¹ Chizile chawa kunsilo yamyaka yiwili imipuma apano felo walosile ichilota. Lola, wimilile mumbali yaluzi lwe Nile. ² Lola ing'ombe munenulambli (7) zyafumile kunzi ukufuma muluzi e Nile, intelepe swinya ni zyine, swinya zyalanga mumatete. ³ Lola, ing'ombe zinji munenulambali aziza azifuma kunzi mwakwe Nile, imbipe swinya izyonde. Zyimilile mupipi ni ng'ombe imbuye pachituntu chaluzi lwakwe Nile. ⁴ Ngapano imbipe swinya injonde ing'ombe azilya zyozyo munenulambali ing'ombe intelepe swinya izyine. Ngapano Felo aziwuka. ⁵ Anyoka aponechela nga swinya alota impindi ye chitiwili. Lola amasante munenulambali aya mbeyu ayamela palusawa longa, amache swinya amazima. ⁶ Lola imitwe yamasante munenulambali, imifyolonganeiminyale swinya imipofoke numuza wakapela, awupupa pakwe vyolivyo. ⁷ Ngapano imitwe minyale imilula yonsi pyu imitwe munenulambali imiche swinya imizule. Farawo aziwuka, swinya, chalinji achilota. ⁸ Chalinji acha kumutondotondo pano umuzimu wakwe walinji wukutamika. nga atuma swinya ayita wonsi wakamanya wamayele nawonsi awamano mu Iguputo. Farawo wawanenile woliwo ivilota vyakwe kweni patalinji nanti wenga wino angilula ivilota vyovyo kwakwe Farawo. ⁹ Ngapano inkombe yino yikalemela Farawo ulupindi avwanga ati kwe Farawo, " Nene nizuka imbembu zyane. ¹⁰ Farawo wafuzilwe kuwawonvi wakwe, swinya wambisile nene muvingololo mung'anda yakwe songo Emusika wavita, ekatenda mukulu swinya nanene. ¹¹ Twalosile ivilota uwusiku uwuliwonga, weliwe ponga nanene. twalosile ichilota umuntu wenga ukuyana nukwilula kwa chilota icha pewenga nawenga. ¹² Twalinji nawumwi umuntu umulumendo uwa chihebeli, umuwonvi wakwe songo kwe musika wavita. twamunenile swinya atwilulila ivilota vitu. Watwilulizile chila muntu ukuyana nichilota chakwe. ¹³ Walile watwilulila achiza chiwa ndimuno wavwanjizile kwakwe sweswe, ngakweni chachisilwe. Farawo wanyochezizye nene pachifulo chanchito yane, kweni ewunji winji anyongwa." ¹⁴ Ngapano Farawo atuma kanjitilani Josefu. Mwakwe zuwazuwa awamusenda ukumufumya muchingololo. Ala wapela umwenechonye, wachinja nivizwalo, swinya pano ayiza kwe Farawo. ¹⁵ Nga Farawo avwanga ati kwe Josefu," Nalosile ichilota, kweni pasi wumwi wino anganjilulila vyonyevyoo. Kweni njivwile ivya kwewewe, ukuti ndiwivwa ichilota unganjilulila." ¹⁶ Nga Josefu atolelela Farawo, avwanga ati," Vyo visi mwakwe nene. Eleza awino andi amwasuke Farawo nanti kuvwama ¹⁷ Farawo wavwanzile kwe Josefu," muchilota chane, lola, nimilile mumbali yaluzi Nile. ¹⁸ Lola, ing'ombe munenulambali zyafumile muluzi aziwa kunzi mumbali pachituntu chaluzi lwakwe Nile. Izyine swinya intelepe inzima, swinya zyalyanga mumatete ¹⁹ Lola ing'ombe munenulambali zinji zyafumile pansizi pakwe zino zyafumile pantaliko. Izyonde, imbipe, swinya izyondoloke. Nene nsitela nzilolepo munsi yonsi iya mu Iguputo izyamwata ndivino