¹ Paulo nu Timoti, ababombeli ba Kilisitu Yesu, ku banthu bonsi aba Chala abaswepu mwa Kilisitu Yesu bo bali ku filipi, poka nabakubalingilila na balongozi. ² Za ichisa chibe numwe nu bufwase bwa kufuma kwa Chala u Tata witu poka nu Mwene u Yesu Kilisitu. ³ Nkhusalifya U Chala wane akabalilo konsi ko nakumbuka umwe, ⁴ bwile, mu lwiputo lwane lonsi ulwa umwe mwensi, nkupanganga ulwiputo lwa buhobosu ⁵ chifukwa chabupoka bwinu mu bulumbilili ukufuma pisiku lya bwandilo mupaka ulu. ⁶ Ne wakwikutisiwa nichi chene, ukuti yo akanda imbombo inyiza mumwinu inthi abukilile nukuyimalizya ukufika pisiku lya Kilisitu Yesu. ⁷ Chakunjana pakwivwa munzila iyi numwe mwebonsi chifukwa indi numwe mumoyo wane. Mwebonsi mwali mwe banyane muchisa monsi mukupinyiwa kwane sona namukulwililila kwane sona namukughomia kwa bulumbilili. ⁸ Pakuti U Chala we kamboni wane, mo nkhubalondela mwensi umwe nichibabilizi cha Kilisitu Yeesu. ⁹ Po ulu lolwiputo lwane: ukuti ulughano lwinu lunyamile nkhani sona nkhani mumahala na mukwivwisya ¹⁰ po ukuti mwitikizye cho chochiza nkhani, sona po mukwiza ukuba bakufikapo sona nukusita kususiwa ukufika pisiku ilya Kilisitu, ¹¹ ukwizula ninseke ya bugholosu ukufumila mwa Yesu Kilisitu ku buchinda na ku mapalo gha Chala. ¹² Ulu nkhulonda umwe mumanye, bawamwitu, ukuti cho chitika kukwane chatula ukuti ubulumbilili buye munthanzi. ¹³ Pa chifukwa ichi, amabunyolo ghane mwa Kilisitu ghakiza nukubalizya monsi mubalinda ba munyumba inkhulu sona na kwa wensi bwaka. ¹⁴ Abinji mwa ba wamwitu baliko nulusubilo ulukulu mwa mwene chifukwa cha ma bunyolo ghane, sona bali nubujinvu ubwakunena akiza izwi. ¹⁵ Bamo momumo mphaka bakulumbililanga U Kilisitu ukufumila mukabini nu lwisi, sona bope bamo ukufumila mukulonda ukwiza. ¹⁶ Ababumalilo bakubomba ichi ukufumila mulughano, ukumanya ukuti mbikiwe kuno pakuti ichipanga chipokiwe, ¹⁷ Loli aba bwandilo bakalumbililanga U Kilisitu ukufumila mukabele kabupafu, ukusita ukufikapo. Bakinong'ona ukwiza pakumphelela inthamio po indi mubunyolo. ¹⁸ Po choni lero? chene chakuti munzila yonsi _kali ukufumila muvyabumiansi pamo ukufumila mubwanaloli_ U Kilisitu akulumbililiwa, sona mu ichi nkhuhobika. naloli, sona nkwiza ukuhoboka, ¹⁹ pakuti nkhumanya ukuti ichi chikwiza ukuboneka nu butuli ukwendela munyiputo zinu sona nu butuli ubwa muzimu uwa Yesu Kilisitu. ²⁰ Ko kulonda kwane kwakulindilila sona nu lusubilo ukuti nthakwiza ukukoziwa insoni nakamo, loli nu bujinvu bonsi, ulu ngati bwile, U Kilisitu akwiza pa kweziwa mumubili wane, kali mubumi pamo mubufwe. ²¹ Pakuti kukwane pakubako we Kilisitu sona pakufwa kukaba. ²² Loli nanthi nkubako kumubilikokuti chikung'anamula mbombo ya bwanduzi ku kwane. Loli choni chonsale? nthakumanya. ²³ Chifukwa mbikiwe pakasi pa vinthu vibili. Ukulonda kwane kwakuti nyamuke inje imbe nu Kilisitu, chochingaba chizapo, ²⁴ Loli pakusyala mumubili chakulondiwa chifukwa chinu. ²⁵ Pakwikutisiwa nichi, Nkhumanya ukuti Nkwiza ukusyala sona nukubukilila numwe mwebonsi, chifukwa chakukula sona nu buhobosu mu lwitiko, ²⁶ umwakuti mu mwane mwize mubenge ni chifukwa icha kubusila mwa Kilisitu Yesu po inthi nize ku kwinu sona. ²⁷ Mwipangisye mwebene mukayilo akakuyana nu bulumbilili bwene ubwa Kilisitu, umakuti kali nkwiza pakubalinga umwe pamo nkupotwa nize nivwenge ivinu, ukuti mwimilile nji mumuzimu ghoka, ninsibo yoka mwensi mukulwisya chifukwa cha lwitiko lwa bulumbilili bwa mazyu. ²⁸ Mutakoghofyeke na chili chonsi nabo bakuboghofya babo balwani binu. ichi chochimanyikwilo chabo ichakumala kwabo, loli bupoki bwinu_sona chakufuma kwa Chala. ²⁹ Pakuti chipeghiwe bwaka ku kwinu chifukwa cha Kilisitu tekokuti kumwivwila kwene, loli sona nukutamiwa chifukwa chache, ³⁰ Ukubanga ni nthamio zya kuyana zyo mukazilinga mumwane, sona ulu mukwivwa mumwane.