¹ Indabindabi pisiku lya bwandilo mu sabata bo kabubila kuli ichisi, u Maliya Magadalena akabuka kwi pumpha akalinga ibwe bafumizyepo pi pumpha. ² Po akasamala nukubuka kwa Simoni Petulo na kwa mu manyili yo u Yesu akamughana, nukubabuzya ukuti, '' Bamufumizyemo u Mwene mwi pumpha, po tutakumanya ko bamubika.'' ³ Po u Petulo nu mumanyili yula bakanyamuka, bakabukanga kwi pumpha. ⁴ Bonsi bakasamala poka, umumanyili uyunji yula akasamala lubilo nukumulekelela u Petulo po akaba wa bwandilo ukufika pi pumpha. ⁵ Akinama nukusungamila, akalinga imyenda yila yili palanyene, loli atakinjilamo. ⁶ U Simono Petulo bo afika pisinda pa pache akinjila mwipumpha. Akalinga ukuti imyenda yili mulanyene ⁷ sona umwenda gho ghukaba ku mutu kwache. Ghutakaba poka ni myenda iyinyabo loli ghukaba wakupetekiwa nukughubika wene pambali. ⁸ Po numumanyili umunyabo, yo akaba wabwandilo pakufika pi pumpha, wepe akinjila, akalinga nukusimikizya. ⁹ Pakuti mpaka pa kabalilo kala bakaba batamenye ivya masimbo ukuti akwiza ukuzyuka ku bufwe. ¹⁰ Po abamanyili bala bakanyokela sona kukwabo. ¹¹ Loli u Maliya akimilila panzi pi pumpha akulila. Bo akulila, akinama nukunanamizya mwi pumpha. ¹² Akalinga abangelo babili bikalite bavwete iviswepu, yumo ku mutu, uyunji ku vinama po bakaghoneka umubili wa Yesu. ¹³ Bakanena kukwache bakati, ''Ka uwe mwanakazi choni cho ukulila?'' Akabamula akati, '' chifukwa bamufumizyemo u Mwene, sona nthakumanya ko bamubikite.'' ¹⁴ Bo anena amazwi agha akang'anamuka nukumulinga u Yesu imilile palanyene, loli atakamumanya pakuti we Yesu. ¹⁵ U Yesu akanena ku mwanakazi yula akati, ''We mwanakazi, ka choni cho ukulila? Ka ukumulonda uwenu?'' Akinong'onanga ukuti mubomba mbombo wa mu munda ghula, po u mwanakazi akamwamula akati, ''Wee, nanthi wewe umufumizyemo, mbuzya ku malo ko umubikite, ukuti inje musendeko.'' ¹⁶ U Yesu akati kukwache akati, ''Maliya.'' U Maliya akang'anamuka nukunena kwa Yesu mu chi Alamayiki akati,''Rabboni'' (cho chikung'anamula ''manyisi''). ¹⁷ U Yesu akamubuzya akati, ''Utakankhole, pakuti nthabukite kwa Tata, loli buka kuba wamwitu nukubabuzya ukuti inthi mbuke kwa Tata wane yo numwe we Tata winu, sona kwa Chala wane yo numwe we Chala winu.'' ¹⁸ U Maliya Magadalena akiza nukubabuzya abamanyili ukuti, ''Namulinga u Mwene,'' sona ivi vyovyo ambuzya. ¹⁹ Pachamabwila cha lisiku lila, ilya bwandilo mu sabata,imilyango yikaba yighalile mu nyumba yo abamanyili bakabamo pakuti bakughopanga aba Yida, u Yesu akiza nukwimilila pakasi papabo akati kukwabo, ''U mutende ghube numwe.'' ²⁰ Bo anaena amazwi agha akabalangizya inyobe zyache ni mbazu zyache. Po abamanyili bakahoboka bo bamulinga u Mwene. ²¹ Po u Yesu akanena sona kukwabo akati, ''U mutende ghube numwe. Mo u Tata akanthumila, momo nune nkhubatumila.'' ²² Bo u Yesu anena ivi, akabaputila nukubabuzya ukuti, '' pokelani u Muzimu Umuswepu. ²³ Wensi yo mwamuhobokela imbibi, bo zyahobokeliwa; Wensi yo mwasunga imbibi zyache, zyasungiwa.'' ²⁴ U Tomasi, uwabamo twelovu yo akitiziwanga Didimo, atakabapo pakabalilo ko uYesu akiza. ²⁵ Abamanyili abanyabo bakamubuzya bakati, '' Twamulinga u Mwene.'' Akati kukwabo, ''nanthi ningalinga amabamba gha mizomali mu nyobe zyache, nukubikamo akansalala kane mu mabamba gha mizomali,sona mbike inyobe yane mu mbazu zyache, po nkwiza ukwitikizya.'' ²⁶ Pakati penda amasiku eyiti abamanyili bache bakiyighalila sona, u Tomasi wepe akabamo. U Yesu akiza bo imilyango yighalile, nukwimilila pakasi papabo,nukuti, '' U mutende ghube numwe.'' ²⁷ Akamubuzya u Tomasi akati, ''Fika pano na kansalala kako nukulinga inyobe zyane. Fika pano ni nyobe zyako nukubika mu mbazu zyane. Utakabe walukani pakwitikizya, loli witikizye.'' ²⁸ U Tomasi akamula nukunena akati, ''Mwene wane nu Chala wane.'' ²⁹ U Yesu akamubuzzya akati, , chifukwa chakuti wandinga, chochobene witikizya. Balusako bo bakwitikizya ichinthu bo bachili batachibweni.'' ³⁰ U Yesu akapanga ivinthu ivinji ivyakuswighisya pa maso gha bamanyili, ni vyakuswighisya vyo vitasimbiwe mwi bukhu ili, ³¹ loli ivi visimbiwe ukuti mwitikizye pakuti u Yesu we Kilisitu, mwana wa Chala, nanthi mwitikizya, mukwiza ukuba nubumi mwi zina lyache.