¹ Paulus datang ka Dorbe rang nua Listra. Cuba, ila tege siku murid koyah, namanya Timotius, ana mula siku labini Yahudi am jadie dipercaya, tapie ompai nya iyah am urang Yunani. ² Inya dikasene baie laie manyari-manyari saagama ka Listra lalu Ikonium. ³ Paulus hona Timotius badari barota kan inya, maka inya manaing lalue hona manyunatnya laie urang-urang Yahudi am tingal kadaerah iyah. Laie, urang uras ingat amun ompainya iyah am urang Yunani. ⁴ Panehan urang bajalan malalu kota-kota, urang mamarah aturan-aturan akan urang-urang am percaya nyaman taat, am jadie diputuskan laie para rasul lalue penatua am tege ka Yerusalem. ⁵ Maka, para ungkup ditoguhkan lalam iman lalue pamanya urang batamah satiap arie. Hatalla Manimai Paulus Ka Makedonia ⁶ Lalue, urang badari malalu wilayah Frigia lalue Galatia laie jadie dikirah laie Roh Barasih akan mamarah firman ka Asia. ⁷ Metuh urang jadie datang ka Misia, urang bausaha badari ka Bitinia, tapie Roh Yesus honta manyuruh urang. ⁸ Maka, jadie malalu Misia, urang turune ka Troas. ⁹ Tege paila datang nguang Paulus metuh malam. Siku mula Makedonia metuh badiri lalue maminta rompuh ka inya, ujanya, "Guang ka Makedonia rompoh kamie." ¹⁰ Metuh Paulus maila panampai iyah, kamie bausaha langsung ingkas ka Makedonia, metuh manyimpulkan laie Hatalla jadi manimai kamii akan mangesah Injil ka urang. Partobatan Lidia ¹¹ Lai iyah, metuh balayar mula Troas, kamie langsung balayar ka Samotrake, lalue duri arie ka Neapolis, ¹² lalue mula koyah ka Filipi, kota nomor suti kawilayah Makedonia suti kota am dijajah laie Roma. Kamie diam kakota iyah sampai babarapa arie. ¹³ Lalue, metuh arie mengo, kamie badari ka luar pintu gerbang kota manguang ka sisi sungai, homan kami bapikir amun ka koyah tege homan badoa. Maka, kamie duru lalue bapaner kakawan labini am lagi bakumpul. ¹⁴ Siku labini banama Lidia, mula kota Tiatira, siku panyual kain ungu am manyomah Hatalla. Tuhan mamuka hatinya honi manampai apa am dipaner Paulus. ¹⁵ Lalue, metuh Lidia uras urang am tingal karangaunya dibaptis, inya mamohon kakami, ujanya, "Amun kolai manganggap aku parcaya onya kan Tuhan, datang karangauku lalue diam koyah." Lalue, inya mamaksa kamie. Paulus Rang Nua Silas Ka Panjara ¹⁶ Sahompan, kamie badari kahoman badoa, tege siku hulun labini, am tege kamampuan maramal manapat kami. Inya manaing banya kauntungan akan majikannya malalu ramalan-ramalannya. ¹⁷ Labini iyah uma Paulus kamie samil banyawa, "Urang-urang itie iyah am kawal-kawal Hatalla am Mahatingi, am mamaner jalan kasalamatan kan kolai!" ¹⁸ Inya santar mangaruhnya satiap arie. Paulus, lalue gusar, babali bapaner ka roh iyah, "Aku mamarintah kolai lalam nama Kristus Yesus maluar mula inya!" Lalue, roh iyah maluar, metuh iyah jam. ¹⁹ Tapie, metuh uras majikannya maila laie baharap urang akan kauntungan iyah jadie hila, urang manangkap Paulus rang nua Silas lalue manaing kahoman urang banya ka paharap para panguasa. ²⁰ Lalue, urang jadie manaing Paulus rang nua Silas ka hakim-hakim kapala, urang bapaner, "Urang-urang itie am urang Yahudi am