¹ Laie iyah, laie kabaie Hatalla, aku manula kolai, manayari-manyari, nyaman kolai mamori tuwuhmu kan pamori am hirup, am barasih dengan kagonang Hatalla; iya am tama akal. ² Hinang am kali samah kan dunia itie, tapi baubah laie kabaie gawimu, nyaman kolai ulih mambeda apa am jadi kahona Hatalla; apa am baie, am kagonang Hatalla, dengan am sampurna. ³ Sabab, malalu kuasa am jadi di bori ka aku, aku bapaner ka satiap urang ka antara kolai nyaman hinang mamikir am lobih tingi mula apa am inya pikir, tapie nyaman bapikir am saukuran imanam jadi Hatalla bori ka masing-masing. ⁴ sabab, bera tuwuh diri mahompu banya bagian, tapie masing-masing honta mahompu samah gawi. ⁵ Bera iyah jam diri, aluhan banya tapie suti tuwuh lalam Kristus. Dengan, masing-masing diri iyah bagian kan am bukan. (Karunia-Karunia Rohani) ⁶ Diri mahompu kuasa am babeda-beda manulat kasih karunia am dibori ka diri. Jaka diri mangaruh gawi Hatalla,baienya diri mangaruh pas kan jatah iman diri. ⁷ Jaka honi malayan, baie inya malayan, Jaka honi malajar, baie inya malajar. ⁸ Apa jaka honi mahibur, baie inya mamori karamie, jaka honi mamori, baie inya mamori honi karedanya, jaka honi mamimpin, baie inya mamimpin sapaamatnya.Jaka honi manunyu siha, baie mangruhnya mahoni karami. (Salu Kesah Hirup lalam Kasih) ⁹ Honanya kasih honta bapura-pura. kagili ka am jahat, dengan barigap ka apa am baie. ¹⁰ Honanya kolai saling manyayanglalam kasih manyari dengan saling manyaholu mamori hormat, ¹¹ hinang am kacangkalmu tonur, honanya koali baapi-api lalam roh dengan malayan Tuhan. ¹² Barami lalam pahona, sabar lalam kasosa, dengan rajin lalam doa! ¹³ Uma ngalap jatah lalam manyukup kaperluan urang-urang barasih, ba usaha meh lalam manunyu kabaie. ¹⁴ Kabaie kan urang am mangian kolai, kabaie dengan hinang manyumpah! ¹⁵ Baramie ja kan urang am baramie, dengan manangis ja kan urang am manangis. ¹⁶ Pikir ja hal am samah suti ka am bukan. hinang mamikir ka hal-hal am tingi, tapie keker ka urang-urangam dianggap lowa.Hinang manyoku arepmu maharotie! ¹⁷ Hinang mamalas ka siku urang kajahat honi kajahat. karuh ja gawi am baie paharap uras urang. Jaka tahu, ¹⁸ sakiranya hal iyah tasorah ka kolai, hirup lalam kadamai kan uras urang. ¹⁹ Manyari-manyariku am kasayang, hinang kolai kaniri manuntut mamulang, tapie bori homan ka pangusar Hatalla. Sabab tege tatulis, "mamulang iyah hak-Ku, Aku tie am mamulangnya," bungie Tuhan." ²⁰ Tapie, jaka musuhmu kaporan, bori inya makan, dengan jaka musuhmu haus, bori inya tamarai. Dengan mangaruh itie, kolai jadi manuyuk bara api ka tingi palanya." ²¹ Hinang kolai kalah ka am jahat, tapie kalah kan kajahat honi kabaie.