¹ Yahweh ati kwe Nowa,'' zanga''wewe ni mbumba yako yonsi, muwato, amuno nalola kuno wewe wemulungamane pankolelo zyane munkulo yoo. ² Kunyama yonsi iyintakandamana ulileta izyonsi munenulambali nizyanachi munenulambali . Kunyama zino ankandamane, kwezyozyo mulete ziwili, iyachonsi niyachanachi. ³ Swinya ni nyunyi zyamwilewelewe, ulete izyonsi mnenulambali ni zyanachi munenulambali, ukusunga imbeyu yakwe pansi yonsi iyapansi . ⁴ Amuno mumanda munenulambali ndipanjisya imvula yitonye pansi yapansi kumanda amakumi yani umusanya nuwusiku. Ndiyonona chonsi ukufuma pansi pamusili ichawumi chonsi chino napanga.'' ⁵ Nowa wawonvile chonsi chino Yahweh wamupinguzile. ⁶ Nowa walinji ni myaka imyanda umutanda pano intalala yaponile munsi. ⁷ Nowa, awanakwe, ewakuwakwe, nawanyinavyala winjizile ponga muwato pamulandu wa minzi yantalala. ⁸ Inyama nzima ni nyama zino zisi nzima, ninyunyi nachonsi chino chikasela pansi, ⁹ viwili viwili, ichonsi nichanachi, vyizile kwe Nowa avyinjila muwato, ndivino Leza wamupinguzile Nowa. ¹⁰ Ayala manda yasila munenulambali, aminzi yantalala ayiza munsi yapansi. ¹¹ Mumwaka wa myanda mutanda wawumi wakwe Nowa, mumwezi we chitiwili, pawanda wi kumi munenulambali uwa mwezi, pawanda wuliwonga, ivintopwezi vyonsi vizike avimiminuka, namampongololo ya mwiyulu ayiyuka. ¹² Imvula ayitalika ukupona pansi yapansi ku manda yani uwusiku numusanya. ¹³ Pawanda wowonye Nowa nawana wakwe awachonsi, Shemu,Hamu, nu Yafeti, nu muchi wakwe Nowa, nawachi watatu awana wakwe ponga nawoliwo, awinjila muwato. ¹⁴ Awakwinjila ponga nachonsi ichinyamana ukulingana numwata wakwe,nachonsi ichitekwa ukulingana numwata wakwe, ni chakusela chonsi chino chikasela pansi yapansi ukulingana numwata wakwe, ninyunyi yonsi ukulingana numwata wakwe, ichelewulwa chonsi namapa. ¹⁵ Viwili muvya mutande vyonsi mwakwe vino mwalinji uwumi wamufuto vwizile kwakwe Nowa nukwinjila muwato. ¹⁶ Ivinyama vino vyinjizile mwenemo vyalinji ichonsi nichanachi ivyamutande vyonsi; vyinjizile mwenemo ngati vino Leza wamupinguzile. Ngapano Yahweh azyiyalila ichisakati. ¹⁷ Ngapano intalala ayiza munsi yapansi ku manda amakumi yani, nga naminzi ayavulilila ayatumpula uwato nukuwukwezya papela yansi. ¹⁸ Aminzi ayafichilisya ukwiyala insi yapansi, nga uwato awambama papela paminzi. ¹⁹ Aminzi ayakwela nkaninye pansi yapansi achaleka ni myamba yonsi iyitali yino yalinji pansi pilewelewe yakupichizilwe. ²⁰ Aminzi yakwezile intampulo ikumi nayasano papela pasosonjelwa yamyamba. ²¹ Ivyawumi vyonsi vino vyapitanga munsi vyafwile_ inunyi, ivitekwa, inyama vyamumpanga, ivyelewulwa vyawumi vyonsi vino vyikalanga mumpendwa inkulu pansi yapansi, nawantu wonsinye. ²² Ivyelewulwa vyawumi vyonsi wano wisile pamulundu, wano wafutanga umufuto wawumi ukupitila mumpuno zyawo, wafwile. ²³ Achino ichawumi chonsi chino chalinji papela yansi chapyezilwe, awantu nivinyama nivintu vyakusela nivinyunyi vyamwilewelewe. Vyonsinye vyononilwe ukufuma munsi. Nowa vyee nawawo wano walinji naweliwe muwato wasyazile. ²⁴ Aminzi yikazile pansi yapansi amanda umwanda wonga namakumi yasanu.