¹ Bo kwasyala amasiku ghabili ukufika pakabalilo ka lusekero lwa pasika nichibama ichambula chilungo. Abaputi abasongo naba simbi bakalondanga inzila zya kumukolela mubujanja ukuti bamukome. ² Bakanenezanianga ukuti batakamukole pakabalilo ka lusekero lwa pasika ukuti patakabe ivivulupi pakasi pa banthu. ³ Pakabalilo ko u Yesu akaba mu chikaya cha Betaniya, munyumba ya Simon uwa mambombo, po bo balizingilizizye itebulo akiza umwanakazi kukwache anyamwile ibotolo lya mafuta ilya alabasita aghakudula sona aghakununkhila akiza. Akiwula ibotolo lila nukupungulila amafuta gha alabasita pamutu wa Yesu. ⁴ Loli bamo bo bakabapo bakakalala. ukunenezania kwabo bakatingi, '' chonicho akunanga amafuta munzila iyi?'' ⁵ amafuta agha nge ghawuziwanga pa mutengo uwukulu uwa ndalama fili handiledi; denali, nukubapa abapina.'' ⁶ Loli u Yesu akati, '' muleke umwanakazi uyo pamwene choni cho mukumutamya? Amphangila ichinthu ichiza une. ⁷ Pakuti abapina muli nabo akabalilo konsi, pala mukulonda mungabavwa loli te mube nune akabalilo konsi. ⁸ Abomba cho ighanite amphakazizya nzila po nchili nthasiliwe. ⁹ Naloliloli nkhubabuzya ukuti kulikonsi ko amazyu gha chala ghakupalaziwamchisu, cho umwanakazi uyu abomba chikwiza ukuneniwanga, ukuti bamukumbukilenge.'' ¹⁰ Po u Yudas isikayoti uwa bamo twelovu akafumapo nukuya ku baputi abasongo ukuti amutwale u Yesu. ¹¹ Bo abaputi bivwa ivi bakahoboka nukusimikizya ukuti inthi bamupe amakopala. Akanda pakulonda inzila zyo angamukolela u Yesu. ¹² Pisiku ilya bwandilo ilyakulya ichibama chambula chilungo, po bakakomanga numwana wa nang'ozi pakabalilo ka lusekero lwa pasika, abamanyili bache bakamubuzya ukuti, '' Kokwi ko ukulonda tuye tusenganizye ukuti uye upangileko ulusekero, lwa pasika ulu.'' ¹³ Akatuma abamanyili babili nukubabuzya ukuti, '' buka mukaya ko mulinganite nako, inthi muye mumwaghe umwanakazi anyamwile inthendo ya mizi, muye mumukonkhe, ¹⁴ nukunena kumwenecho wa nyumba, ' ka ichipinda chilikwi cho ningapangilamo uluselo lwa pasika na bamanyili bane?'' ¹⁵ Inthi aye abalange ichipinda ichapamwanya ichikulu cho banozizye kale, momo muye musenganizye ichakulya ichi.'' ¹⁶ Abamanyili bakanyamuka nukubuka ku malo aghakulu. Bakavyagha vyonsi ngati mo u Yesu akababuzizya, sona bakanozya ichakulya cha lusekelo lwa pasika. ^{17 19} Bo chaba chamabwila, akiza nabo twelovu.Bo bikala pakulya u Yesu akababuzya akati, '' Naloliloli nkhubabuzya uwabamo mwa umwe mwe tukulya poka inthi ambike kuba lwani. ¹⁸ Bakilumbusya mumoyo paweka paweka, '' Naloli une hagha?'' ²⁰ U Yesu akamula nukubabuzya, we yumo mwa umwe twelovu, yumo tukulya nawe imbale yoka. ²¹ U mwana wa munthu inthi abuke ngati mo vikalembekela ivyache. Loli mukosi ku yo akupeleka umwana wa munthu ukuti apamanthiliwe. chikaba akiza ukuti