¹ Yawe avwanzile kwe Mose, atili, ² ''Vwanga ku wanthu wa Izirayeli nu kuti kwe woliwo, 'Nene ne Yawe e Leza wako. ³ Mwemwe mufwile mutawomba ivinthu vino awanthu wakuwomba mu Egypt, kuno mwikalanga mwisinda. Mwemwe mufwile mutize mwawomba ivinthu vino awanthu wakuwomba mu Kenani, insi kwe yino Nene nkhuwasendela mwemwe. Mutize mwakonkha imyikalile yawo. ⁴ Amasundo Yane a yano mufwile mwawomba, na malamulo yane a yano mwemwe mufwile musunge, alyakuti muwapita mwenemo, umulandu Nene ne Yawe e Leza winu. ⁵ Achaleka mwemwe mufwile musunge amalamulo yane na masundo yane. Ndi umunthu akutonthela yeneyo, aliwa a mulanzi umulando wa yeneyo. Nene ne Yawe. ⁶ Utize uwapalimila aliwensi umukamu uwa luko ukuti umuzule ivizwalo, Nene ne Yawe. ⁷ Utize uwazula ivizwalo e nyoko; weni a mama wako, wewe ufwile utakamuzule. ⁸ Utize uwazula ivizwalo awachi wa baba wako; lyo wamuzula e baba wako. ⁹ Utize wazula inkhazi yako, nanthi angawa a mwana umukazyana uwa baba wako pamwi umwana umukazyana uwa mama wako, angawa wino akulila ku kaya kwako pamwi ukutali na wewe. ¹⁰ Utize wazula ivizwalo vya mwana umukazyana uwa mwana wako umulumendo pamwi umwana umukazyana uwa mwana wako umukazyana, amuno lyo wayizula wemwenecho. ¹¹ Utize wazula umwana umukazyana wa muka baba wako, wino akusungwa pakaya ka baba wako, weyo a nkhazi yako. ¹² Utize uwazula ivizwalo inkhazi ya baba wako, a mangusenje wako weyo. ¹³ Utize uwazula ivizwalo vya muzuna pamwi umukulu wa mama wako, nawenye a mama wako weyo. ¹⁴ Utize wazula ivizwalo umuzuna pamwi umukulu wa baba wako, akulikuti, utize uwapalamila ku muchi wakwe, nawenye we nyoko. ¹⁵ Utize uwazula umuka mwana wako umulumendo; a nyokovyala weyo; wewe ufwile utize umuzule ivizwalo vyakwe. ¹⁶ Utize uwazula ivizwalo umuka munyina wako; lyo wazula umunyina wako. ¹⁷ Utize uwazula umwanachi nu mwana wakwe umukazyana; swinya wewe ufwile utize utwale umwana wa mwana wakwe umulumendo pamwi umwana umukazyana uwa mwana wakwe umukazyana; woo a wuwipe. ¹⁸ Wewe ufwile utize utwale umuzuna pamwi umukulu wa muchi wako ngati a wako uwa chitiwili nu kumuzula ivizwalo vyakwe pano uwako achilinji ali nu wumi. ¹⁹ Utize uwapalamila ku mwanachi ukuti umuzule ivizwalo vyakwe pano ali kumwezi. ²⁰ Utize walala uwuzelele nu muka mupalamani wako nga uyinyazye wemwenecho na weliwe mu nzila yoo. ²¹ Wewe ufwile utize upe wumwi mu wana wako ukuti upe wenewo ku mulilo, alyakuti uzuwile woliwo kwe Molechi, umulandu wewe ufwile utize usamule izina lyakwe Leza wako. Nene ne Yawe. ²² Utakati walala na wawuye awonsi ndivino amwanachi; choo a chiwipe. ²³ Utakati walala ni chinyamana chilichonsi nga uyinyazye wemwenecho na chenecho. Nanthi a mwanachinye aliwensi atakayipe wenga umwenecho ku chinyamana ukuti alale nacho; koo a kuluvyania. ²⁴ Utakayinyazye wenga wemwenecho mu yiliyonsi iya nzila zyoo, amuno mu nzila zyonsi zyoo amaluko yanyala, amaluko yano ndisamazya lyo mutani mufike. ²⁵ Insi yizile yawa a yinyale, achaleka Nene nafundile u luwembu lwawo, nga insi ayitapika kunzi awanthu wakwe. ²⁶ Achaleka, mwemwe, mufwile muwasunga amasundo yane na malamulo yane, swinya mwemwe mufwile mutaki mwawomba chilichonsi cha vinthu vyoo ivyakunyalisya, angawa nanthi a mu Izirayeli pamwi umulendo wino wikala pakasi pinu. ²⁷ Amuno woo a wuwipe wuno awanthu munsi wawomvile, wawo wano wikala moo lyo mutani mufike, nga nomba insi yawipa. ²⁸ Achaleka muwe mwe wachenjele alyakuti insi yitize yiwatapike mwemwe na swinya lyo mwemwe myayinyazya, ndivino yatapisile awanthu wano walinji mwemweno lyo mutani mufike. ²⁹ Wensi wino akuwomba chilichonsi icha vyoo ivinthu iviwipe, awanthu wano wakuwomba ivinthu vya musango woo waliputulwa ukufuma ku wanthu wawo. ³⁰ Achaleka mwemwe mufwile musunge amasundo yane ukuti mutakachite chilichonsi cha myikalile yoo yano yachitikanga lyo mutani mufike, alyakuti mwemwe mutize muyinyazye mwewenecho na yoliyo. Nene ne Yawe e Leza winu.''''