¹ Ubusiku bula ichikaya chonsi chikakwezya amazyu pakulila. ² Abanthu bonsi aba Isreal bakanena akabibi kwa Moses nu Aaron. Ichikaya chonsi chikati kukwabo, ''Tukalonda nge tukafwilanga muchisu cha Egypt, pamo muno mu nkholongo! ³ Choni cho u Yahweh izite atubika mu chisu ichi ukuti tufwe ni chipeni? Abanakazi bitu na bana abanandi babe bakoliwa. Ka chitangaba chiza ukunyokela ku Egypt?'' ⁴ Bakati kwa weka nu munyabo, ''Za tusale umulongozi uyunji, sona za tunyokele ku Egypt.'' ⁵ Po u Moses nu Aaron bakawisya icheni pansi pakasi palukomano lwa chikaya cha banthu ba Isreal. ⁶ U Joshua umwana umwanalume uwa Nun nu Caleb umwana umwanalume uwa Jephunneh, bo bakaba ba bamo bo bakaya pakhwendela ichisu, bakazepula imyenda yabo. ⁷ Bakanena ku chikaya cha banthu bonsi aba Isreal. Bakati, ''Ichisu cho tukendamo sona nukuchiyezya cho chisu ichiza naloli. ⁸ Pala u Yahweh aka hoboka nuswe, po inthi atusenye nu kutubika uswe mu chisu ichi sona nu kutupa uswe. Ichisu cho chikwenda nu lukama nu buchi. ⁹ Loli manyi tumung'anamukile u Yahweh, sona manyi toghofwe abanthu mu chisu, pakuti mo babelile cho chibama kukwitu. Ulupaso lwabo lukaya ukufumako kukwabo, chifukwa u Yahweh ali nuswe. Mutakaboghope abene,'' ¹⁰ Po ibumba lyonsi likati za tubume na mabwe. Loli ubuchindamu bwa Yahweh bukabonekela mu chisakasa chakomanilamo ku banthu bonsi aba Isreal. ¹¹ U Yahweh akanena kwa Moses, ''Kabalilo katali buli ko abanthu bakunkhana une? Kabalilo katali buli ko bakupotwa ukunsubalila une, napo buli nalangizya amaka ghane ghonsi mu vya kuboneka ni vya kubombiwa pakasi pabo? ¹² Inthi mbakole ni ndwala, nu kupoka impyana yinu, sona nu kupanga ukufuma ku luko lwinu ichikaya cho chi zukuba cha maka sona ichamaka ukupota ulu.'' ¹³ U Moses akati kwa Yahweh, '' Pala wabomba ichi, aba Egypt bazukwivwa ichi, chifukwa akabapoka abanthu aba ukubafumya mu maka ghabo. ¹⁴ Inthi bize banene ku banthu bo bakwikala mu chisu ichi. Bivwa ukuti uwe , u Yahweh, ali poka na banthu aba, chifukwa mwabonekela maso na maso. Ibingu lyako limilile pa banthu bitu. Ukubuka pa nthanzi pabo muli ipanda lya libingu pa musanya loli pa busiku muli ipanda lya moto. ¹⁵ Po nanthi mwakoma abanthu aba ngati munthu weka, po ivikaya vyo vizukwivwa amazyu aghakuyana nuwe ba zukuti, ¹⁶ 'Chifukwa chakuti u Yahweh atakati asende abanthu aba ukuya ku chisu cho akalapila ukuti abape abene, lolela abakoma mu nkholongo.' ¹⁷ Po ulu, nkhukulenga, za amaka gha Mwene ghabe makulu. Pakuti momo wanenela, ¹⁸ 'U Yahweh akuchedwa pakukalala sona abika nu lughano papipi. Akuhobokela imbibi na mupululile. Atazukuba ni chakulyesya na chimo pakufumya ububibi po akwiza nu lufundo pa mbibi ya ba wisekulu, pa lunyungu lwabo, izya butatu nizya folo mu mphampizwe.' ¹⁹ Nyokezya, Nakutumvya, abanthu aba bali ni laghano ilikulu ilya bwanaloli, ngati mo ukabahobokelanga abanthu bwilebwile aba ukufuma pakabalilo ko bakaba ku Egypt mphaka nulu.'' ²⁰ U Yahweh akati, '' Nabahobokela pakusengula ukulenga kwako, ²¹ loli naloli, bo nkhwikala, ichisu chonsi chizwile nu buchindamu bwane, ²² abanthu bonsi bo bakabulinga ubuchindamu bwane sona ni vibonesyelo vya maka vyo nkhabomba ku Egypt mu nkholongo--bachili bakunjezya une mu ka teni sona batakwivwisya