¹ Nkunena ubwanaloli mwa Kilisitu. Nthakutamantha sona amabyebye ghane ghakumibikila ubukamboni mu Muzimu Ughuswepu ² pakuti indi ni chitima ichikulu sona nu bubavu ubsita kumala mu moyo wane. ³ Pakuti nalondanga ukuti pamo nguniwe nukwibika pa mbali kwa Kilisitu chifukwa cha ba wamwitu, bo tuli idaba lyoka. ⁴ Bo bina Izilayeli. Bo abavumbulile, ubuchindamu, ni laghano, mu chabupi cha lulaghilo, ukwiputa u Chala, sona mu malaghano. ⁵ Abo bobo basekulu bo babo u Kilisitu izite nu kuchindika u mubili---yo we Chala wa vyonsi. Po abaghile ukupaliwa bwilebwile. Ameni. ⁶ Loli te mo chibelile ukuti pamo ilaghano lya Chala lyapotwa. Pakuti te bonsi bo bali mu Izilayeli naloli loli bali ku ba Izilayeli. ⁷ Sona te bonsi yo mphapo ya Abulahamu naloliloli bana bache. Loli, '' Ukwendela mwa Ayizeki momo imphapo yizukwitiziwa.'' ⁸ Momumo, abana ba mubili te bana ba Chala. Loli abana ba mwilaghano bobo bakusendiwa ukuba yo mphapo. ⁹ Pakuti agha mazwi gha laghano: Pakabalilo aka nkuzukwiza, sona umwana akwiza ukupeghiwa kwa Sala.'' ¹⁰ Te chochino chene, loli pisinda u Abulahamu wepe akikutisiwa nu munthu weka, u Tata witu u Ayizeki-- ¹¹ pakuti bo abana bachili batapapiwe sona bo bachili batabombite nachimo ichibibi pamo ichiza, umwakuti ukubomba kwa Chala ukuyana nukuseba kubaghile kubeko, te chifukwa cha mbombo, loli chifukwa cha yuyo akamwitizya-- ¹² vikaneniwa ku kwache, ''Usongo akwiza ukumubombela umunandi.'' ¹³ Chili ngati mo chikasimbiliwa: '' U Yakobo nkamughana, loli u Esawu nkamubenga.'' ¹⁴ Po ulu tunene ichoni? Ka pali ubusita bugholosu nu Chala? Vitangabombiwa. ¹⁵ Pakuti akanena kwa Mozesi, '' Nkuzukuba ni chisa kwa yo namupelela ichisa, sona nkuzukuba ni chililizi kwa yo naba nichililizi.'' ¹⁶ Po ulu, te chifukwa cha yumo yo ighana, pamo chifukwa cha yumo yo asamala, loli chifukwa cha Chala, yo akulangizya ichisa. ¹⁷ Pakuti amazwi ghakati kwa Faragho, '' Iyi yoyo mbombo yo nkakwimika uwe, ukuti ndangizye amaka mwa uwe, sona ukuti izina lyane lufumusiwe mu chisu chonsi.'' ¹⁸ Po ulu, u Chala ali ni chisa kwa yo ighana, sona kwa yo ighana, akughoma umoyo. ¹⁹ Po ulu inthi wize unene ku kwane, '''Ka choni cho akali akulonda ichifukwa? Ka wewenu yo angiminkana nu bwighane bwache? '' ²⁰ Mukususania, munthu, ka wewenu we ungamula ukususania nu Chala? Buli ichakumata chinganena kwa yo achimatanga, '' Ka choni cho wamphanga bunonyene?'' ²¹ Ka uwakumata ate nu bwabuke pi lyongo lyo akupanga ukufuma ku lumbulunga loka ichibigha cha mbombo iyiza, sona ni chibigha ichinyabo ichinji ichakuchibomvya bwilebwile? ²² Buli nanthi u Chala, akighana pakulangizya ubukali na maka ghache ghamanyikwe, angafwililikila nukufwasa pa vya kumata vya bukali ivyakuya pakunangania? ²³ Buli nanthi akabomba ivi ukuti alangizye ubukabi nu buchindamu bwache ku vibigha vya chisa, vyo kale akavipanga mu buchindamu bwache? ²⁴ Buli nanthi akabombanga sona ivi kukwitu, swe akatwitizya sona, te bo bene bo bali muba Yuda, loli sona ukufuma mu ba kunzi? ²⁵ Ngati mo akanenela sona mwa Hoseya: Nkuzukwitizya abanthu bane bo batakaba banthu bane, sona umughaniwa yo ataba mughaniwa. ²⁶ Po inthi vikababele vyo vikaneniwa kukwabo, ' Te mwe banthu bane,' po pala bazukwitiziwa' bana ba Chala uwa bumi,''' ²⁷ U Yesaya akalila nkani ivyakukwamfania na ba Izilayeli, '' Napo ichibelengelo cha bana ba Izilayeli chikaba ngati musesenga wa mu nyanja, loli banandi bo inthi bize wapone, ²⁸ pakuti u Mwene akwiza ukufisya amazwi ghache mwalubilo sona ukusita kuchedwa.'' ²⁹ Ngati mo u Yesaya akanenela pisinda, '' Pala u Mwene wa viwa atakatulekelanga imphapo ngali tuli ngati we Sodomu, sona nge twizite ukuba ngati we Gomola.'' ³⁰ Ka po tukwiza ukunena ichoni? Ukuti abakunzi bo batakabombanga ubugholosu, baba nu bugholosu, ubugholosu ubwa lwitiko. ³¹ Loli aba Izilayeli, bo batakabombanga ululaghilo ulwa bugholosu, bakapotwa pakufika palanyene. ³² Choni cho bakapotwa? Chifukwa batakabombanga nu lwitiko, loli mu mbombo. Bakipunula pibwe ilya kwipunula, ³³ ngati mo vikasimbiliwa, ''lolela, nkubika mu Ziyoni ibwe lyakwipunulapo sona ilyalabwe. Wensi yo akusubila umonyene atakwiza ukususiwa.''