¹ Polelo, botutaba nacho, tukinong'ona ukuti chali chiza ukusyalikila mwisinda ku ba anseni twebene. ² Tukatuma U Timoti, uwamwitu sona naba bombi banyitu ba Chala mumazyu gha Kilisitu, pakubaghomya sona nukubatebezya ukulingana nu lwitiko lwako, ³ ukuti nayumo manyi ateteme ni nthamyo izi. Pakuti umwe mwe bene mumenye ukuti muvino momo tusaliwe. ⁴ Naloli, potukaba numwe, tukababuzizya nzila ukuti twaya pa kutamiwa mwa chitima,sona vikabombiwa, ngati mo mumanyile. ⁵ Pa chifukwa ichi bo nkati napotwa na mikalile, nkatuma ukuti manye ulwitiko lwinu. Po buli umuyezyi akaba ukuti aba yezizyepo umwe, sona imbombo zitu zikaba zya pa bwaka. ⁶ Loli U Timoti akiza kukwitu ukufuma ku umwe sona akiza na mazyu aghiza agha lwitiko lwinu sona nulughano. Akatubuzya ukuti mu kukumbuka iviza vyene ivya uswe, sona mukulondelezya ukutulinga uswe ngati mo nuswe tukulondelezya ukubalingila umwe. ⁷ Pa chifukwa ichi, ba wamwithu, twa tebezyeka numwe chifukwa lwitiko lwinu, mukufyenyeka kwitu konsi sona na munthamyo. ⁸ Pakuti ulu twe babumi, pala tukwimilila nkani mwa mwene. ⁹ Ka vyabupi buli vyo tukumupa U Chala ku kwinu, mulusekelo lonsi lo tuli nalo panthanzi pa Chala ku kwinu? ¹⁰ U Busiku nu musanya tukwiputa nkani hee mwakuti tungalinga pa cheni chinu sona nuku bapa chomukusobelwa mu lwitiko lwinu. ¹¹ Leka U Chala withu sona nu Tata umwenencho, sona U Mwene withu Yesu, alangizye inzila yithu ku kwinu. ¹² Leka U Mwene apange ukongelezya sona apinye ulughano kwa weka nu munyabo sona naku banthu bonsi, ngati mo nuswe tukubombela ku kwinu. ¹³ Leka akazye imyoyo yithu ukuti yitakabe yakulongiwa nu buswepu panthanzi pa Chala withu sona nu Tata nu kwiza kwa Mwene witu Yesu na bathu bonsi abaswepu.