¹ Kanonzi Abrahamu walinji amukote nkaninye swinya Yahweh wamusozile Abrahamu muvintu vyonsi. ² Abrahasmu ati kuwonvi wakwe, wino walinji amukote mung'anda yakwe swinya wino walolelelanga vyonsinye vino walinji navyo," Wika ikasa mwisika mulupamba lwane. ³ Nandi ndeke ulape kwe Yahweh,Eleza wiyulu swinya Eleza wansi, utalizanila umuchi umwana wane uwachonsi ukufuma kuwina Kenani, mwakwe wano mpanzile uwikalo mwakwe woliwo. ⁴ Ukuwa wandi uye kunsi yane, umuka mwana wane Ayizeki." ⁵ Umuwonvi ati kwe weliwe," Nga ndi umwanachi wiza wakana ukunkonka nene ukwiza kunsi yoo? Wuzye nkasende umwana wako munyosye kunsi yino wafumile?" ⁶ Abrahamu ati kweliwe," utize uyelezye ukunyosya umwana wane koko! ⁷ Yahweh, Leza wiyulu, wino wansenzile nene ukufuma mung'anda yakwe tata swinya ukufuma kunsi yawaluko lwane, swinya wino ndayile nene nichilapo chakusimichila, ati, kwikwatwa lyako ndipa yoo insi, ' alituma umungelo wakwe paminso yako, kulyanye aliya azane umuka mwana wane. ⁸ Ukuwa ndi umwanachi atakasi ukumunkonka, wandi uwe wemusapuke chane choo. Utakize uwele nawe." ⁹ Achaleka umuwonvi awika ikasa lyakwe mwisika mpamba zyakwe Abrahamu eyisikulu, alapa kwakwe weliwe ukuyana ni lyasi lyoo. ¹⁰ Umuwonvi asenda ingamila ikumi izyakwe yisikulu apita. Asenda nivyawila vyonsi ukufuma kwe yisikulu. Akatuka aya kukaya kaku Aram Naharaim, kumusumba waku Nahori. ¹¹ Aleka ingamila azifukama kunzi panzi kumusumba pachifula chaminzi. Yalinji amangunzi, impindi yino awanachi wakafuma pakusemba aminzi. ¹² Achaleka ati," Yahweh, Leza wakwe tatakulu Abrahamu, mpa nene ulongo ilelo swinya undanjizye ilyano lisuwilwe kwe tatakulu Abrahamu. ¹³ Lola paa njimilile pachifula chaminzi nawana awakazyana wakufuma mumusumba mukusemba aminzi pachifula. ¹⁴ Leka chiwombwe ndivyo wonye. Ndinati kumukazyana, nazina tula insembo yako ing'weko aminzi ; nawe ati kwenene, ng'wa, swinya nandi impe ningamila zyakonye zing'we, ' fwendi weyonye awino ule wansontela umuwonvi wako Ayizeki. Kwakwe choo akuno nandi manyile kuno walayilizya ilayilizyo isuwilwa kwe tatakulu wane." ¹⁵ Walanga pano atani amale mukuvwanga, lolani, Rabeka ayiza ninsembo yakwe pachiweya. Rabeka wakwasilwe kwe Beteri umwana wakwe Milika, emuka Nahori, umunyina wakwe Abrahamu. ¹⁶ Umukazyana walinji amuzima nkaninye swinya emwali. Atamanyile umonsi nanti wumwi. Ayichilila aya pachifula, ayizuzya insembo yakwe apita. ¹⁷ Umuwonvi asamala ayamusunkania swinya amunena ati," Nazina mpako aminzi ing'we munsembo yako." ¹⁸ Amunena ati, ng'wa tatakulu, " apitisya atula insembo mumakasa yakwe, amupa ang'wa. ¹⁹ Lyo wamalizya ukumupa aminzi yakung'wa, amunena ati," nandi nsembele ningamila zyakonye mpaka zing'we zyonsi." ²⁰ Achaleka apitisya ayitulila mumusuwa aminzi yamunsembo, ngapano asamala swinya pakusemba minzi kuchifula, ngapano asembela aminzi ingamila zyonsi. ²¹ Umuntu amulolechesya chimyamya ukuti alole ndi Yahweh azumilizizye uwulendo pamwi pole. ²² Lyo ingamila zyamala ukung'wa, umuntu asenda imbalaminwe yakwe golidi yino ukung'wama kwakwe kwalinji pakasi