¹ Po lelo abanthu bakadandawula ni nthamyo zyabo bo u Yahweh ivwisya. U Yahweh akivwa abanthu sona akiza akalala. Umoto ukufuma kwa Yahweh ghukocha mukasi mwabo sona nukulya tumo utuma bukatila mubumalilo. ² Po abanthu bakitizya kwa Moses, po u Moses akiputa kwa Yahweh, sona umoto ghukaleka. ³ Amalo ghala ghakitikiziwa Taberah, chifukwa umoto wa Yahweh ghukocha mukasi mwabo. ⁴ Bamo abanthu abayeni bakanda ukupanga ichimo na ba lunyungu lwaba Isreal. Bakalonda ichakulya ichiza ichakuti balye. Po abanthu aba Isreal bakanda pakwibunanzya sona bakuti, ''Ka weweni yo inthi atupe inyama pakuti tulye? ⁵ Tukumbuke inswi yo twalile mu bwabuke mu Egypt, ivimbwete, aba ghotala, kanyenze, sona nu Galiki. ⁶ Po ulu ukwighana kwitu kubukite, chifukwa vyonsi vyo tungalinga gho manna.'' ⁷ Manna ghakaba ngati lumbeyu lya Coriander. Lo lukuboneka ngati resin. ⁸ Abanthu bakanda pakuzyungulila sona bakabungana. Bakasya panyala, bakapula mwi tuli, bakapiya mu nthendo, sona bakapanga ukuba vibama. Vikanonanga ngati tunthu utwiza utwakupiyila na mafuta gha Oliva. ⁹ Pala imangwe yawa pa chimo nu busiku, amanna ghope ghakawanga. ¹⁰ U Moses akivwa abanthu bakulila mutwaya twabo, sona umwanalume wensi akaba pamulyango wa chisakasa. U Yahweh akaba wa kukalala hee, sona pamanso gha Moses ukwilumbusya kwabo kutakaba kwa momumo. ¹¹ U Moses akati kwa Yahweh, '' Chon cho wabomba nu mubombi wako akabibi hee? Choni cho utahobokite nune? Wambika une ukunyamula wensi ukatundu wa banthu aba. ¹² Nene nkhabanyamula abanthu bonsi aba? Ka nene nkhabapapa ukuti unene kukwane, ' Banyamulile ku pipi ku chifuba chako ngati we wise mo akunyamulila akabonda?' Ka mbanyamulile ku chisu cho ukapangana na basekulu babo ukuti inthi wize ubape? ¹³ Inthi njaghe kwi inyama iyakuti mbape abanthu bonsi aba? Bakulila panthanzi pane sona bakunena ukuti, ' Tupe uswe inyama tulye.' ¹⁴ Nthangabapapa abanthu bonsi aba nemwene. Binji lukulu kukwane. ¹⁵ Po ukumbomvya une ulu, nkhoma une losulu---pala nagha ulughano pamanso pinu----mutakaleke une ndinge umukosi yane.'' ¹⁶ U Yahweh akati kwa Moses, ''Wize nabo abasongo seventhe aba ku Isreal. Ube nu bwanaloli ukuti bo basongo sona balongozi ba banthu. Wize nabo kuchisakasa chalukomano bimilile palanyene poka nuwe. ¹⁷ Inthi nize nisike pansi sona kuzu kunena numwe palanyene. Inthi nize nsende ghumo umuzimu mumwako nukubika mumwabo. Inthi bize banyamule ukatundu wa banthu poka nuwe. Te wize unyamule sona wemwene. ¹⁸ Nena kubanthu , ' Mwiswefye mwebene, pakuti indabi naloli inthi mwize mulye inyama, pakuti mwalila sona u Yahweh ivwa. Mukati, ''Ka wewenu yo inthi atupe inyama ukuti tulye? chikaba chochiza kukwitu po tukaba ku Egypt.'' Po lero u