¹ Lai iyah, manyari am kudus, kolai am hompu bagian lalam kona timai surgawi, tampaikan Yesus, Sang Rasul Imam Bakah pangakuan diri, ² am satia ka Inya am jadi manotapkan-Nya, samah bera Musa am satia lalam saluruh dangau-Nya. ³ Lai, Yesus layak kona anggap akan manapat kamuliaan am lobih bakah mula Musa, bera halnya saurang mambangun dangau iyah kaniri. ⁴ (Lai, satiap dangau kona bangun lai sasaurang, tapi pambangun mula sagala sasuatu yaham Hatalla). ⁵ Musa satia lalam saluruh dangau Hatalla sabagian saurang palayan, akan mamori kasaksian ka hal-hal am akan diparahkan ka limah ari. ⁶ Amun, Kristus satia sabagian Ana lalam dangau Hatalla, iyaham diri, jakai diri totap barigap toguh yakin baharap am diri banggakan sampai tarakhrir. Tarusja Mairing Hatalla ⁷ Lai iyah, bera am Roh Barasih baparah, ''Ka ari itie, jakai kolai manongar suara-Nya, ⁸ Umet nyaringkan hatimu bera lalam marusak am kolai ngawinya ka ari mancuba ka padang gurun, ⁹ iyaham hiya umuhmu mancuba Aku maila pangawi-Ku sapalamat ompat puluh tahun. ¹⁰ Lai iyahja Aku gusar ka penerus iyah lalu bapaner, 'Hati urang salalu sosat lalu urang honta mangerti jalan-jalan-Ku.' ¹¹ Jadi, Aku basumpah lalam pangusar-ku: ''Urang honta akan tama ka homan panghontian-Ku.''' Mazmur 95:7-11 ¹² Bahati-hatija manyari, umet am tege ka antara kolai am hompu hati am jahat am honta parcaya, am mangawimu bapaling mula Hatalla am hirup. ¹³ Sabaliknya, nasehatja suti dengan apa bukan satiap ari, sapalamat masih tege am dijoku ''ari itie'' nyaman honta tege ka antara kolai am dinyaring lai tipu daya dosa. ¹⁴ Diri jadi mangalap bagian ka lalam Kristus, jakai diri barigap toguh kayakinan diri am pertama sampai ka tarakhirnya. ¹⁵ Bera tatulis, ''Ka ari itie, jakai kolai manongar suara-Nya, umet nyaringkan hatimu bera lalam marusak. ''Mazmur 95:7b-9 ¹⁶ Sapakah urang-urang am jadi manongar suara Hatalla, tapi marusak? Bukankah urang uras am kaluar mula Mesir ka loba kapamimpin Musa? ¹⁷ Akan, ka sapakah Hatalla gusar sapalamat ompat puluh tahun? Bukankah ka urang am mangaruh dosa senga tege mayat urang bagalimpangan ka padang gurun? ¹⁸ Akan, ka sapakah Hatalla basumpah bahwa urang honta akan basa tama ka homan bahontian-Nya, Amun bukan ka urang am honta taat? ¹⁹ Jadi, diri maila bahwa urang honta tahu tama lai honta parcaya urang.