¹ Metuh iyah, tege antara ungkup Antiokhia, nabi-nabi lalue guru-guru, iyah am Barnabas, Simon am dijoku Niger, Lukius mula Kirene, Manahem am hirup mula koni sampai bakah bauma raja Herodes, raja wilayah, rang nua Saulus. ² Panehan urang-urang itie metuh sambayang kan Tuhan am puasa, Roh Barasih bapaner, "Khusus akan-Aku Barnabas rang nua Saulus akan parintah am itie Aku jadie manimai urang." ³ Limah iyah, metuh urang bapuasa langsung berdoa, lalue maomah jarinya ka urang tinggi Barnabas rang nua Saulus, urang mautus rang nua badari. Barnabas rang nua Saulus ka Pulau Siprus ⁴ Maka, metuh kona utus badari laie Roh Barasih, Barnabas rang nua Saulus turun ka Seleukia, lalue mula koyah urang balayar ka Siprus. ⁵ Metuh urang jadie sampai ka Salamis, urang mamaner firman Hatalla ka sinagoge-sinagoge urang Yahudi, lalue urang manaing Yohanes jadie palayan urang. ⁶ Metuh urang badari mangaliling uras pulau sampai ka Pafos, urang badapat kan pramaya, nabi am palsu Yahudi, am banama Baryesus. ⁷ Inya barota kan Jabatan Sergius Paulus, urang am pintar, maminta Barnabas rang nua Saulus datang ka inya laie hona manongar firman Hatalla. ⁸ Tapie, Elimas, tukang pramaya iyah, laie bira iyah memang arti nama henya, malawan Barnabas rang nua Saulus, inya bausaha mamelok Prokosul iyah mula imamnya. ⁹ Laie Saulus tie jam dikenal samahkan Paulus, diponuh laie Roh Barasih, maila Elimas, ¹⁰ lalue bapaner, "Uii kolai, am ponuh laie tipu manipu lai sagala kajahat, kolai iyah am iblis, kolai musuh mula sagala kabai, hinta hona kah kolai bahonti mamelok jalan Tuhan am jadie lurus? ¹¹ Wayah itie, ila, jarie TUhan datang ka tingimu lalue kolai akan jadie buta lalue hinta akan maila mataarie salama babarapa waktu." Sakatika iyah jam, kabut lalue potang turun tinginya lalue inya badari bakaliling mangau urang akan manuntun jarinnya. ¹² Lalue, Prokonsul iyah jadie percaya metuh maila apa am jadie tajadie laie inya kagum akan ajaran Tuhan. Paulus rang nua Barnabas Badari ka Kota Antiokhia ka Wilayah Pisidia ¹³ Metuh iyah, urang-urang am balayar barota inya mula Pafos sampai ka Perga, ka Pamfilia, tapie Yohanes maningal urang lalue baulang ka Yarusalem. ¹⁴ Tapie, Saulus rang nua Barnabas totap mangaruh pajalan rang nua mula Perga sampai Antiokhia, ka Pisidia. lalue, metuh ari mengo, urang badari ka Sinagoge lalue duru koyah. ¹⁵ Metuh mamaca Hukum Taurat mula kitab para nabi, kapala-kapala Sinagoge manyuruh urang bapaner ka rang nua rasul iyah, "Manyari-manyari, amun kolai tege bungi paner parami akan urang itie, Cuba paner." ¹⁶ Maka, Paulus badiri mamori isyarat honi jari nya lalue bapaner, "Uii urang-urang Israel kolay am gola akan Hatalla, dongar itie! ¹⁷ Hatalla bangsa Israel itie jadi mamilih hia umuh am jadie maningi bangsa dirie salama urang diam ka tanah Mesir honie jarie am taangkat, inya mamimpin urang maluar mula diah. ¹⁸ Palamatnya sakitar ompat puluh tahun, Inya basabar maharap tingkah laku urang ka padang pulau kayu. ¹⁹ Lalue, metuh inya, mampati tujuh bangsa katanah Kanaan, Inya mamori hak tanah iyah. ²⁰ Uras itie tajadi kira-kira salama 450 tahun. Lipas iyah, Hatalla manyorah akan hakim-hakim sampai ka masa Nabi Samuel. ²¹ Limah iyah, urang maminta siku raja lalue Hatalla mamori urang Saul, ana kalaki bin Kish, urang mula suku Benyamin, salama ompat puluh tahun. ²² Limah Hatalla mausir Saul, Hatalla mahuas Daut akan jadie raja urang, am tuntangnya Hatalla tie jadi basaksi lalue bapaner, 'Aku jadie manapat Daud, ana kalaki Isai, urang am manotap ka hati-Ku, am hona mangaruh apa kahona-Ku.' ²³ Mula katurunan itie, Hatalla, sasuai janyi-Nya, manaing ka Israel siku urang Juruselamat, iyah am Yesus. ²⁴ Sahompan panatang Yesus, Yohanes jadie mamori kabar sahompan baptisan pangampunan akan uras urang Israel. ²⁵ Lalue, panehan Yohanes manyadi gawi nya, inya tarus bapaner, 'Kolai kira aku itie sapa? Aku bukan inya. Cuba, ila