¹ Akan iyah, boti tie honta ara am sagala lai panghukuman bagi urang am homan ka lalam Yesus Kristus. ² Lai, hukum Roh kahirupan ka lalam Yesus Kristus jadi mardeka lai kolai mula hukum dosa dengan maut. ³ Lai, apa am honta baulih ngaruh lai Hukum Taurat lai dilomahnya honi daging, jadi Hatalla ngaruh honi cara mangutus Ana-Nya kaniri akan manjadi sarupa dengan manusia am badosa lalu sangkut paut dengan dosa, Inya manghukum dosa ka lalam daging, ⁴ supaya tuntutan Hukum Taurat digenap lalam kami am honta hirup manurut daging, tapi manurut Roh. ⁵ Lai urang am hirup manurut daging, mamikirnya hal-hal am basifat daging, tapi urang am hirup manurut Roh, mamikirnya hal-hal am basifat Roh. ⁶ lai pikirannya am kona arahnya ka daging iyaham maut, tapi pikiran am ka arahnya ka Roh iyaham hirup lalam damai sejahtera. ⁷ Lai pikiran am ka arahannya ka daging manantang Hatalla; lai inya honta patuh ka parintah Hatalla, malahan honta ulih manulatnya. ⁸ Lalu, urang am hirup ka lalam daging honta baulih manyanangkan Hatalla. ⁹ Amun sakian, kolai honta hirup lalam daging, tapi lalam Roh jaka Roh Hatalla memang tingal ka lalam kolai. Lai, jaka siku urang honta hompu Roh Kristus, inya bukan hompu-Nya. ¹⁰ Akan tapi, jaka Kristus tege ka lalam kolai, nauh nya am tubuhmu mati lai dosa, tapi roh hirup lai kabujur. ¹¹ Amun, jaka Roh Inya am mahuasnya Yesus mula kamatian tingal ka lalammu, Inya am mahuaskan Yesus Kristus mula kamatian akan mamori hirup ka tubuhmu am fana malalu Roh-Nya am tingal ka lalam kolai. ¹² Jadi, manyari-manyariku, kami iyaham urang am bahutang, tapi bukan ka daging, supaya hirup manurut daging. ¹³ Lai, jaka kolai hirup manurut daging, kolai akan mati, tapi jaka lai Roh kolai mamatikan pangawi tubuhmu, kolai akan hirup. ¹⁴ Lai, uras urang am kapimpin lai Roh Hatalla iyaham ana-ana Hatalla. ¹⁵ Lai, kolai honta manarima roh hulun agi am mangaruh gola, tapi kolai jadi manarima Roh am jadi mangakat kolai manjadi ana-ana Hatalla, am malalu Roh itie kami barami, ''Abba, Ompai!'' ¹⁶ Roh itie kaniri basaksi barota roh kami lai kami ana-ana Hatalla, ¹⁷ jaka kami iyaham ana, kami iyaham pawaris, pawaris Hatalla, sasama pawaris dengan kristus; jaka kami bujur-bujur turut sia-sia barota Inya, kami akan kona mulianya barota-rota kan Inya. Ana-ana Hatalla akan Manarima Kamulian ¹⁸ Lai, aku manganggap sia-sia metuh saat boti tie honta baulih disamahkan dengan kamulian akan nyatakan ka kami. ¹⁹ Lai, uras ciptaan senga mananti-nantinya dengan bagau saat ana-ana Hatalla nyatakan. ²⁰ Lai, uras ciptaan jadi nunduknya kasia-siaan, bukan manurut kahonanya kaniri, tapi manurut kahona Inya am jadi mangolanya, tingi dasar pangharapan, ²¹ supaya uras ciptaan itie kaniri akan mardekakan mula hulun kabinasaan manunyu kamardeka ana-ana Hatalla am ponuh kamulian. ²² Lai diri tahu bahwa saluruh ciptaan samah-samah mangerang sia kanyaman baganti sampai boti tie. ²³ bukan ham iyah, tapi diri kaniri pun am manarima buah sulung Roh jadi mangerang lalam kami kaniri, samil manantikan mangangkat bera ana, iyaham manobus tubuh diri. ²⁴ Lai, diri disalamatkan ka lalam pangharapan. Akan tapi, pangharapan am maila bukan agi pangharapan, lai sapakah am baharap tingi am jadi diilanya? ²⁵ Akan tapi, jaka diri mangharapnya am honta diri maila, diri manantinya dengan kuat. ²⁶ Sakian jam, Roh manulung diri lalam kalomahan diri; sabab diri honta tahu bera apa saharusnya diri badoa, tapi Roh kaniri am basyafaat demi diri akan erangan-erangan am honta tarungkapannya lai paner. ²⁷ Inya am manaliti hati mangingat apa maksud Roh iyah, lai Inya basyafaat bagi urang-urang kudus sasuai akan kahona Hatalla. ²⁸ Lai, diri tahu bahwa sagala sasuatu Bagawi barota-rota demi kabaikan urang-urang am masiha Hatalla, bera iyaham urang am ditimai sasuai akan rancana Hatalla. ²⁹ Lai, urang am jadi dikenal-Nya mulae nampara, jadi am ditentunya mula nampara akan manjadi sarupa dengan gomar Ana-Nya, supaya Inya manjadi am sulung ka antara banya manyari. ³⁰ Urang am jadi am ditentukan Nya mula nampara, ditimai-Nya; lalu urang am ditimai Nya, jadi kabujurkan-Nya; urang am bujur-Nya, jadi dimuliakan-Nya. Bori Hatalla Lalam Kristus Yesus ³¹ Jadi, apa am akan kami panernya tuntang uras iyah? Jaka Hatalla bapihak ka kami, sapakah am malawan kami? ³² Inya am honta masayangnya Ana-Nya kaniri, tapi mayorahkan-Nya bagi kami uras, bera apa mungkin Inya barota-rota akan Inya honta mangaruniakan sagala sasuatu bagi kami? ³³ Sapakah am akan mandakwa urang-urang pilihan Hatalla? Hatalla am mabujurkan urang. ³⁴ Sapakah am akan mamori hukuman? Yesus Kristus am jadi mati, bahkan am jadi dihuaskan mula kamatian, duru ka sorap kanan Hatalla akan basyafaat bagi kami. ³⁵ Sapakah am akan mamisahkan kami mula kasih Kristus? Apakah panindasan, atau kasulitan, atau malai, atau kaporan, atau talanyang, atau bahaya, atau pisau? ³⁶ Bera itie tege tatulis' ''Demi Kolai, kami homan lalam bahaya maut sapanyang waktu; kami dianggap sabagai domba-domba samolih.'' Mazmur 44:22 ³⁷ Akan tapi, lalam uras iyah, kami lobih mula para pamenang lai Inya am masiha kami. ³⁸ Lai, aku diparcayakan bahwa bukan kamatian ataupun kahirupan, bukan malaikat-malaikat ataupun pamarintah-pamarintah, bukan hal-hal am boti tie ataupun am akan datang, kakuasaan ³⁹ bukan jam am tege ka tingi ataupun am tege ka loba, ataupun suatu ciptaan bukannya, mampu mamisahnya ka kami mula sayang Hatalla, am tege lalam Yesus Kristus, Tuhan kami.