kukwache nge atakapapiwanga. ²² Bobali pakulya u Yesu akasenda ichibama, akachisaya, po akachinyamula nukubapa abamanyili bache, po akanena, '' senda ichi, uwu wo mubili wane; ²³ Po akasenda ukapu, akasalifya, po akabapa, bonsi bakang'wa ufuma mula. ²⁴ Po akati , uyu we daba wane, uwakusimikizya, lyo lyatonya pachifukwa cha banthu abinji. ²⁵ Nubwanaloli nkhubabuzya umwe nthakwiza pakung'wa sona u vinyo uyu mpaka pisiku lyo inthi nize ng'wele sona mubumwene ubwa chala,'' ²⁶ Po bakimba ulwimbo, akafuma akaya kuchipili cha maolive. ²⁷ U Yesu akababuzya bonsi, '' mwebonsi mukwiza pakunsamala pakuti lisimbiwe, Nkhwiza pakumukola uwakudima po abanang'ozi bakuzukusatana; ²⁸ Loli pala nazyuka nkhwiza pakubalekelela pakufika ku Galileya. ²⁹ U Petulosi akamubuzya akati napo bonsi bize bsamale une awe. ³⁰ U Yesu akati, '' nubwanaloli nkhukubuzya uwe ilelo, ubusiku bunonyene bo umukolwe atalilite bo wankhana katatu'' ³¹ LOli u Petulo akati, '' napo mbaghile pakufwa nuwe nthakwiza pakukukanapo'' Bonsi bakanena ipangwi lyoka. ³² Akabuka ku buyo bobukwitiziwa pakuti Gesemani, po uYesu akanena ku bamanyili bache, '' ikala pano po une nkhwiputa.'' ³³ Akamusenda u petulosi, Yakobe nu Yohani, akabasendela papache po akaba nichitima sona akayimba hee. ³⁴ Po akanena nabo ukuti umoyo wane wizwile ni chitima ichakufwa nacho. mwikale panonyene sona mube maso mwipute.'' ³⁵ Akafunthuka panandi, u Yesu akawa pansi nukwiputa ukuti , Nanthi chikabanga chamachitiko nge ulubako ulu lwamphululila. ³⁶ Po akanena, '' Abba, Tata, ivinthu vyosi vipepe nuwe. Fumyako ulubako ulu kukwane. Ubwighane bwane awe loli ubwako.'' ³⁷ akanyokela po akaya abagha bawonite, po akanena nu petulosi, '' simoni petulosi ka uwonite? mukupotwa pakuba maso pakabalilo koka? ³⁸ Mube maso mwipute pakuti numwe mutakingile munthamyo. Umoyo wukulonda loli umubili wute namaka. ³⁹ Sona akiza afumapo akaya pakwiputa, po akaya sona akabonvia amazyu ghalanyene. ⁴⁰ Bo anyokela sona akagha sona bawonite, pakuti amaso ghabo ghakang'wama, po bakasoba ichakunena kukwache. ⁴¹ Bo iza akababuzya akati, '' muchili muwonite mukutuzya? Basi! akabalilo kakwana. Linga! umwana wa munthu ali pabikiwa mu nyobe zya babibi. ⁴² Nyamuka; Twende tubuke. Linga, uwa bamo yo akumbika muba lwani ali papipi,'' ⁴³ Bo uyesu achili akunena u yuda, uwabamo twelovu, akiza nabanthu abnji bakanyamula abapanga ni nkhomo, bakafuma ku mputi usongo kubamanyandaghilo na kubasongo. ⁴⁴ yo akamubikanga munyobe zyabo akabapa ichimanyisyo, akati, '' yo nanthi mwagha namufyompha bo weyuyo. po mumukole nokumulekezya.'' ⁴⁵ Bo uyuda afika, nalubilo akasamalila kwa Yesunukuti, ⁴⁶ po akamufyofyompha. po bamupalamila nukumukola. ⁴⁷ Yumo uwa bamo mubobakabapo akamudumula ikutu uwambombo wa mputi usongo. ⁴⁸ U Yesu akanena