kasi ke shekelo, nivingolwa viwili ivyamumkasa yakwe vino ukung;wama kwakwe kwalinji ikumi lyakwe shekelo, ²³ Ngapano akolowozya," nga wemwana mukazyana wakwe weni? Nazina mbuzya, wuzye mung'nda yinu muli umuwuyo wuno tungaya twikale uwusiku wonsi?" ²⁴ Amunena ati, " Ne mwana wakwe Beteri umwana wakwe Milika, wino wapafile kwa Nahori." ²⁵ Swinya amunena ati," tuli navyonsi amapembesalye nivyakulyesya, nikasi ilyakulala wewe uwusiku." ²⁶ Ngapano umuntu afukama pansi apepa Yahweh. ²⁷ Avwanga ati," umulote awe ne Yahweh, Eleza wakwe tatakulu Abrahamu, wino atiwilila ilayilizyo lyakwe isuwilwa swinya nulukundo lwakwe paminso yakwe tatakulu. Kwakwe nene Yahweh andungamisile mung'anda yawaluko lwakwe tatakulu." ²⁸ Ngapano umukazyana asamala ayanena awamung'anda wakwe nyina vyonsinye vyoo. ²⁹ Kanonzi Rabeka walinji nindume yakwe, nizina lyakwe walinji we Labani. Labani asamala aya kumuntu kumusewo pachifula. ³⁰ Lyo walola imbalaminwe swinya nivingolwa mumakasa yamunyina, " vyoo avino umuntu ambuzizye nene," aya kumuntu, swinya, lolani, wimilile papipi ningamila pachifula. ³¹ Ngapano Labani ati," zanga, we mulotwe wakwe Yahweh. Ngachani chino uyimilile kunzi? Insenginie ing'anda nuwuyo wangamila ." ³² Achaleka umuntu ayinjila mung'anda swinya asapila ningamila. Ingamila zyapilwe ivipembesalye nivyakulya wamupile naminzi yakusamba kumanama yakwe swinya nakumanama yawantu wano walinji nawo. ³³ Awawika ichakulya pankolelo pakwe weliwe ukuti alye, avwanga ati," ntandi indye ukufichila mwavwanga chino chiliko." Achaleka Labani ati," Twalilila ukuvwanga." ³⁴ Avwanga ati," Nemuwonvi wakwe Abrahamu. ³⁵ Yahweh wamulota etatakulu nkaninye swinya awa amuntu mukulu. Wamupa ing'onzi ning'ombe, siliva ne golide, awawonvi awachonsi nawachanachi, swinya ningamila ni ndokwe. ³⁶ Esera emuka tatakulu, wamupapizile umwana umonsi muwukote, swinya wapa chonsinye cho wawanacho kweweliwe. ³⁷ Etatakulu walesile nalapa, ati, ' utize usende umuka mwana wane kuwana awanachi awina kenani, mwewino mukaya kwakwe akakwikala. ³⁸ Mwachoo uye kung'anda yakwe tata, swinya kuwaluko lwane ukasende umuka mwana wane. ' ³⁹ Nanenile tatakulu inti, ' Nche pamwi atalinkonka. ' ⁴⁰ Ukuwa ambuzya ati, ' Yahweh, wino ankankolelela, alituma umungelo wakukukolelela swinya alikulanjizya inzila yako, alyakuti uyize uzane umuka mwana wane ukufuma muwaluko lwane swinya nukufuma mumukozololo wamung'anda yakwe tata. ⁴¹ Ukuwa uliwa we musatuke ukufuma kuchilapo ndiwiza kuwaluko lwane swinya watali kulemeka wewe. Apano uliwa we musatuke kuchilapo chane. ' ⁴² Achaleka mfisile pachifula ilelo, nga navwanga nati, ' O Yahweh, Leza wakwe tatakulu Abrahamu, ndi molinye unganswefezya izina lyane_ ⁴³ newaa indipaa njimilile papipi nichifula_ leka umukazyana wino akwiza ukusemba aminzi, wino ndi niza navwanzya nati," Nazina mpako aminzi munsembo yako ing'we," ⁴⁴ umwanachi ndiwiza wati kwenene," Ng'wa, swinya nandi nsembele aminzi ingamila zyako"_ leka weyonye awe amwanachi wino wewe Yahweh, wasolela umwana wakwe tatakulu. ' ⁴⁵ Chalinji lyontani male