¹ Ba wamwitu, umoyo wane ghukunyonywa sona vyo nkulenga kwa Chala vyabo , ukuti bize bapokiwe. ² Pakuti nkusimikizya ku kwabo ukuti bali ni changwi kwa Chala, loli bakubomba ukusita kumanya. ³ Pakuti, ukupotwa ukwivwisya ubugholosu bo bukufuma kwa Chala, nukulonda ukubomba ubugholosu bwabo, batakubika ubugholosu kwa Chala. ⁴ Pakuti u Kilisitu bwikusi bwa ndaghilo ubwa bugholosu kwa wensi yo akusubila. ⁵ Pakuti u Mozesi akasimba ivya bugholosu bo bukwiza ukufuma ku ndaghilo: '' Umunthu yo akubomba ubugholosu bwa ndaghilo azukwikala mu bugholosu bunonyene.'' ⁶ Loli ubugholosu bo bukufuma mu lwitiko bukunena ichi: Utakanene mu moyo wako, 'Ka wewenu yo inthi akakwele ku mwanya?' (yo inthi, akamwisye u Kilisitu); ⁷ sona manye unene uti, 'Ka wewenu yo inthi akisikile ku chisi?''' ( yo inthi, akamuzusye u Kilisitu ukufuma ku bufwe). ⁸ Loli vikunena ichoni? '' Amazwi ghali papipi nuwe, mu mulomo wako sona mu moyo wako.'' Gho mazwi gha lwitiko, gho tukulumbilila. ⁹ Pakuti nanthi mu mulomu wako ukwitikizya ukuti u Yesu we Mmwene, sona nukusubila mu moyo wako ukuti u Chala akamuzusya ukufuma ku bufwe, inthi wize upokiwe. ¹⁰ Pakuti nu moyo wa yumo yo akusubila sona ali nu bugholosu, sona nu mulomo yumo akwitikizya inthi ize apokiwe. ¹¹ Pakuti amasimbo ghakuti, '' Wensi yo akusubila mu mwache atakwiza ukoziwa insoni.'' ¹² Pakuti patalipo imphambano pakasi pa ba Yuda na ba Giliki. Pakuti viyanite bwaka ukuti u Mwene we Mwene wa bonsi, sona bukabi bwa bonsi bo bakumwitizya. ¹³ Pakuti wensi yo akwitizya izina lya Mwene akwiza ukupokiwa. ¹⁴ Ka po bangamwitizya buli buli umwene yo batakumusubila? Ka po bangamusubila buli buli umwene yo batamwivwilepo? Bangamwivwa bulibuli bo bate nu mulumbilili? ¹⁵ Ka po bangalumbilila buli buli, pene po nanthi babatuma?--Ngati mo vikasimbiliwa, '' Bwiza buli bwa nsalala zya bo bakulumbilila amazwi amiza!'' ¹⁶ Loli te bonsi bakwivwila amazwi amiza. Pakuti u Yesaya akati, ''Mwene, ka wewenu yo akwivwila vyo ivwa kukwitu?'' ¹⁷ Pakuti ulwitiko lukufuma kukwivwa, sona ukwivwa ku mazwi gha Kilisitu. ¹⁸ Loli nkunena ukuti, '' Ka batakivwa?'' Eeh, babaghile. '''Umuzumanzi bukivwika pa chisu chonsi ichapansi, sona na mazwi ghabo mphaka ku bumalilo bwa chisu.'' ¹⁹ Ukupululila apo, nkunena ukuti, ''Ka aba Izilayeli batakachimanya?'' Pabwandilo u Mozesi akati, inthi mbanenele umwe mu kabini ukuba ngati te mwe baluko. Ukuba ngati luko lo lutakwivwisya, nkwiza ukunyamusya ubukali bwinu.'' ²⁰ Po u Yesaya akaba pa bwelu bo akunena ukuti, '' Nkaghiwa nabo batakandondanga. Nkabonekela kubo batakandalusyapo.'' ²¹ Loli ku ba Izilayeli akati, '''Umusanya ghonsi nkafikila ni nyobe zyane ku bo batakivwila sona ku banthu ba moyo ughughomu.''