¹ Bo u Balaam alinga pati chamuhoboska u Chala pakubasaya aba Israel, po umwene atakabuka, ngati tubalilo utunji, pakubombezya ulunyazyo. Mu malo mwache, akalingiska kunthanzi ku nkholongo. ² U Balaam akanusya amaso ghache sona akalinga ukuti u Isreal izula, weka mu luko lwabo, sona u Muzimu wa Chala ghukuziza pa pache. ³ Akapokela ubulotelo sona nukuti, '' Ubu bobo buneni bwa Balaam umwana wa Beor, ubuneni bwa munthu yo a maso ghache ghighukite nkhani, ⁴ Ubuneni bwa yuyo akwivwisya amazyu gha Chala, Yo akulinga ivya mu nthanzi ukufuma kwa Chala, yo akinamila pansi na maso ghache ghighukite. ⁵ Kuhobosya buli kwa mu tenti ghako, Jacob, amalo gho ukwikala, uwe Israel! ⁶ Ngati makombe gho ghasatite bwaka, Ngati mighunda ya mumbali mu lusoko, Ngati maluba gho ghabaliwe papipi nu Chala, Ngati makomo gha sendelela ku pipi na midzi. ⁷ Aminzi ghazukwenda ukufuma mu vigaba sona imbeyu yi zukuba na minzi aminji. Umwene wabo azukuba wa pamwanya ukuluska u Agag, sona ubumwene bwabo buzuchindikiwa. ⁸ U Chala azukumufumyamo mu Egypt. Azukuba na maka ngati we kambwe wa munkholongo. Azukulya vyosi ivisu vyo vikulya nawe. Azukupyolania amafupa ukuba tubulubusya. Azukubapika nu buta bwache. ⁹ Azukupama pansi ngati nkhalamu, ngati nkhalamu iyanakazi. Weniwenu yo atakupasya pakumupuvania? Wensi yo akumusaya asayiwe; wensi yo akumughuna yuyo weyo aghuniwe.'' ¹⁰ Ubukali bwa Balak bukakwelela kwa Balaam sona akamuma ni nyobe poka nu bukali. U Balak akanena kwa Balaam, '' Nkhakwitizya pakuti ughune abalughu bane, nomba linga, wabasaya katatu. ¹¹ Po bwela kukaya ilelo. Natili nkhuzukulipila pabukulu nkhani uwe, loli u Yahweh akubikite uwe ukuti uleke ukupoka umuvwalo ghonsi.'' ¹² Po u Balaam akamwamula u Balak, ''Nkhunena kuwatumiwa pakuti akabatuma ku kwane, ¹³ 'Napo u Balak akampha inyumba yache yonsi iyakwizula nu siliva sona nu golide, nthangabukilila nkhani pa mazyu gha Yahweh sona na chonsi ichibibi pamo ichiza, pamo chonsi cho ninong'onanga ukuti ningabomba. Ninganena chene cho u Yahweh ambuzya ukuti nene.' Ka nthakanena ichi kukwabo? ¹⁴ Po ulu, lingisya, nkhunyokela ku banthu bane. Loli ichabwandilo nalonda nkhumanyisye vyo abanthu aba bakuya pakubomba ku banthu bako mu masiku gha mu nthanzi.'' ¹⁵ U Balaam akanda nu bulotelo ubu. Akati, ''Ubu bobo bufumisyi bwa Balaam umwana wa Boer, ubufumisyi bwa munthu yo amaso ghache ghighukite nkhani. ¹⁶ Ubu bo bufumisyi bwa yumo yo akwivwa amazyu gha Chala, yo ali na mahala gha kufumila kwa Yumo Uwapamwanya nkhani, yo akulolela ivya mu nthanzi ukufumila kwa Yumo Uwamaka, yo akufugamila pansi na maso gha kwighuka. ¹⁷ Nkhumulinga, loli ulu ate pano. Nkhamulolela umwene, loli ate papipi hagha. Ulunthondwa lukwiza ukufuma mukasi mwa Jacob, umwene yumo akwiza ukufuma mukasi mu ba Israel. Akwiza ukubatinzania abalongozi bonsi aba Moab sona nukunangania uluko lonsi ulwa Seth. ¹⁸ Po aba Israel bakwiza ukwikhala pa Edom, sona nu kupoka u Seir, po abalughu ba Israel bakwikhala, bo u Israel akwiza ukubapoka mubwighane bache. ¹⁹ Ukufumila mwa Jacob mukwiza ukufumamo umwene yo akwiza ukuba na maka, sona akwiza ukunangania abanthu bo bakwikhala mu kaya akakulu kala.'' ²⁰ Po u Balaam akalingisya pa buyo bo abanthu ba Amalek bakikhalanga sona akanda ubulotelo ubu. Akati, '' Abanthu baba Amalek bakabapo lumo bakulu ba twaya utwinji, loli ubumalilo bwa kukomanika kwa bwilebwile.'' ²¹ Po u Balaam akalingisya pa banthu ba ku Kenani nukwanda ubulotelo ubu. Akati, ''Pabuyo bo mukwikhala bwa maka nkhani, sona ivi vulumbo vinu vikwiza ukuba mu mabwe. ²² Loli umwe mwe ba Kenani mukwiza ukunanganika nu moto po abanthu ba ku Assyria bakwiza ukubasenda ngati bazya.'' ²³ Po u Balaam akanda ukunena ubulotelo bwa bumalilo. Akati, ''Woe! Ka wewenu yo akwiza ukupulumuka nanthi u Chala abomba ichi? ²⁴ I Sitima zikwiza ukufumila mu mbali mwa Cyprus; bakwiza ukubakola abanthu ba ku Assyria nu kubapota abanthu ba ku Eber, loli abene, bope, bakwiza ukumala umwakunanganika.'' ²⁵ Po u Balaama akimilila sona nukufumapo. Akanyokela ku nyumba yache, sona wepe u Balak wepe akafumapo.