Yahweh inthi abape umwe inyama, sona inthi mwize mulye. ¹⁹ Temwize mulye inyama kwi siku lyoka, amasiku ghabili, amasiku fiyivi, amasiku teni, pamo amasiku twenthe awe, ²⁰ loli inthi mwize mulye inyama kwa mwezi ghonsi mpaka yifume mumphuno zinu. Inthi yize yibakime umwe chifukwa mwamukana u Yahweh, yo ali pakasi pinu. Mwalila panthanzi pache. Mwati, '' Choni cho tukafuma ku Egypt?'''''' ²¹ Po u Moses akati, '' Abanthu bo indinabo bali 600,000 banalume bakwenda pansi, sona utili, inthi mbape inyama ukuti balye umwezi ghonsi.' ²² Ka tukome uludimo lonsi ulwa Ng'onzi sona ni Ng'ombe pakuti tubikutisye? Ka tukole inswi zyonsi mu nyanja ukuti tubikutisye?'' ²³ U Yahweh akati kwa Moses, ''Ka inyobe yane yifupi? Polelo pamo inthi mulinge amazyu ghane gha bwanaloli pamo te gha bwanaloli.'' ²⁴ U Moses akabuka sona akababuzya abanthu amazyu gha Chala. Akababunganika abanthu seventhe abasongo sona akababika ukuzyungulila ichisakasa. ²⁵ U Yahweh akiza pansi mwibingu sona akanena kwa Moses. U Yahwe akasenda umuzimu ghumo gho ghukaba mwa Moses sona nukughubika mu banthu abasongo bala seventhe. Bo umuzimu ghukikala mumwabo, bakalota, loli pambombo yane yilanyene sona batakalota sona. ²⁶ Abanthu babili bakasysla mu kamphu, bakitizya u Eldad nu Medad. U Muzimu ghope ghukaba mumwabo. Amazina ghabo ghakasimbiwa, loli batakabukako ku chisakasa. Napo buli, bakalota mu kamphu. ²⁷ Umulumendo umunandi ukufuma mu kamphu akasamala sona akamubuzya u Moses, ''U Eldad nu Medad bali pakulota mu kamphu.'' ²⁸ U Joshua umwana wa Nun, umutuli wa Moses, weka mu banalume aba kusaliwa, akati kwa Moses, ''Songo wane Moses, bakanizye.'' ²⁹ U Moses akati kukwache, ''Ka uli nakabini pabwighane bwane? Nkhulonda ngati abanthu bonsi aba Yahweh babe baghonela sona ngati abike u Muzimu wache pa bonsi!'' ³⁰ Po u Moses sona na basongo ba Israel bakanyokela ku kamphu. ³¹ Po imphepo yikiza ukufuma kwa Yahweh sona yikiza naba zungwa ukufuma ku nyanja. Bakaba papipi ni kamphu, ukufuma pisiku lyo bakenda kumbali yoka sona pisiku lyo inthi bende kumbali iyinyabo. Abazungwa bakazyungulila ikamphu ingwamba zibili ukufuma pa chisu. ³² Abanthu bakatangwanika nukubunganika aba zungwa isiku lyonsi, ubusiku bonsi sona na pisiku ilinyabo. Nayumo yo akabunganika ukuchepela ama homer teni agha ba zungwa. Bakagabana abazungwa bonsi mu kamphu. ³³ Bo inyama yichili yili pakasi pa mino ghabo, bo bachili bakuyitafuna, ubukali bwa Yahweh bukakolela papabo. Abanthu bakakoliwa ni ndwala iyikulu naloli. ³⁴ Amalo ghala bakaghitizya Kibroth Hattaavah, chifukwa palanyene bakasilapo abanthu bo bakaba ni lyoyo lya nyama. ³⁵ Ukufuma pa Kibroth Hattaavah abanthu bakenda ukuya ku Hazeroth, ko bakikala.