²⁵ Lye wimilila nukuputa, uhondeye ukutetela shonti she munangine nu wamwinyu, kwe kuti Utata we ali kumwanya ali kutetela imbivi zyaho. ²⁶ Lwe inga uta kumutetela, she nuTata kumwanya atali kutetela imbivi zyaho. ²⁷ Pe vahinza havili ku Yerusalemu. Lwe uYesu akujenda mwi tempeli, avaputi avapiti, ava simbi, nava songo vahinza kuli wuyo. ²⁸ Vahati kuwuyo, ''Vulamulili vuli vwe vukuti uvombe zinizi, havili wenu akupiye uvulamulili vwa kuvomba zinizi?'' ²⁹ Uyesu ahayanga kuvavo, ''Imbavuzilizye lyoka. Mumbuzye pe nine imbavuzye uvulamulili vwa kuvomba zinizi. ³⁰ Ulozyo lya Yohani, Lwafumile kumwanya amwe ku vantu? Munamule.'' ³¹ Vahayanga pa vavo veka nukudalinkana vahati, ''Lwe tukuti kufuma kumwanya, 'pe kwe ayamule ati , 'Pe shoni she mutahamusuvila?' ³² Lelo nanti tukuyanga tukuti, 'Kufuma ku vantu,'.... ''Vahanyila avantu, mulandu avantu vasuviye mwa Yohani kuti mukuvwi. ³³ Pe vahamwamula uYesu nukuti, ''Tutamumanyile.'' Pe uYesu ahati, ''Nahana ukuyanga kwe uvulamulili vufumile uva kuvomba ivintu ivi.''