¹ Kale U Chala akanena kubanyenya bitu ukwendela mu baghonela mutubalilo utwinji, sona munzila izinji. ² Loli mutubalilo utwa bumalilo utu akunena nuswe ukwendela mwa Mwana, yo akamusala ukuba wa mphyana umukulu mu vinthu vyonsi. ukwendela mu mwache U Chala akapela ichisu. ³ We bwelu bwa buchindamu bwa Chala, mu nkozya yache iyenecho, akuvikola vyonsi poka na mazyu gha maka ghache. Bo aswefya imbibi akikala pansi kunyobe iya ndyelo iya buchindamu ku mwanya. ⁴ Aba wa pamwanya kubanthumi pakuti izina lyo apyana lya pamwanya nkani ukulusya amazina ghabo. ⁵ Ngawa nthumi buli yo U Chala akanenapo ukuti ''We mwana wane, Ilelo naba ne Tata wako? pamo wanthumi buli we U Chala akanena lumo nkuzukuba ne Tata ku kwache, sona azuwa mwana ku kwane''? ⁶ Loli sona, bo U Chala abika u wabwandilo muchisu, akuti, '' Abanthumi ba Chala bonsi ba baghile ukumwiputa.'' ⁷ U kuyana na banthumi akunena ukuti, ''We yuyo yo akupanga imizimu ya ba ndumi bache, sona numoto ghoghukulilima mu ba mbombo bache''. ⁸ Loli kwa mwana akuti, '' Umupando wako, Chala, wa bwile na bwile. Inkhomo ya chinamwene chako yo nkhomo ya bwanaloli. ⁹ Waghana Ubugholosu sona nukubenga indaghilo. Polelo U Chala, U Chala wako, akupakazya amafuta gha lusekelo ukulusya abanyankho.'' ¹⁰ '' Pa bwandilo, Mwene, ukabika ulufula lwa chisu chapansi. Ivyakumwanya zyo mbombo zya nyobe zyako. ¹¹ Bakwiza pa kumala, Loli inthi ukabukilile. Bonsi ba kwiza ukumala ngati tuviyabo twa mwenda. Uli bapetensania ngati mienda, ¹² Ukwiza ukubanyamusizya mumwanya ngati nkoloko,sona bakwiza ukusinthiwa ngati tuviyabo twa vya kuvwala, Loli uwe uli bulanyene, sona ni myaka yako yitakumala.'' ¹³ Loli wa nthumi buli we U Chala akanena nawe akabalilo kalikonsi, '' ukuti Ikala kunyowe yane iya ndyelo mpaka po nabika aba lwani ukuba pakukanyapo ivinama vyako''? ¹⁴ Te mizimu ya ba nthumi bo bakubomba, sona bobatumiwe ukuti balingilile bo bakwiza ukupyana ubupoki?