¹ bakati bafika mu yerusalemu, bakaba kupipi na kaya ka Betifagi na Betaniya pipili lya Olive, u Yesu akabatuma abamanyili bache babili. ² Akabuzya akati, '' buka mu kaya kokalinganite nuswe. pomukwinjila bwaka mula, inthi muyaghe imphunda yo batakwelitepo lumo, muye musatule mwize nayo kukwane. ³ Pala yumo aya pakubabuzya ukuti choni cho mukubomba ichi? muye munenenge ukuti umwene akuyilonda sona inthi ayinyosye lunonyene. ⁴ bakabuka bakayagha imphunda yo yipinyiwe pamulyago wakunzi kokukwenda abanthu abinji, po bakayisatula. ⁵ abanthu bamo bobakimilila palanyene bakababuzya bakati, '' mukubombachi, mukusatula imphunda iyo?'' ⁶ bakanena nabo ngati mo u yesu akababuzizya, abanthu bala bakabaleka bakabuka nayo. ⁷ bakiza nimphunda yila kwa Yesu sona bakasumbila imyenda yabo palanyene, akikalapo. ⁸ Abanthu abingi bakatenga imyenda yabo munzila, bamo bakatega ivisamba vyobakadumulanga mumiwunda yabo. ⁹ bobakatanjila nabo bakamukonkha bakapunda, '' Hosana! musayiwa yo akwizira mwizina lya chala. ¹⁰ chisayiwa ichinamwene chochikwiza icha tata witu u Davide Hosana kumwanya!'' ¹¹ Po u Yesu akiza injila mukaya ka Yerusalemu ko akabuka mu Tempeli nukulingisya chilichonsi ichakuzyungulila palanyene. chifukwa chati akabalilo kakamala akafuma nukubuka ku Betaniya nabamanyili twelovu. ¹² indabi lyache po bakafuma mukaya ka betaniya, u yesu inzala yikamubaba. ¹³ ukulingila pabutali ikomo lya mukuyu lyo likaba namani, akabuka pakuya pakulinga pala angachagha ichikomwa chimo mulanyene, akati afika pala atakagha nachimo ukupatula amani pakuti kataba kabalilo ka mikuyu pakwela. ¹⁴ Akanena kwikomo lila, '' nayumo yo alilyapo ichikomwa mwa uwe sona.'' Nabamanyili bache bope bakivwa. ¹⁵ Bakiza ku Yerusalemu, u Yesu akinjila mu Tempeli nukwanda pakusamazya bobakawuzyanga nabo nabo bakawulanga mu Tempeli. Akang'anamulanga ama tebulo gha bobakachenjanga indalama nimipando ya bobakawuzyanga inkhunda. ¹⁶ Atakitikizya nayumo ukuti anyamule chimo ukufuma mu Tempeli chochikawuliziwanga. ¹⁷ akabamanyisya nukunena ukuti '' Zitakalembwa pakuti inyumba yane yikwitiziwa nyumba ya nyiputo ya visu vyonsi? Loli mwaying'anamula ukuba ya biba.'' ¹⁸ Abaputi abasongo na balembi bakivwa vyo akanena, bakalondalonda inzila ya kumukomela. Pakuti bakamowopanga chifukwa ibumba lyabanthu likaswighanga nubumanyisi bwache. ¹⁹ Ichamabwila bo chafika, bakafumamo mukaya akakulu kala. ²⁰ Bobakwenda pandabindabi, bakalinga ikomo lya mukuyu lyumile. ²¹ U Petulosi akakumbuka nukunena ukuti, '' Mumanyisi, linga! ikomo lya mukuyu lyo ukaliwuna lyumilile.'' ²² U Yesu akabamula, '' mube nu lusubilo mwa chala. ²³ Nalololi nkhunena kukwinu ukuti pala yumo akuti kwipili kawile mu '' nyanja'' inga atakukayikila mumoyo wache loli asubila ukuti cho anena inthi chibombwe, chocho u chala akwiza ukubomba. ²⁴ Po nkhunena kwa umwe ukuti; chilichosi cho wiputa nukulenga subila ukuti wachipokela sona chikwiza pakuba chako. ²⁵ Pala mukwimilila nukwiputa mubahobokele bonsi bomunangilanite nabo ukuti u Tata winu yo ali kumwanya abahobokele numwe imbibi zyinu. ²⁶ Loli pala mutakuhobokela, wepe utata yo ali kumwanya atakwiza pakubahobokela imbibi zyinu. ²⁷ Bakiza sona mu Yerusalemu. Bo u Yesu akwenda mu Tempeli, abaputi abasongo, abasimbi nabasongo bakiza kukwache. ²⁸ Bakamubuzya bakati, '' maka buli gho ukubombezya pakupanga ivinthu ivi sona wewenu yo akupile amaka aghakubombela ivinyene?'' ²⁹ u Yesu akababuzya akati, inthi mbalalusye ilalusyo lyoka mumbuzye nune inthi mbabuzye amaka gho nkhubombela pakupanga ivinthu ivi. ³⁰ Ulozyo lwa Yohani, lukafuma kumwanya pamo kubanthu? munamule. ³¹ Bakanenezania benebene nukukangana ukuti, '' Pala twati lukafuma kumwanya inthi bati choni cho mutakamusubila? ³² Loli pala twati lukafuma ku banthu; ( bakowopa abanthu pakuti aliwensi akaba nubwanaloli ukuti u Yohani akaba muwonela.) ³³ Po bakamwamula u Yesu bakati, '' tutakumanyapo nachimochimo.'' U Yesu akababuzya akakati nune tembabuzye amaka gho ngubombezya pakupanga vyonsi ivi.