amazyu ghane. ²³ Po nkhuti tebize balinge ichisu cho nkhapanga ichilapo kuba wisekulu babo.Nayumo m mwabo yo atakwivwila inthi ize a chilinge, ²⁴ mwene umubombi wane u Caleb, chifukwa ali mu buzimu uwa kupambana sona akukonkha nu moyo wache ghonsi. Inthi nize mubike mu chisu cho akabuka, sona na ba lunyungu lwache lukwiza ukulaghila kulanyene. ²⁵ (Po aba Amalekites na Canaanites bakikala mu chikombe.) Indabi mung'anamuke sona mubuke mu nkholongo panzila ya kunyanja iyikulu iya Matete.'' ²⁶ U Yahweh akanena kwa Moses nu Aaron. Akati, ²⁷ ''Ka butali buli bo ningitikizya ichikaya chambibi ichi cho chikususyana nune? Nivwa ukwilumbusya kwa banthu ba ku Isreal kukwane. ²⁸ Nena ku kwabo, 'Nanthinkhwikala--uku ko kunena kwa Yahweh--ngati mo mwanenela mukwivwa kwane, inthi mbombe ivi ku kwinu: ²⁹ Imibili yinu iyakufwa yikwiza ukuba mu nkholongo iyi, mwebonsi mwe mukadandawula kukwane ukususania nune, umwe mwe mukabelengiwa mu chibelengo, ubwinji bwa banthu ukwanda pa myaka twente ukubuka kunthanzi. ³⁰ Umwe naloli te mwize mubuke mu chisu cho nkhapangana ukuba kaya kinu, mwene u Caleb umwana umwanalume uwa Jephunneh nu Joshua umwana umwanalume uwa Nun. ³¹ Loli abanandi bo mukati bangakoliwa, inthi nize mbuke nabo mu chisu. Inthi bize bachimanye ichisu cho mwachikana! ³² Loli umwe, imivimba yinu yizukuba mu nkholongo iyi. ³³ Abana binu bazukuba badimi mu nkholongo ku myaka fote. Babaghile ukusenda ulufundo lwinu pa mbombo zinu izya kung'anamukila mphaka pa bumalilo bwa mivimba yinu mu nkholongo. ³⁴ Ukuyana nubwinji bwa masiku pakabalilo ko mukendela ichisu, amasiku fote, inthi musende ulufundo pa mbibi zyinu pa myaka fote, umwaka ghoka pisiku lyonsi, sona inthi mwize mumanye po indi. ³⁵ Une, ne Yahweh, nanena. Naloli inthi mbombe ichi ku chikaya chonsi icha mbibi cho chibunganite nukulwana nune. Inthi bamalile bonsi mu nkholongo sona inthi bafwile mumo.''' ³⁶ Po abanalume bo u Moses akabatuma pakwendela ku chisu, bo bakanyokela nu kupangisya ichikaya chonsi ukumung'anamukila u Moses pakunyamya amakani aghabibi agha chisu-- ³⁷ abanalume aba bo bakiza nu kunena ukubibi ukuyana ni chisu, bo chawisyiwa pansi, sona bakafwa na matenda panthanzi pa Yahweh. ³⁸ Mubanalume bala bo bakaya pakutendela ichisu, mwene u Joshua umwana umwanalume uwa Nun nu Caleb umwana umwanalume uwa Jephunneh bo bakasyala nu bumi. ³⁹ Bo u Moses anena amazyu agha ku banthu bonsi aba Isreal, bakalila ni chitima ichikulu. ⁴⁰ Bakanyamuka pandabindabi nu kuya pamwanya pachipili nu kuti, ''Linga, tuli pano, sona inthi tubuke kubuyo bo u Yahweh akapangana, pakuti twananga.'' ⁴¹ Loli u Moses akati, ''Choni cho ulu mwanda pakunanga indaghilo zya Yahweh? umwe te mupululile. ⁴² Muta kabuke, chifukwa u Yahweh ate numwe pakuti abapoke ukufuma kubalughu bo banga bapota. ⁴³ Aba Amalekites na ba Canaanites bali kulanyene, po inthi mufwe ni chipeni chifukwa mukang'anamuka ukuleka ukukonkha u Yahweh. Po te abe numwe.'' ⁴⁴ Loli umwamatata bakabuka ku kaya ka vipili; loli, kali we Moses pamo ichibokosi cha malaghano gha Yahweh, vitakafuma mu kamphu. ⁴⁵ Po aba Amalekites bakiza pansi, sona na ba Canaanites bo bakikala ku vipili vila. Bakabakola aba Isreal nukubuma ukuya pansi ni nzila yonsi ukuya ku Hormah