¹ Po ulu nkunena ukuti, ka u Chala akabakana abanthu bache? Te mo vingabela. Pakuti nune ne mu Izilayeli, imphapo ya Abulahamu, wa luko lwa Benjamini. ² U Chala atakabakana abanthu bache, bo akabamanya. Ka muzimenye zyo amasimbo ghakunena izya Eliya, mo akalambila kwa Chala nizya kususania kuba Izilayeli? ³ ''Mwene, bakoma abaghonela bako, bapangulania ivighemo vyako. Nasyala nemwene, po bakulonda ubumi bwane.'' ⁴ Ka po ukwamula kwa Chala kukati choni? '' Nasengula ne mwene abanalume abakukwana seveni sawuzandi bo batamufugamilile u Baal.'' ⁵ Nulu bwaka apa, pakabalilo aka basyeteko bamo chifukwa cha kusebiwa nu bwila. ⁶ Loli nanthi cho chisa, patalipo sona imbombo. Napo ubonyene ichisa chitakwiza ukuba cho chisa sona. ⁷ Po choni lelo? Ichinthu cho aba Izilayeli bakachilondanga, batakachagha, loli abasaliwa bakachagha, po bo bakasyala bakabaghomia. ⁸ Ichi chili ngati mo chisimbiliwe: ''U Chala abapile umuzimu wa bulunkanu, amaso ukuti batakalingenge, na makutu ukuti batakivwenge, mphaka kwi siku ili.'' ⁹ Po u Devedi akati, '' Lileke i tebulo lyabo libe ngati chilepa pamo chipingo, cha kwipunulapo sona chakubakanizya. ¹⁰ Leka amaso ghabo ghabe ni chisi ukuti batakalingenge, sona bagombane imisana yabo umwabukilila.'' ¹¹ Po ulu nkunena, '' Ka bakipunula ukuti bawe? '' Te mo vingabela. Mu buyo bwache, umwakupotwa kwabo, ubupoki bwiza ku ba kunzi, umwakuti babanene umwa kabini. ¹² Po nanthi ukupotwa kwabo kwa bukabi bwa pa chisu, sona nanthi ukusita kwandula kwa bukabi bwabo bwa kunzi, po bukulu buli bo bazukwimalizya nabo? ¹³ Po ulu nkunena ku kwinu mwe ba kunzi, sona mo mbelile ne mutumiwa wa ba kunzi, nkwikuzya pa mbombo yane. ¹⁴ Pamo ninganenela mu kabini ku bo mubili wane. Ukuti lumo tungapoka bamo. ¹⁵ Po nanthi ukukana kwabo kukung'anamula ukulamba ku chisu, po ka ukwitikizya kwabo kukwiza ukuba buli buli ku bumi ukufuma ku bufwe? ¹⁶ Po nanthi ivikomwa vyabwandilo viswepu po ni chakwela chope chiswepu.Nanthi imisisi yiswepu po ninsamba zyope ziswepu. ¹⁷ Loli nanthi zimo insamba zyache zipyokite, pala uwe, ulusamba ulwamunkolongo ulwa Olive, mukukakatila ukonyene sona mukugabana imisisi iyiza iya likomo lya Olive, ¹⁸ mutakitutumule kunsamba. Po nanthi mukwitutumula, te mwe mukuyavwa imisisi, loli imisisi yoyo yikubavwa umwe. ¹⁹ Po inthi wize unene ukuti, '' Insamba zikapyoliwa ukuti nize nkakatileko.'' ²⁰ Bobo bwanaloli. Chifukwa bo batakwivwila bobo bapyokiteko, loli wimilila nganganga chifukwa cha lwitiko lwako. Utakinong'one nkani umwapamwanya, loli ghoghope. ²¹ Pakuti nanthi u Chala atakasengulanga ulusamba ulukali po atangakusengula nuwe. ²² Lolela apa, ulu, ubwila bwa mbombo nu bukali bwa Chala: Ubukali bukiza ku ba Yuda bo bawile, loli ichisa cha Chala chili pa pinu, nanthi mutakupitilila mu bwila bwache. Po lumo numwe mungize mudumuliwe. ²³ Sona ulu bope, nanthi batakubukilizya mukusita kusubila, ba kwiza ukubanyokezya. Pakuti u Chala amenye mo angabanyokezya sona. ²⁴ Pakuti umwe mukadumulika ngati chipeliwa lyo likomo ilya Olive ilya mu nkolongo, sona ukupambana mu chipeliwa mukabikiwa ku chikomo cha Olive ichiza, ka vizukuba ubwinji buli buli, kutusamba utwakupeliwa, ukuti tubikiwe ko tukafuma ku chikomo cha Olive? ²⁵ Nthakulonda umwe ukuti mube basita kubuziwa, ba wamwitu, ivya bubombi ubu, ukuti mutakabe na mahala mu nyinong'ono zinu: Ichabufisamu chakuti aba Izilayeli babaghomizye imyoyo yabo mphaka ubwinji bwa ba kunzi bwize. ²⁶ Ulu aba Izilayeli bonsi bakwiza ukupokiwa, ngati mo visimbiliwe: '' Mu Ziyoni momo muzukufuma umupoki. Akwiza ukufumia utwa chala utubibi ukufuma mwa Yakobo, ²⁷ sona ili likwiza ukuba lilaghano nabo, po nkwiza ukufumia imbibi.'' ²⁸ Pakuyana ni bangeli mo libelile, bo balwani chifukwa cha bwighane bwinu. Loli ukuyana namo ulusalo lubelile, baghaniwa chifukwa cha basekulu babo. ²⁹ Pakuti ichabupi nu kwitizya kwa Chala vitakuchenjapo. ³⁰ Pakuti kale mutakivwila kwa Chala, loli ulu mwapokela ichisa chifukwa cha kusita kwivwila. ³¹ Mu nzila iyonyene, po aba Yuda baba basita kwivwila. Ichakwizapo chakuti ichisa chikalangiziwa ku kwinu pakuti bope ulu babaghile ukupokela ichisa. ³² Pakuti u Chala ighalila bonsi abasita kwivwila pakuti pamo alangizye ichisa kwa bonsi. ³³ Oh, ubuya pansi bwa bukabi bonsi amahala nu kumanya kwa Chala! Wewenu yo angamanya ukudumula kwache, sona inzila zyache zipululile pa vyo akuvyagha! ³⁴ Pakuti wewenu yo amenye inyinong'ono zya Mwene pamo yo iza ngati likambala? ³⁵ Pamo wewenu uwa bwandilo yo amupile chimo ichinthu u Chala, ukuti u Chala ize amunyosezye papo?'' ³⁶ Pakuti ukufuma kukwache sona ukwizila mu mwache sona kukwache mo vyonsi vili. Ubuchindamu bwa bwile bwile bube ku kwache. Ameni.