¹ Mubaghile musunge indaghilo zyonsi zyo nkhubapa ilelo, ukuti mube babumi sona munyame, sona mubuke nukusenda amalo gho u Yahweh akabalapila abatata binu. ² Mukumbuke inzila zyonsi zyo u Yahweh u Chala winu abalaghizya imiaka fote munkholongo, ukuti amanye , ukuti abayezye chochikaba mu moyo winu, pala nge mukasunga indaghilo zyache pamo ha. ³ Akabisya, nukubapa inzala, nukubalyesa ivibama vyo mutakavimanya naba tata binu batakavimanya. Akabombo ubunye ukuti abanthu bamanye pakuti batakwikalila ichibama chene; loli, chonsi chochikufuma pamulomo wa Yahweh chocho abanthu bakwikalila. ⁴ Amalaya ghinu ghatakazepukapo pamo ukuwapo, sona nivinama vinu vitakizulapo mu miaka fote yila. ⁵ Muchinongòne mu moyo winu, bulibuli, ngati mo umunthu akufundila umwana wache umulumendo, po u Yahweh u Chala winu akubafunda umwe. ⁶ Inthi musunge indaghilo zya Yahweh u Chala winu, ukuti mwende mu nzila zyache sona mumuchindike. ⁷ Pakuti u Yahweh u Chala winu akubabika mu kaya akiza, akaya ka minzi aghiza, akambwibi, aghakusata ukuya mumakombe sona ukuya mvipili; ⁸ Akaya kangano akamakomo ghavikomwa, akaya kamakomo gha oliva sona nubuchi. ⁹ Kokaya ko temukalye ichibama mubupina sona namo temukasobelwe nachim; akayako amabwe ghapangile nivyela, namuvipili vyache inthimukakumbe u kopa. ¹⁰ Inthi mukalye sona nukwikuta, inthi mukachindike u Yahweh u Chala winu chifukwa cha malo aghiza gho abapa. ¹¹ Muchenjele ukuti mutakaluvye u Yahweh u Chala winu, pakupotwa pakusunga indaghilo namalamulo ghache gho nkhubabuzya ilelo. ¹² Po, mukuya nukwikuta, sona palamwazenga inyumba iziza nukwikalamo, u moyo winu wukwiza ukukweziwa. ¹³ Muchenjele po ing'ombe nivitekwa vinu vyabalana, sona usiluva nu golide abalana, sona navyonsi vyo muli navyo vyabala, ¹⁴ po u moyo winu wukukweziwa sona mukumuluvya u Yahweh u Chala winu, yo akabafimia ku Ijiputi, ukufuma mu nyumba ya buzya. ¹⁵ Mutakamuluvye yo akabatangilila munkholongo iyikulu sons iyisisya, ninjoka zyache izikali nabankhonya sona mubuyo ubwanyota momutakaba aminzi naghamo, yo akabapa aminzi ukufuma pibwe ilyumile. ¹⁶ Akabalyesa ivibama munkholongo vyo abanyenya binu batakavimanyapo, ukuti abisye sona abayezye, ukuti babombele iviza pabumalilo, ¹⁷ loli munganena mu moyo winu ukuti, ' Amaka ghane sona nubusisya bwanyobe yane bukayane ichuma chonsi ichi.' ¹⁸ Loli mukabuke u Yahweh u Chala wako, pakuti weyuyo akupile amaka ghakwaghila ichuma, ukuti akwanisye ipangano lyo akalapila abatata bako, ngati mo vibelile ilelo. ¹⁹ Inthi vikabombwe ukuti, pala wamuluvya u Yahweh u Chala wako nukuya kuba chala abanji, nukubiputa, nukubatumvya, nkhusimikizya ilelo ku kwako ukuti naloli inthi wize ukomanike. ²⁰ Ngati visu vyo u Yahweh ukuvipanga ukuti vikomanike pamanso ghako, po inthi ukomanike chifukwa utakivya amazyu gha Yahweh u Chala wako.