itie, siku datang sahompan aku, sanal kakaki-Nya yah gin aku honta pantas malopasnya.' ²⁶ Manyari-manyari, katurunan kaluarga Abraham urang-urang antara kolai am gola kan Hatalla, akan dirie dibori kasalamatan am jadie dipaner. ²⁷ Laie urang am tingal ka Yarusalem uras para pamimpin rang, am honta mangasene inya honta mamaham paner uras nabi, am jadie dibaca satiap mengo, jadie sagonap am di paner uras nabi iyah mahukum Yesus. ²⁸ Lalue, sakali pun urang hinta manapat alasan itie iyah honi mahukum mati, urang manyuruh Pilatus mamati-Nya. ²⁹ Lalue, metuh urang manyimpul am ditulis tuntang Inya, urang manurun-Inya mula salib langsung mangaling inya lalam kuburan. ³⁰ Tapie, Hatalla mahuas Inya mula antara urang matie, ³¹ lalue salama baarie-arie, Yesus manampa kan kaniri ka urang-urang am barota akan-Inya mula Galilea sampai ka Yarusalem, am wayah itie jadi saksi-saksi-Nya akan bangsa itie. ³² Lalue, kamie manaing Barita baie tuntang janyi Hatalla ka hia umuh dirie, ³³ amun Hatalla jadie manopat janyi itie akan dirie, ana-ana urang, honi mahua Yesus, bira am tatulis lalam kitab Mazmur pasal dua: 'Kolai yah ana-Ku. Arie itie, Aku tie jadie Ompai-Mu.' Mazmur 2:7 ³⁴ Tuntang am mahuas Yesus antara urang mati, hinta akan mula baulang kakamatian, Hatalla langsung bapaner' 'Aku akan mamori kakolai berkat am kudus lalue tahu diparcaya, am dibori kan Daud.' Yesaya 55:3 ³⁵ Iyah am laie nya inya bapaner lalam Mazmur am bukan, 'Kolai hinta akan maubah urang am Kudus-Mu maila kamatian.'Mazmur 16:10 ³⁶ Laie,, Daud jadie katurunan kaniri laie kahona Hatalla, lalue mati , diomah helat hia umuhnya, lalue maila kabinasaan, ³⁷ tapie Yesus yah Hatalla am dihuas mula urang mati, hinta maila kabinasaan. ³⁸ Laie iyah, nauh nya am diingat laie kawan manyarimu, amun mula Inya tie am pangampunan sagala kasalah mu yah, ³⁹ lalue malalue-Inya satiap urang am parcaya dilopas mula sagala halnya mula kolai hinta tahu dilopas laie Hukum Taurat Musa. ⁴⁰ Limah iyah, bajaga-jaga nyaman hal-hal am dipaner mu kalam kitab uras nabi honta kona kolai: ⁴¹ Ila itie, uii uras pahina! Tagiat langsung mati, laie Aku jadie ngaruh gawi ka zamanmu, laie pangawi am hinta kolai parcaya, amun tege siku urang mamori panjelasan ka kolay."'Habakuk 1:5 ⁴² Panehan Petrus rang nua Barnabas maluar, urang-urang mamohon nyaman urang mangabar firman itie metuh mengo pagie. ⁴³ Limah urang badapat ka Sinagoge iyah jadie, banya urang Yahudi am gola akan Tuhan uma paulus rang nua Barnabas, am bapaner kaurang banya nyaman manorong urang tarus diam kalalam Anugerah Hatalla. ⁴⁴ Metuh arie mengo pagie, hona uras urang am ka kota bakumpul laie manongar firman Hatalla. ⁴⁵ Tapie, metuh urang-urang Yahudi maila karami iyah urang diponuhi laie kahiri hati lipas iyah urang langsung malawan apa am dipaner Paulus samil mahasutnya. ⁴⁶ Limah iyah, Petrus rang nua Barnabas manimatnya honi karani langsung bapaner, "Hal itie penting laie firman Hatalla harusnya diparah mu holu. Laie kolai manolak nya laie kolai mansai kaniri nya honta pantas bagora pahirup am abadi, ila, kamie bapaling mula bangsa-bangsa am bukan. ⁴⁷ Laie, bira itie Tuhan mamori parintah akan kamie: 'Aku jadie mangaruh kolai torang akan urang-urang bukan nyaman kolai tahu manaing kasalamatan sampai ka hujung dunia."'Yesaya 49:6 ⁴⁸ Metuh urang-urang Yahudi manongar hal itie, urang basukacita mamuliakan firman Hatalla. Lalue, sabanya am jadie kona tentu honi pahirup am abadi, tahu parcaya. ⁴⁹ Maka, iyah firman Hatalla maluas kasaluruh wilayah itie. ⁵⁰ Tapie, urang-urang Yahudi maadu domba labini-labini Saleh am tahormat urang-urang penting ka kota, lalue mahuas kasiha-siha malai Paulus rang nua Barnabas, lalue mausir urang nua ka luar mula daerah parbatasan urang. ⁵¹ Tapie samil mangipas dabu mula kaki urang Yahudi kakoyah, Paulus rang nua Barnabas badari ka Ikonium. ⁵² Lalue, uras murid diponuhi honie karami laie Roh Barasih.