¹ Josefu akomelezya ekalolechesya wamung'anda yakwe, nukuti, " longa ichakulya mumyuwa ya wantu, muno wanganyamulila nga uwike indalama kumulomo wamuwa pakwe wiliwensi. ² Wika ichitowa chane, ichitowa chakwe siliva, pamulomo wamuwa wamutichi, nga swinya ni ndalama zyakwe izya mpumba. "Ekalolechesya wawonvile ndivino Josefu wavwanzile. ³ Kumacho, awantu awapita, woliwo nindokwe zyawo. ⁴ Lyo wafuma mumusumba kweni wachilinji ukufika ukutali, Josefu avwanga ati kwe kalolechesya wakwe, " Katuka, wakonke awantu, nga ndi wawazana wawo, uti kwakwe woliwo, ' Nga chani chino mwanyosya ichiwipe pachizima? Wuzye asachitowa chino tatakulu wane akang'wela, ni chitowa chino akawonvya pavyawuleza? Mwawomba ichiwipe, ⁵ Pakwe chino mwawomba.''' ⁶ Ekalolechesya awazana nga avwanga amazwi yaa kwewoliwo. ⁷ Nga awati kwe weilwe, " Wuzye achani chino tatakulu wane ukuvwanga amazwi ndivyo yanye? namuno viwele kuwawonvi wako wino angawomba ichamusango woo. ⁸ Lola, indalama zino twazanile pa mulomo ya myuwa yitu, twiza nayo swinya kwakwe mwemwe ukufuma munsi ye Kenani. Nga wuzye tungiwa wuli e siliva pamwi golide mung'anda ye tatakulu wako? ⁹ Ndi wumwi uwa wawonvi wako wazanwa nacho, lekani afwe, nga naswe tukwizu kuwa awazya we tatakulu wane." ¹⁰ Ekalolechesya ati, " kanonzi swinya chiwe ukulingana namazwi yinu. Weyo wino wazanwa ni chitowa chane andi awe amuzya wane, nga mwemwe wanji mukuwa awasita kampifya." ¹¹ Apano umuntu wensi apitisya aya asenda umuwa wakwe awika pansi, nga wensi ayiyula umuwa wakwe. ¹² Ekalolechesya avwambilizya. Atalichila nesongo alechezyela numutichi, nga ichitowa achizanwa mu muwa we Benjamini. ¹³ Nga awalepula ivizwalo vyawo. Wensi alonga indokwe yakwe nukunyochela ku musumba. ¹⁴ Yudah nawanyina awiza ku ng'anda yakwe Josefu. Wachilinji ali kulyanye, nga awapunamila pansi pankolelo pakwe weliwe. ¹⁵ Josefu ati kwakwe woliwo, " Nga wuzye chino mwawomba achani? Mutama ¹⁶ Yudah ati, " Wuzye tuti chani kwe tatakulu? Wuzye tuvwange chani? Pamwi tungayilungamika wuli swenga? Leza wazana uwuwembu muwawonvi wako. Lola, swe wazya we tatakulu wane, swinsinye ponga nawino ichitowa chazanwa mwikasa lyakwe." ¹⁷ Josefu ati, " namo chingawela kwakwe nene ukuti mbombe wowo. Ku muntu wino ichitowa chizanilwe mwikasa lyakwe, weyo umuntu akuwa amuzya wane, kweni mwemwe mwewawuye, yanji mumutende kweso." ¹⁸ Ngapano Yudah ayiza apalamila kwakwe weliwe ati, " Tatakulu, nazina lekani umuwonvi winu avwange izwi mumakutwi yetatakulu wane, nga mutaleka uwukalale winu wulumilwe umuwonvi winu, amuno mulinginevye nu Falawo. ¹⁹ Tatakulu wane akolowozya awawonvi wakwe, ati, ' Wuzye uli neso pamwi umunyonko?' ²⁰ Atuti kwe tatakulu wane, ' Tuli ne tata, umukote, nu mwana wa muwukote wakwe, umutichi. Kweni umukulu wakwe wafwa, nga wenganye wasyala mwenyina wakwe, nga yisi wamukunda.' ²¹ Nga mwavwanga mwati kuwawonvi winu, ' Zanji nawe mwichilile ukuti imulole. ' ²² Ndi chapita choo, twatili kwe tatakulu, ' Umulumendo atanga asye eyisi. Amuno ndi angasya yisi wakwe yisi angafwa.' ²³ Ngapano mwati kuwawonvi winu,' Suka ndi umuzuna winu mwichilila nawe, mutakwizu kulola ichinsyo chane swinya.' ²⁴ Ngapano chalinji lyo twaya kumuwonvi wako etata, twamunenile amazwi yetatakulu. ²⁵ Etata witu avwanga ati, ' Yanji swinya katukalilani ichakulya.' ²⁶ Ngapano twatili ' Tutakupita. Ndi umuzuna witu alinaswe, apano twakwichilila, amuno tutakuyu kulola ichinsyo cha muntu suka umuzuna witu awe naswe.' ²⁷ Umuwonvi wako etata avwanga ati kwe sweswe, ' Mumanyile kuno wakuwane wankwatizile awanachonsi wawili. ²⁸ Wenga mwwakwe woliwo wafuma kwakwe nene nga Navwanzile inti, '' Nakawuzyenye ati anyonkolwa mutunyankanyaka, nga Ntatela mulole ukufuma papo." ²⁹ Kanonzi ndi mwafumya swinya kwakwe nene, nga ndi ukuchisika kwawa pe weliwe, mwandi mulete invwi zya nyele zyane ichitima ku Sheol.' ³⁰ Kanonzi, achaleka, pano niza kumuwonvi wako etata, nga numulumendo asi naswe, pakuti uwumi wakwe wati wunyepwa muwumi wamulumendo, ³¹ chikwizukuwa alapano, walola umulumendo asi naswe, akwizu kufwa. Awawonvi winu walileta inyele zyanvwi zya muwonvi winu etata ni chitima ku Sheol. ³² Amuno umuwonvi wako wizile wawa alayilizyo ku mulumendo kwe tata nga ati, ' Ndi ntamuleta weni kwakwe mwemwe, nga Apano nkwizu kuzwala uwononi kwe tata umuyaya.' ³³ Kanonzi achaleka, nazina lekani umuwonvi winu asyale mumalo ya mulumendo ukuwa amuzya kwe tatakulu, nga lekani umulumendo apite nawanyina. ³⁴ Amuno ningaya wuli kwe tata ndi umulumendo asi nane? Ndi nintete pakulola ichiwipe chino chandi chize pakwe tata. "