2 Ishuma shinyu shavola, havili amenda ginyu galyeha niphenzu.
3 Ugolodi winyu nu siliva winyu ava nuvusimu havili uvusimu vuliva vwe vwa home ukuvavushila imwe. Wulilya umuvili winyu ngati mwoto. Imwe mwayisenguliye ishuma shinyu kumasiku gakuvumalilo. 4 Yenya, amalipilo ginyu ge imwe mutavalipiye avavomba mbombo ve vavomvile mumagunda ginyu gakulila ukuvavushila imwe. Inkuta ya vahagovola yafiha mumakutwi ga Mwene uwamaha gonti.
5 Mwatendama muvufwase munsi umu havili mwayihovosya mwemwe mweka. Mwaginia amavili ginyu pisiku lya kuvolwa.
6 Mumuyanzile uvuvivi nukumugoga umuntu umugolosu. we atakuvasusya imwe. 7 Jimbilili, lelo, vamwitu, muphaka pa kwinza kwa Mwene. Mwenye she umulimi akulindililaga ishihomwa shapamwanya kufuma pitope havili uwene akujimbilila ukuyana nasho, muphaka pe ishene shikuposhela imvula iyakwandana niyakuchedwa.
8 Nimwe, vulo, mujimbilile. Mugomye amoyo ginyu mulandu ukwinza kwa Mwene winyu kuli pa pipi. 9 Mutahayilizanie, vamwitu, ukuvushilana uno nuwamwavo, ukuti mutahinze mulongwe. Yenya, umulonzi ayimiliye pamulyango.
10 Musende ishiholanio, vamwitu, ukufuma kumayimba nu kujimbilila kwa va kuvwi, vala ve vahayanjilaga mwizina lya Mwene.
11 Yenya,tukuvaviha vala ve vakujimbilila ngati valotwa. Imwe mwivuye izya kujimbilila kwa Yobu, havili mumanyile imbombo ya Mwene, she uwene washisa nuvwila. 12 Pa mwanya pa vyonti, vamwitu, mutahafingaje, nape kwe kumwanya pamu pansi, pamu ukufinga konti. Pope, leha " Umwemumwo" winyu ang'anamule ukuva "Mwemumwo" havili u "Awe" winyu ang'anamule ukuva wu "Awe," ukuti imwe mutahagwile mwilonjelwi. 13 Alipo wumo pakasi pinyu akuyimba muvugomu? Uwene apute. Aliko wumo we ahovosile? Uwene ayimbe inyimbo zyakumutima.
14 Aliko wumo pakasi pinyu muvinu? Uwene avite avasongo avashivanza, pe aleshe avene vamuputile wenewo. Avene vamupashe amafuta mwizina lya Mwene.
15 Iphuto zya lwitiho zilimupozya umuntu umuvinu, pe uMwene ali munyamusya wenewo. Inga uwene ananzile amalandu, uMulungu alimuhovoshela wenewo. 16 Muvumbulilane imbivi zyinyu uno nuwamwavo nukuputilana ukuti imwe mupole. Uluputo lwa muntu umugolosu luli na maha sana mumbombo zyakwe.
17 U Eliya amile muntu inza twenetwe. Uwene apusite umwakuyikungula ukuti imvula yitahatime, pe iyene yitatimile munsi yila kumaha gatatu namezi 6.
18 Pe u Eliya ahaputa havili. Imwanya zihaleta imvula, pe ninsi yihaleta insanga zyakwe. 19 Vamwitu, inga wumo pakasi pinyu akusovela kuvwanalyoli, havili wumo akumugalusya wenewo,
20 umuntu uyo amanyaje ukuti wonti we akumugalusya umutalamalandu kufuma ku vupuvi vwi dala lyakwe alimupoha wenewo kufuma kuvufwe havili alifushila imbivi inyinji nkani.