nukuvwanga; mumwenzo lolani, Rabeka ayiza ninsembo yakwe pachiweya ayichilila ukuya semba aminzi pachifula. Achaleka imuwuzya inti, ' Nazina mpako ing'we. ' ⁴⁶ Papo napapo atulainsembo mumakasa yakwe pachiweya ati, ' ng'wa, nandi impe ningamila zyakonye aminzi. ' Achaleka ing'wa nigamila azing'wa. ⁴⁷ Apano imuwuzichizya inti, ' Wuzye we mwana wakwe weni ? Atolelela ati, ' Ne mwana umwachi wakwe Beteri, umwana wakwe Nahori, wino Milika wamupapizile weliwe. ' Ngapano imbika imbalaminwe kumpuno yakwe swinya nivingolwa mumkasa yakwe. ⁴⁸ Apano imfukama pansi impepa Yahweh, swinya intunvya Yahweh, Leza wakwe tatakulu Abrahamu wino wantunguluzile nene munzila ukuti ntwazye umwana wakwe tatakulu umukazyana waluko lwakwe. ⁴⁹ Achaleka, ndi muli nulukundo nukusimichila kwe tatakulu, mbuzyani. Ukuwa ndichisi awowo, mbuzyani, alyakuti mpiluluchile kwendilo pamwi kwekamani." ⁵⁰ Apano Labani ne Beteri awamutolelela awati," Ichintu choo chafuma kwe Yahweh; tutanga tuvwange chimwi ichiwipe nanti achizima. ⁵¹ Lola, Rabeka ali pankolelo pakwewewe. Msende uwapita , alyakuti aye awe amuchi wamwana we sokulu, ndimuno Yahweh wavwanjila ." ⁵² Apano umuwonvi wakwe Abrahamu lyo wivwa amazwi yayo, afukama pansi pamusili pankolelo pakwe Yahweh. ⁵³ Umuwonvi afumya iviya vyakwe siliva niviya vyakwe golide, nivi zwalo, amupa e Rabeka. Apa swinya ivyawila vizima nkaninye indume yakwe nakwe nyina. ⁵⁴ Apano weliwe nawonsi wano walinji nawo awalya nukung'wa, wikazile kulyanye wusiku wonsi, ngapano lyo wakatuka umutondotondo, avwanga ati," Ntumani kwe tatakulu." ⁵⁵ Indume yakwe ne nyina wamunile wati, Lekani umukazyana ayikale naswe kumanda yamwi yatichi, yawe nanti ikumi. Apano akize apite." ⁵⁶ Ukuwa amunena ati," mutakanchinge nene napano Yahweh akolelezile inzila yane. Ntumani alyakuti inje kwe tatakulu." ⁵⁷ Nawo awati," Twandi tumwite umukazyana swinya nukumukolowozya." ⁵⁸ Achaleka awamwita Rabeka numukolowozya," Wuzye wandi upite numuntu wee? Awatolelela ati," Nandi mpite." ⁵⁹ Apano awatuma inkazi yawo Rabeka, apaliponga numuwonvi wakwe uwachanachi, wakwe numuwonvi wakwe Abrahamu nawantu wakwe. ⁶⁰ Awamulota eRabeka, awamunena wati, nkazi yitu, ukawe wanyina wamyanda nimyanda ikumi, swinya nawana wako wapyane impongolo yewano wawapata." ⁶¹ Apano Rabeka akatuka, weliwe nawawonvi wakwe awanachi awakwela ingamila, awakonka umuntu. Mumwata wonye umuwonvi asenda Rabeka, awapita inzila yakwe. ⁶² Ukuwa Ayizeki wikalanga mu negevu, watezile lyo wanyokavye ukufuma ku Biya Lahai Roi. ⁶³ Ayizeki aya muchalo akamanguzi mukwelengania. Ayinula aminso alola, lolani, kwizanga ingamila! ⁶⁴ Rabeka alola, ngapano ala walola Ayizeki, ayika pangamila. ⁶⁵ Avwanga kumuwonvi ati, " Ngaweweni umonsi wino akupita muchalo tusunkania?" Umuwonvi atolelela ati," wetatakulu wane." Achaleka asenda ichiwalo avwimbana. ⁶⁶ Umuwonvi alandila Ayizeki vyonsinye vino wachisile. ⁶⁷ Ngapano Ayizeki amuleta mumutanda wakwe Sera enyina, nga amusenda Rabeka, awa amuchi wakwe, swinya wamukunzile. Achaleka Ayizeki wamyalilisilwe lyo nyina wakwe wafwa.