¹ Leka umnthu wensi ivwile bo bali pa bulamulili ubwa pamwanya, pakuti ubulamulili bonsi bukufuma kwa Chala. Ubulamulili bonsi bo buliko busebekite nu Chala. ² Polelo yo nanti akwiminkana nu bulamulili akususya indaghilo zya Chala; sona na bonsi bo bakususania nichi bakwiza ukupokela ubulonzi pa bene. ³ Pakuti abalamulili te bakoghofya pa mbombo inyiza, loli pa mbombo imbibi. Ka ukunyonywa ukuti utakabe we mogha ku balamulili? Ubombenge iviza po inthi ize akukwezye. ⁴ Pakuti we mubombi wa Chala pa Viza. Loli nanti ukubomba ivibibi, ghoghope; pakuti atakunyamula bwaka upanga kusita chifukwa. Pakuti mubombi wa Chala, yo akunyokezya ubukali pa yo abomba akabibi. ⁵ Polelo mube bakwivwila, te chifukwa cha bukali hagha, loli po chifukwa cha mabyebye. ⁶ Pa chifukwa cha ichi numwe musonke nu musonko. Pakuti abalamulili babombi ba Chala, bo bakubombela ichi bwile. ⁷ Mubape bonsi ichakubayana: umusonko kuba musonko, ukatundu ku bakatundu, ubogha ku babogha, umuchinzi ku bamuchinzi ⁸ Mutakabape ningongole nayimo, mwitikizye ukughanana weka nu yunji. Pakuti yo akughana umupalamani wache akukwanisya ilamulo. ⁹ Inkomelezyo, '' Utakabe we malaya, utakakomenge, utakibenge, utakanyonywenge,'' sona ni zinji zyo ziliko zikunganite ulu, '' Umughane umupalamani ngati mo wighanile wemwene.'' ¹⁰ Ulughano lutakumubombela akabibi umupalamani. Polelo, ulughano kufisya kwa lulaghilo. ¹¹ Chifukwa cha ichi, mwamanya akabalilo, ukuti akabalilo kafika kale aka kuzibukila. Pakuti ulu ubupoki bwitu bwapalamila ukuchira napo tukasubilanga. ¹² Ubusiku bwamala, umusanya wapalamila. Polelo tutaye imbombo zya mu chisi, po zanga tuvwale ivilwilo ivya pa bwelu. ¹³ Zanga twendenge akiza kene, ngati musanya, kusita kuvulungana pamo ngati we chakolwa; sona tutakendenge mu bumalaya pamo mubukwakwa, sona mu lombwa pamo mukabini hagha. ¹⁴ Loli muvwale u Mwene u Yesu Kilisitu, sona mutakitikizye nachimo icha mubili, ukuti chibombekenge.