¹ Apalipano imyulu ninsi yapansi zyasizile, nivintu vyonsi ivyawumi vino vyalinji mwenemo. ² Pawanda mununenulambali Leza wafisile pawumalimo wa mulimo wakwe wuno wawonvile, achili chino wizile puza pawanda wamunenulambali ku milimo yakwe yonsi. ³ Leza apepa uwanda wamunenulambali nukuwutelefya, pamulandu mwakwe wowo wizile puza ku milimo yakwe yonsi yino wawonvile mukwelewula kwakwe. ⁴ Vyo vyalinji avyakuwombwa ukulingana ni myulu ninsi yapansi, pano vyelewuzlwe, pawanda wuno Yahweh Leza wapanzile insi yapansi ni myulu. ⁵ Kutalinji nanti we vupa wa musili wino walinji ukuti ali munsi yapansi, nga kutalinji ichimelwa cha musili chino chalinji chipunsile, Amuno Yahweh Leza atalenjesizye ukuti yitonye pansi yapansi, nga patalinji umuntu wakulima umusili, ⁶ Kweni esusuwe wakwezile ukufuma munsi yapansi nu kusembelela papela pa musili wonsi. ⁷ Yahweh apanga umuntu ku lutukumbu lwivu, nga amufutila mu mpuno zyakwe umufuto wa wumi wakwe, nga umuntu awa amumi. ⁸ Yahweh akomela ichalo kuwu fumilo wilanzi, mwakwe Edeni, nga mulyanye awika umuntu wino wamupanga. ⁹ Ukufuma kumusili Yahweh Leza wapanzile umuti wonsi ukukula chino achizima ku minso ni chizima ku chakulya. choo mukuzanwa nu muti wawumi wuno walinji mukasi muchalo. numuti wakumanya ichizima ni chiwipe. ¹⁰ Uluzi lwafumile mu Eden ukusembelela ichalo. Kulyanye lwagawinkine aluwa induzi zini. ¹¹ Uluzi lwakutalichila we Pishon. Aluliluno lukatantala munsi yonsinye iye Havilah, kuno kuli egolide. ¹² Egolide wansi yoo amuzima. Kuli swinya ebdellium niwe lye onyx. ¹³ Izina lya luzi lwe chitiwili we Gihon. Lweni lukatantala munsi ye Kushi yonsinye. ¹⁴ Izina lya luzi lwe chititatu we Tigrisi, nga lukatantala kuwufumilo we Ashur. Uluzi lwe chini we Euphrates. ¹⁵ Yahweh Leza wasenzile umuntu wamuwika muchalo che Eden ukuwuwonvya nu kuwusunjilila. ¹⁶ Yahweh Leza apingula umuntu, ati, " Kumuti wonsi uwa muchalo mufwile wawalya muwusapuke. ¹⁷ Kweni ku muti wakumanya ichizima ni chiwipe utazipizile wawalya, amuno pawanda wuno ulilya ku muti woo, nakawuzyenye ulifwa." ¹⁸ Apano Yahweh Leza ati, " asachizima kuno umuntu afwile awe wenga. Nandi mupanjile ekavwa uwa kumuyana." ¹⁹ Ukufuma ku musili Yahweh Leza wapanzile ichinyamana chonsi icha munsi ni chinyunyi chonsi icha mwilewelewe. Ngapano wavilesile ku muntu kuti alole muno andi avyitile. Monsi muno umntu witizile ichelewulwa chawumi, lyalinji alizina lyakwe. ²⁰ Umuntu wapile amazina ku vitekwa vyonsi, ku vinyunyi vyonsi vya mwilewelewe, na kuvitumbu vyonsi ivya munsi. Kweni ku muntu weni kutalinji nanti wekavwa uwa kuyana kwakwe weliwe. ²¹ Yahweh Leza wapanjisizye utulo utwakulachisya ukupona pa muntu, achino umuntu walazile. Yahweh wasenzile lumwi uluwazu lwakwe nga ayiyala umuwili pano wasenzile uluwazu. ²² Nu luwazu luno Yahweh wasenzile ku muntu, wapanzile umwanachi nuku muleta ku muntu. ²³ Umuntu ati, " Ipmindi yoo, wee ali fupa lya mafupa yane, nu mutande wamutande wane. Ali yitwa, 'pamulandu wasenzilwe ku muntu." ²⁴ Achaleka umuntu ayisi nu nyina kwe, aliwa ponga nu waku wakwe, nga waliwa amuwili wonga. ²⁵ Wonsi walinji chitankwa, umonsi nu muchi wakwe, kweni watasozilwe insoni.