woo izyambula ukusechelesya. ²⁰ Ngapano izyonde swinya imbipe izyambula ukuloleka ichete ing'ombe zyozyo azilya ing'ombe izyantaliko izyine munenulambali. ²¹ Zyalile zyalya imbuye zyozyo, zitamanyikwanga ukuti zilile imbuye, muno zya chilinji ambipe swinya injonde ngati muno zyawezile wulyanye. Ngapano nkatuka. ²² Avino naweni swinya muvilota vyane, swinya, lola, imitwe nunenulambali yizile yawa kulusawa longa, ayizule swinya amazima. ²³ Lola, imitwe munenulambali nayinji imipopoke, iminyale swinya yapusilwe numuza wakapela avipofoka nukupungunyuka vyolivyo. ²⁴ Ngapano imitwe iyonde ayimilula imitwe munenulambali imizima. Nene nawanenile awamayele ukuyana nivilota vyane, kweni kutalinji nanti wumwi wino wanjilulizile vyo kwakwe nene. ²⁵ Nga Josefu avwanga ati kwe Farawo," Ivilota vye Farawo avilivyonga. Navino Leza akulonda ukuwomba, wati awizya ukupitila mwe Farawo. ²⁶ Nga ing'ombe munenulambali inzima ayili imyaka munenulambali, swinya imitwe munenulambali imizima ayili myaka munenulambali . Ivilota vyo avilivyonga. ²⁷ Nga ing'ombe munenulambali injonde swinya imbipe izyondoloke zino zyafumile ayili myaka munenulambali, swinya nga nimitwe yinji munenulambali yino umuza wakambazwa wapupa penepo yapofoka yiliwa anzalankulu ichipowe imyaka munenulambali. ²⁸ Vyo avili vintu vino navwanzile kwe Farawo. Chino Leza alinukuchiwomba achaleka wawumbulila Farawo. ²⁹ Lola, ichakulya chamboto chikulu chiliyiza munsi yonsi iya Ijiputi. ³⁰ Imyaka munenulambali iya chipowe yiliyiza ndiyiza yapita, swinya nimboto yonsi invule yiliyiwililwa munsi yamu Ijiputi, swinya ninzala yiliyiwililwa munsi. ³¹ Ngapano imboto nayonye yiliyiwililwa munsi pamulandu wachipowe chino chilikonka penepo, muno chiliwa achiwipe nkaninye. ³² Pakuti ivilota vyalolechela kwe mwemwe mukunyochezya kwe Farawo pachifukwa ichakuti chizumilizizwe nukuwombwa nu Leza, swinya andi achiwombe nombanye. ³³ Kanonzi leka Farawo avwambe wumwi umuntu uwamano, swinya umuwike weliwe ukulolechesya insi yonsi yamu Ijiputi. ³⁴ Leka Farawo asole wasongo wasongo wamunsi yoo, swinya woliwonye wasende ichipya chimwi ichachitisano pevino walima munsi ya Ijiputi mumyaka munenulambali iyamboto. ³⁵ Leka woliwo wawunganike ichakulya chonsi mumyaka mizima yino yikwiza nga visungwe ivyakulya viwe pnsi pawulamulilo wakwe Farawo, ichakulyanyecho chiliwa achakuwonvya mumisumba, wafwile wachisunjilile cholicho. ³⁶ Nga ichakulyanyecho chiliwagawika kunsi ukuyana nimyaka munenulambali iya chipowe chino chiliwa munsi iya Ijiputi. Munzila yamwata ndivino woo insi yitalitela yiponelwe nichipowe." ³⁷ Nga ipanzyo lyamwatawowo lyalinji alizima paminso yakwe Farawo napaminso yakwe swinya napaminso yawonsinye awawonvi wakwe. ³⁸ Farawo avwanga kuwawonvi wakwe ati" Wuzye tungazana winji umuntu uwa mwata ndivino wee, wino umuzimu wakwe Leza wuli mwakwe weliwe?" ³⁹ Ngapano Farawo avwanga ati Josefu," Ukwa pakuti Leza wakulanjizya vyonsinye vyoo, pasi nanti wenga uwakwilula swinya uwamano ngati awewe. ⁴⁰ Wandi wakwikala mung'anda yane swinya ukyana namazwi yako awantu wane wonsi walilamulilwa. Ukufumyavye indulu yawufumu ndiwa namaka amakulu ukulusya wewe." ⁴¹ Farawo avwanga ati kwe Josefu," Lola, nakuwika wewe munsi yonsi iya Ijiputi." ⁴² Ngapano azula ichimanyikwilo chakwe mwikasa azwika Josefu kwikasa, weliwe swinya amuzwika umwinjilo uwuyembe wuno wawika umwenda mukasi swinya anyoka amuzwika umunyololo we Golide munsingo yakwe. ⁴³ Aleka weni akwela pi galeta lyechitiwili lino walinji nalyo. Awantu awapundilila pankolelo pakwe weliwe, " Awanyonganika amakokola." Farawo amuwika ukuwa awakulolechesya insi yonsi iye Ijiputi. ⁴⁴ Ngapano Farawo avwanga ati kwe Josefu," Ne Farawo swinya ukufumya pakwe wewe, pasi wumwi umonsdi wino angatumpula amakasa yakwe nanti pamwi alitamba munsi yonsi iya Ijiputi. ⁴⁵ Farawo ayita izina Josefu ati" we Zaphenath_ Paneah." Wamupile umwanachi e Asenath, umwana we Potiphela esimapepo wampindi yilyanye awangati amuchi. Josefu wafumile awapitila insi yonsi iya Ijiputi. ⁴⁶ Wapezile Josefu ali nimyaka amakumi yatatu(30) pankolelo pamulimo wakwe Farawo, Imfumu ye Ijiputi. Josefu afuma apita paminso yakwe Farawo, swinya apita ukuliwilila insi yonsi iya Ijiputi. ⁴⁷ Mumyaka munenulambali iya kugowola ivivule insi yagowozile imboto invule. ⁴⁸ Wawunganisile ichakulya chonsi icha myaka munenulambali chino chalinji munsi ya Ijiputi nga awika ichakulya mumisumba. Wawisile ichakulya mumusumba wonsinye ukufuma muvyalo vino vyaliwilizya. ⁴⁹ Josefu wasunzile impumba ngati wesenga wamwe sumbi, ukufika pano walesile nukupenda, pamulandu vyapitilizile pampendwa. ⁵⁰ Josefu walinji nawana wawili pano imyaka yachipowe yitani yifike, wino Asenath, umwana we simapepo wampindi yilyanye, ePhotiphela wamupapizile. ⁵¹ Josefu amwita umwana ekatote izina ati we Manasseh, amuno wavwanzile ati," Leza ati ampanga ukwiwilila intamyo zyane zyonsi ning'anda yonsi iye tata." ⁵² Ayita umwana we chitiwili ati we Ephraim, amuno watili ," Leza ati ampanga ukuwa ne wakukoma ivikomwa munsi yamatamyo." ⁵³ Imyaka yamboto munsi ye Ijiputi munenulambali yizile ayisila. ⁵⁴ Imyaka yachipowe munenulambali yatalisile, ndimuno Josefu wavwanjizile. Mwalinji ichipowe munsi zyonsi, kweni yitunye iye Ijiputi mwalinji ichakulya. ⁵⁵ Alapano ichakulya chonsi chasila munsi ye Ijiputi, awantu awapunda ichakulya kwe Farawo. Fatrawo ati kuwantu wonsi wamwe Ijiputi," Yanji kwe Josefu nga muwombe vino wavwanga." ⁵⁶ Ichipiowe chalinji pansi yonsi iyapansi. Josefu ayiyula ing'anda zyonsi zyakusunjilamo nga awakazya kuwa Ijiputi. Ichipowe chawifile munsi ye Ijiputi. ⁵⁷ Insi yonsinye yizanga ku Ijiputi pakukala impumba kwe Josefu, pamulandu ichipowe chawifile munsi yonsi iyapansi.