¹ Polelo nkubalenga umwe, ba wa mwitu, mwa chisa cha Chala, mutakabike imibili yinu ukuba likemo lyabumi, ubuswepu, bo bwitikiziwe nu Chala. Ubu bobo bubombeli bwinu ubwa Chala. ² Mutakiyanizyenge ni chisu, loli mwanduke nu kunyokela kubupya kwa nsibo zinu. Mubombe ichi ukuti mumanye cho chiza, ichakwitikiziwa, sona nu bwighane bwa Chala. ³ Chifukwa cha bwila bo bukapewa kukwane po nkunena kwa wensi wa umwe: Mutakinong'onele nkani mwebene ukulusya mo vibelile, loli mubaghile, mwinong'onenge nu budumuzi ubwa kuyana. Wensi ukuyana ni chipimo cha lwitiko lo u Chala abapile umwe. ⁴ Pakuti tuli ni vigabo ivinji mu mubili woka, loli te vigabo vyonsi vili ni mbombo iyakuyana. ⁵ Mukuyana bwaka, uswe sweswe binji mu mubili woka mwa Kilisitu, sona swe chigabo cha yunji nu yunji. ⁶ Tuli ni vyabupi vya kupambanapambana ukulingana nu bwila bo bukapeghiwa ku kwitu. Nanthi yumo ichabupi chache chikunena ivyakunthanzi, vineneke ukulingana ni chipimo cha lwitiko lwache. ⁷ Nanthi yumo ichabupi cha bubombi, muleke abombe. Nanti yumo ichabupi chache cha bumanyisi, muleke amanyisye. ⁸ Nanti yumo ichabupi cha kughomya,muleke aghomye. Nanti yumo ichabupi cha kupa, muleke ape mwakuyana.Nanti yumo ichabupi cha kulongozya, leka alongozye nakayilo. Nanti yumo ichabupi chakubonesya ichisa, leka abonesye nu bugholosu. ⁹ Leka ulughano lube lwa kusita bumyansi. Nyanyala cho chibibi; kolesya cho chiza. ¹⁰ Ukuyana nu lughano lwa pa ba wamwitu, mughanane ni chililizi weka nu yunji. Ukuyana nu muchinzi, muchindinkanenge weka nu yunji. ¹¹ Ukulingana ni changwi, mutakabe bakata. Ukuyana nu muzimu, mwipe. Ukuyana nu Mwene, mumubombele. ¹² Muhobokenge mu lusubilo, mube bachimyeka mu ntamyo, musubalilikenge mu nyiputo. ¹³ Mwavwanenge nabo mu vyakusobelwa abanthu abaswepu aba Chala. Muzyaghe inzila izinji izyakulangizya ubwiza. ¹⁴ Mubasayenge bo bakubavwima; Mubasayenge sona mutaka ba vwimenge. ¹⁵ Muhobokenge nabo bakuhoboka; Mulilenge nabo bakulila. ¹⁶ Mube ni nsibo yoka kwa weka nu yunji. Mutakinong'onenge mu nzila iyakwitutumula, loli mupokele nabakuyuyuka. Mutakipale pa nyinong'ono zinu. ¹⁷ Mutakanyokezye ububibi pa bubibi. Mubombenge iviza pa maso gha banthu bonsi. ¹⁸ Nanti mo vingabela, ukulingana namo mungabela, mwikalenge nu mutende na banthu bonsi. ¹⁹ Mutakatanizyanenge mwebene, baghaniwa, lilo mulekele inzila ya bukali u Chala. Pakuti visimbiwe, ''''Ukutanizya kwane; Nkwiza panyokezya; akuti u Mwene.'' ²⁰ Loli '' nanti umulwani wako ali ni nzala, mulyesye. Nanti ali ni nyota, umupe ichakung'wa. Pakuti nanti ukubomba ichi, ukwiza pakubunganika amakalazibwe gha moto pa mutu wache.'' ²¹ Mutakapotiwenge ni mbibi, loli mupotenge imbibi nubwiza.