nabo, '' mwafuma kunzi nabapanga ninkhomo ukunkhola une ngati ne chigebenga? ⁴⁹ Bo nkhuba numwe mu tempelinkhamanyisyanga mutakamphinya loli ichi chikubombiwa umwakukwanilisya amasimbo. ⁵⁰ Bosi bo bakaba nu Yesu bakasamala nukumuleka. ⁵¹ U mulumendo yumo yo akavwala umwenda wene, akamukonkhanga u Yesu. Po abanthu bakamukola, ⁵² akaleka imyenda yache nukusamala bwazi. ⁵³ Bakaya nawe u Yesu kwa muputi usongo. Ko bakabungana nawe bonsi abaputi abasongo, abasongo mu ba yuda na bamanya ndaghilo. ⁵⁴ Umwene u petulosi akamukonkhanga pabutaliko, nukuyukufika ku nyumba ya kulongela inongwa, kwa mputi usongo. Akikala kupipi na malonda bobakaba kupipi nu moto bakotanga. ⁵⁵ Abaputi abasongo naba longi bonsi bakayezya yezya pakubwagha ubwagha ubwa kamboni ubwabumyasi ubwakumukomela u Yesu loli batakabwagha nabumobumo. ⁵⁶ Abakamboni abinji bakanena ubumyasi, sona ubwakamboni bwabo butakivwika. ⁵⁷ Bamo bakimilila nukubika ubwakamboni mwabumyasi; ukuti, ⁵⁸ bakamwivwa akuti, '' nkhwiza pakuyivongola inyumba ya chala iyi yo yizengiwe ninyobe, pa masiku ghatatu nkhwiza pakuzenga iyinji yo yitazengiwe ninobe. ⁵⁹ Loli pope umwakamboni bwabo butakivwika. ⁶⁰ Umuputi usongo akimilila panthazi papabo nukumulalusya u Yesu ukuti, '' Ka utenilyamulo pavyo abanthu bakukunenela?'' ⁶¹ Loli akaba myaa atakamula nachimochimo. U muputi usongo akamulalusya sona ukuti, '' ka we kilisitu, we mwana wa musayiwa?'' ⁶² U Yesu akati, '' nene; po muzukumulinga umwana wa munthu bo ikalite kunyobe indyelo iya maka sona akwiza pamabingu kumwanya.'' ⁶³ U muputi usongo akazepulania amalaya ghache akati, '' ka tukulonda sona abakamboni abanji? ⁶⁴ Mwivwa mwebene mo amusamulila uchala. Ka mukuti choni?'' bosi bakivwana ukuti akomiwe. ⁶⁵ Bamo bakanda pakumuswilila amati, bakamuvwinkha kumaso nukumuma, nukumubuzya ukuti, '' kubwa,'' abalindilili bakamusenda nukumuma. ⁶⁶ Umwene u petulosi akaba munthende mwa nyumba yakulongela inongwa, ⁶⁷ po uwambombo umusungu uwa muputi usongo akiza kukwache. Akamulinga u petulosi akota umoto mwene, akamutonthomela nukunena ukuti, '' uyu wepe akaba nu Yesu um Nazaleni.'' ⁶⁸ Loli akakana, '' nthakumanyapo nachimo, nkhupotwa nukwivwisya vyo ukunena.'' akasama nukufuma pamulyango. Po umukolwe akalila, ⁶⁹ Loli umusungu uwambombo yula akamulingisya nukubabuzya sona bo akaba nabo papipi akati, '' umunthu uyu we yumo uwabamo.'' ⁷⁰ Loli akakana sona. pakati penda akabalilo kanandi bobakaba papipi bakamubuzya sona u petulosi bakati, '' naloli uyu we yumo uwa bamo, nuwe we mu Galileya.'' ⁷¹ Loli akanda ukunena amazyu agha kulapa, '' nthamumenye umunthu yo mukunena uyo.'' ⁷² Mwalubilo umukolwe akalila akabubili. Po u petulosi akakumbuka amazyu gho u Yesu akamubuzya; '' bo umukolwe atalilite kabili, inthi ukankhane katatu,'' akawa pansi nukulila.