¹ Umakan, bapakat kan inya, kami manula kolai nyaman honta sia-sia manarima kuasa Hatalla. ² Sabab, Inya bafirman: "Katika aku bakahona, Aku manongar kolai, umakan ari kasalamatan, Aku marompuh kolai," Ila ja, keken itie iyah am waktu am bakahona iyah. Ila ja, keken itie iyah am waktu kasalamatan iyah. Yesaya 49:8 ³ Kami honta mamori pahalang kan sapa jua nyaman gawi Tuhan honta tahina, ⁴ samah jam lalam uras cara kami manampa diri kami akan hulun-hulun Hatalla, laie ponuh katabah lalam uras kapanyakit, kasosa, kaholin, ⁵ pukulan, panjara, kasabak, pantis poluh, honta tidur, kabaduran, ⁶ laie ponuh kamurni, kapintar, kasabar, kamurah, Roh Barasih, sayang am tulus, ⁷ paner am bujur, kuasa Hatalla, sanjata kabujur ka jari kanan umakan kiwa, ⁸ kamulia umakan katida, kona tahiu umakan kona puji, dijoku panipu-panipu padahal kami bujur. ⁹ Kami bera honta di kasene, tapie batarung; bera am hampir matie, tapie ila ja, kami hirup, tapie honta matie. ¹⁰ Bera am baduka, tapie tarus baramie, kami susah, tapie mangaruh urang bukan sugih, mayan ara apa-apa, tapie bagora uras am tege. ¹¹ Kami jari mamaner akan kolai, hei urang Korintus, hati kami tabuka. ¹² Kolai honta tabatas laie kami, tapie kolai dibatas laie hatimu kaniri. ¹³ Keken itie, akan pamalas am samah -- aku bapaner bera akan kawan ana-Ku -- buka ja hatimu baka-bakah. (Pasangan am Honta Samah) ¹⁴ Hinang jari pasangan am honta samah kan urang-urang am honta yakin. sabab, apae panyamah antara kabujur umakan kajahat? Atau, apae panyamah am tadapat antara torang umakan potang? ¹⁵ Kapakat apae am digora Kristus umakan Belial? Atau, jatah apae am tege antara urang yakin umakan am honta yakin? ¹⁶ Umakan, kapakat apae am tege antara Rangau Hatalla umakan hampatung-hampatung? Sabab, dirie iyah am Rangau Hatallaam hirup, bera firman Hatalla, "Aku akan tingal ka lalam urang umakan aku bajalan ka antara urang, umakan aku jarie Hatalla rang, umakan rang jari umat-Ku." Imamat 26:11-12 ¹⁷ " Laie iyah, maluar kolai mula tongah-tongah rang, umakan bapisah," Uja Tuhan. "Umakan, hinang am marigap am isa, maka aku akan manarima kolai." Yesaya 52:11 ¹⁸ "Umakan, aku jarie Ompai kan kolai, umakan kolai jarie ana-ana-Ku kalakie umakan ana-ana-Ku labinie," bera iyah am firman Tuhan, Am Mahakuasa. 2 samuel 7:14; 7:8