¹ Bawamwitu, nanthi umunthu yumo aghiwa ukuti asobela, umwe mwe mukulongoziwa numuzimu, mubaghile ukumuwolosezya nu moyo uwabwachimyeka. Numwe vibakwanfye mwebene, pakuti numwe mutakayeziwe. ² Nyamula inthamyo izya weka nu munyabo, po inthi mukwanilisye ululaghilo lwa kilisitu. ³ Nanthi yumo akwinong'ona ukuti weyo weyuyo napo hagha, akwipusika mwene. ⁴ Wensi azipiminsanie imbombo zyache, nanthi zyoziza ituvye nazyo pamwene loli ivya munyankho awe. ⁵ Pakuti wensi alinyamula mwene inthamyo zyache. ⁶ Umunthu yo amanyisiwe amazyu abaghile agabane ivinthu vyonsi iviza nawe akumumanyisya. ⁷ Mutakipusike uchala atakobeziwa, vyo umunthu abyala vyo akwiza pakugobola. ⁸ Pala akubyalila imbeyu ku mubili, ukufuma ku mubili akwiza ukugobola imfwa. Yo iza abyala imbeyu mumuzimu, pakufuma mumuzimu aliza agobole ubumi ubwabwila na bwila. ⁹ Po tutakalite awe pakubomba imbombo iziza, pakabalilo kache tuligobola, nanthi tutangaleka. ¹⁰ Po ilelo, motubelile nu lusalo, za tubombe iviza ku banthu bonsi, nkhani nkhani kubo bali munyuba iya lwitiko. ¹¹ Linga amasimbo aghakulu gho nkhusimba kukwinu ninyobe zyane. ¹² Abanthu bo bakuboneka ngati bobiza mumubili, bobo bakubatutilizya ukuti mufumye akachipapa akakunkhule. Bakabomba ivi ukuti baponelemo pakuti batakavwimiwe chifukwa cha mphinjika ya kilisitu. ¹³ Tebonsi bo badumuliwe ukuti bakusunga indaghilo, loli bakulonda ukuti umwe mudumuliwe ukuti bize bituvizyengepo pamibili yinu. ¹⁴ Loli une nthakwituvyapo ukupatula mumphinjika ya mwene witu Yesu kilisitu, mo ichisu cha pansi chikamanthiliwa kukwane nune ku chisu. ¹⁵ Napo adumuliwe pamo atadumuliwe chakulondiwa ubumi ubupya. ¹⁶ Kubonsi bobakwenda ngati mo nkhulondela, umutende nichisa, vibe nabo, vibe sona na kwa izilayeli uwa chala. ¹⁷ Ukufuma ilelo nayumo uwakuti anthamye nune, chifukwa une ndi na mabamba ngati gha yesu. ¹⁸ Ichisa cha mwene witu Yesu kilisitu chibe poka numwe, bawamwitu. Ameni