¹ Min Yahuza, kadam ta Yesuah Almesih, wa aku ta Yakub, le del alnadi humon, wa Allah al-abu hibu, wa hafizu humon le Yesuah Almesih: ² kede rahma wa salam wa muhaba zidu le itakum. ³ Habaib tai, ana kan bi hawil ashan bi katibu le itakum kalam ta kulasa alsawa sawa, lakin ana ja ligo ana bi katibu le itakum ashan kede itakum ishtakal shedid ashan kalam ta iman al wodi mara wahid le kulu nas al amin. ⁴ Ashan fi nas tanin dakalu tehet tehet fi nus takum. Nas del humon nas al katibu le hmon min bediri gali lazim bi hukumu humon be hukum ta abadia. Ashan humon nas al ma kuweisin al bi hawilu neima ta Allah ta nina le shahwat ta jisim, wa humon bi anguru seid ta nina al wahid wa Rabuna Yesuah al Mesih ⁵ Hasa ana der zekiru itakum - be hajat al itakum arufu - gali Rabuna al kalisu nas bara min Masir de, Huwo kaman rija katulu del al ma rudu Huwo. ⁶ Wa kaman malaikat al ma geni sabit fi mahal sulta tomon, wa sibu mahal geni tomon - Allah hafisu humon wa robutu humon be genzir ta abadia wa dusu humon fi juwa duluma ta yom al kebir ⁷ De bes ze ta Sodom wa Gomora wa bagi medinat tanin al gerib le humon, al woduru jisim wara kalam ta zina wa hajat al batal al ma sawa ma tebia ashan kida demiru humon wa biga misal le del al tabanin fi azab wa nar ta abadia. ⁸ Kaman ze de, nas del al bi hilim hilim wa bi waskanu jisim tomon. Humon bi aba wa bi alisu siada ta Rabuna, wa bi kelim did mejid ta Rabuna ⁹ Wa lakin Mikael, reis ta malaikat wokit humon ferigu ma shetan be kalam jisim ta Musa, huwo kan ma hawil ashan bi laanu be hukum al ma kwes. lakin huwo kelim gali ita bi ligo taki min Rabuna. ¹⁰ lakin mualimin del al bi dala ma hajat al humon ma arufu , wa fi hajat al humon bi fahimu be teriga tomon ze ta haiwanat al ma bi wonusu, de yau bi demiru humon. ¹¹ Humon bi ligo kalam batal ashan humon amulu ze ta Kain wa humon waga fi kidib ze ta Balam be sabab maksab wa humon mutu fi mashakil ze ta Goroh. ¹² Jama del humon awarid fi mahal munasabat takum al kwes wa kaman humon bi amulu munasabat tomon bidun ai kof ashan bi ainu humon, humon bes ze sihab bidun moyo al hawa bi shilu wa humon kaman ze ashjar ta zaman motoro al meit al ma indu simar al bi zidu , wa bi jadau taraf sika. ¹³ Humon ze habub al bi hizuhizu bahar wa bi tala fadiya tomon. Wa humon ze nujom al woduro fok fi jou al hafizu humon fi duluma al shedid lel abad. ¹⁴ Ze ma Enoch, nebi nimra saba min Adam kelim an humon gali, "aynu takum! Rabuna jay wa bi gedimu be asharat alaf min nas al kudusin. ¹⁵ Ashan bi hukumu nas kulu , wa bi agibu nas al batalin fi hajat al humon amulu". ¹⁶ Del humon nas al bi korekore sambala wa bi ishteki daiman wa bi douru wara hajat tomon al batal. lisan tomon bi wonusu hajat al kwes al bi kabasu nas le maslah tomon. ¹⁷ Wa intakum ya nas tai al ana hibu, zekir takum kalamat al wori le intakum min bediri be nas ta Rabuna Yesuah Almesih. ¹⁸ Ashan humon kelimu le intakum gali "fi zaman ta akhir de, bikun fi nas ta talis albi douru wara niat tomon al batal. ¹⁹ Del nas albi gesimu nufus tomon humon nas ta jisim alma indu roho. ²⁰ Wa kaman intakum ya akwana tai al ana hibu, abinu takum nufus takum fi iman takum al mukadas be salawat fi Roho alkudus. ²¹ Hafizu nufus takum fi muhaba ta Rabuna wa intakum bi istena Rahma ta Rabuna Yesuah al mesih le Haya al abadia. ²² Kede nina wori Rahma le nas al indu shukuk wa kafu. ²³ Wa kaman juru takum badun bara min nar. sibu takum gumasat takum algedimin wa wasaka. ²⁴ Hasa kaman le De albi agder ashan be hafisu intakum ashan kede intakum ma waga, wa kaman bi wosulu intakum wa bi wogifu intakum gidam mejid bito be farah wa bidun khof. ²⁵ Wa le Allah al whid Mukalis ta nina, be Rabuna ta Yesuah al mesih, mejid .wa sokol kebir, wa guwa wa sulta kede kun le Huwo min hasa de wa le abadia