rajin mangacau kakota itie. ²¹ Urang malajar adat istiadat am hinta bujur ditarima lalue karuh samah kan urang Roma." ²² Urang banya iyah huas barota manyarang Paulus rang nua Silas para hakim kota marabit baju pakaian Paulus rang nua Silas, lalue manyuruh urang manukuh rang nua honie tungkat. ²³ Metuh manyia-nyia Paulus rang nua Silas honi banya panukuh, urang nibar nya lalam panjara lalue manyuruh kapala panjara manyaga Paulus rang nua Silas hinta lengah. ²⁴ Jadie metuh manarima parintah iyah, kapala panjara manama paulus rang nua kapanjara bahagian lalam lalue mangobat kaki rang nua langsung dipanga. ²⁵ Kira-kira tongah malam, Paulus rang nua Silas metuh badoa samil manyanyi lagu-lagu pujian kan Hatalla, uras tahanan am bukan manongar rang nua. ²⁶ Lalu, salenga gempa bumi am bakah sampai fondasi panjara iyah taunui. Lalue, pintu uras taungkap salenga satiap panga uras tadora. ²⁷ Metuh kapala panjara misik lalu maila pintu-pintu panjara jadi tabuka, inya mancabut pisau sarih-sarih hona mamati kanirinya lai inya mangakira kaban tahanan jadie badari. ²⁸ Tapie, Paulus banyawa honi suara am nyaring, "Hinang mambahayakan kanirimu lai kami uras tege ditie!" ²⁹ Lalue, kapala panjara iyah maminta palita lalue baguang tama, samil kakiti, inya batabe paharap Paulus rang nua Silas. ³⁰ Limah iyah, inya manaing urang kaluar lalue bapaner, "Tuan-tuan, apa am harus ku karuh nyaman salamat?" ³¹ Lalue, urang manimat, " Parcaya lalam Tuhan Yesus kolai akan diselamatkan, kolai kan urang banya am tingal kadangaumu." ³² Lalue, Paulus rang nua Silas mamaner firman Tuhan ka kapala panjara iyah lalue ka urang banya am tege kalalam dangaunya. ³³ Limah iyah, inya manaing Paulus rang nua Silas, malam iyah jam, lalue mamasu luka-luka urang, inya barota kaluarganya laca dibaptis. ³⁴ Lalue, kapala panjara manaing Paulus rang nua Silas kadangaunya lalue manyarungi puseh lai. Maka, inya barami, amun inya uras urang am tingal kadangaunya jadi parcaya kan Hatalla. ³⁵ Tapie, metuh siang arie datang, para hakim-hakim kota manyuruh barapa-rapa polisi, lalue bapaner, "Lopaskan urang-urang iyah!" ³⁶ Lalue, kapala panjara mamarah pantal iyah ka Paulus, lalue bapaner, "Hakim-hakim kota jadie manyuruh malopas kolai. Laie iyah, maluar botie tie lalu badari lalam kadamaian!" ³⁷ Lalue, Paulus bapaner ka urang, "Urang-urang itie jadie manukuh kami kapaharap urang banya, honta adil kan urang-urang am iyah masyarakat negara Roma, jadie manibar kami kalalam panjara. Lalu, apa wayah itie urang maluar kamie sacara suni-suni? Hinta! Nauh nya am urang kaniri datang lalue maluar kamie." ³⁸ Para polisi iyah mamaner paner-paner itie ka hakim-hakim kota. Urang gola metuh urang manongar Paulus rang nua Silas iyah masyarakat negara Roma. ³⁹ Lalue, urang datang maminta maaf ka Paulus rang nua Silas. Metuh urang maluar Paulus rang nua Silas, urang maminta nyaman rang nua badari mula kota iyah. ⁴⁰ Lalue, urang maluar mula panjara lalue tama kadangau Lidia, metuh urang maila manyari-manyari saagama, Paulus rang nua Silas manoguh hati rang nua lalue badari.