¹ Achaleka Abram afuma apita mu Ijiputi nga apita aya munegevu, weliwe, umchi wakwe navyonsi vino walinji navyo. Lot nawe apita nawo. ² Nomba Abram walinji amuwotoke kuvitekwa, ne siliva, swinya ne Golide. ³ Wapitilizizye nuwulendo wakwe ukufuma ku negevu ukuya kun Betele, kumasyo kuno kwalinji ipembo lyakwe kali, pakasi pakwe Betele nu Ayi. ⁴ Wayile kumasyo kuno ipembo lyazenzilwe nakali paa wisile pizina lyakwe Yahweh. ⁵ Nomba Lot, wino wapitanga nu Abram, walinji nuwufyo, nivitekwa, nimitanda. ⁶ Amasyo yatawalingine wonsi ukwikala apoliponga, pamulandu ivyuma vyawo vyalinji avivule nkani, umwakuti watanga wikale ponga. ⁷ Naswinya kwalinji imipanzi kuwachemi wakwe Abram nawachemi wakwe Lot. Awina Kenani nawina Pelezi wikalanga munsi pampindinye yoyo. ⁸ Achaleka Abram anena Lot ati, " Leka patakawe impokoto pakasi pakwe wewe nanene, swinya napa wachemi wako nawane; mwakwevyonsi, swe luko longa. ⁹ Wuzye insi yonsi yisi mwakwe wewe? pitilizyani swinya tupawunkane ukufuma kwe nene nkuya kwe ndilo, nene nkuaya kwe kamani." ¹⁰ Achaleka Loti atalangania, swinya alola insi yonsi iyakwe Yorodan yalinji antambalale iyitililwe naminzi konsinye nukuyafika naku Zoar, ngati achalo chakwe Yahweh, ngati ansi ye Ijiputi. Choo chalinji lyo Yahweh atani ayonone Sodomu nu Gomora. ¹¹ Achaleka Loti wasozile ukwikala mumupata wakwe Yorodani nga alungama kuwufumililo wilanzi, swinya nawa luko awapawunkana ukufuma kumuwuye. ¹² Abram wisile munsi ye Kenani, nga Loti ayikala pakasi pamupata wamisumba imitambalale. Azenga imitanda kutali kupipi ne Sodomu. ¹³ Kanonzi awantu wamusodomu walinji awawembu nkaninye ukupanzinkana ne Yahweh. ¹⁴ Yahweh ati kwe Abram, lyo Elot wayipawula kweweliwe, " Lola kumasyo kuno uyimilile ukufuma kambazwa, kambazwa, kuwufumilo wilanzi, nakuwinjililo wilanzi. ¹⁵ Yonsi insi yino walola, ndikupa wewe nawana wako umuyaya. ¹⁶ Ndileka awana wako wavule ngati antukumbu lyansi, aluakuti ndi umuntu angawazya intukumbu zyamunsi, fwandi ni kwata lyakonye wangawazya. ¹⁷ Katuka, uye muwutali swinya namuwupapatale wansi, amuno ndikupa wewe." ¹⁸ Achaleka Abram anyamula imitanda, nga aya ayikala mumiwuyu yaku Mamre, yino yili mu Hebroni, swinya kulyanye azenga nakavuwa kakwe Yahweh.